प्रेम कथा
खन्टाइल मैंयाँ
जीवनके आरोह अवरोहहे आत्मसाथ कर्टी आघे बहर्ना क्रममे जिन्गी कहोर लडियाहस बहल टे कहोर पहारहस भट्कल ओ कहोर भिरहसक अल्झल । आझ मोर जिन्गी कहोर नैसोंचल भिरहस हुइल बा । मै जीवनमे जिन्गीसंग बाँचक लाग कोनो सम्झौता नैकरल नैहो । कर्नु ढेर सम्झौता, कर्नु जिÞन्गीक संगे मै ।

टभुन मै जिÞन्गीम कबु फें शान्तीके सास फेरे नैपैनु । हाँसी खुशीसे बैठे नैपैनु । मै ढिरे ढिरे आघे बहर्टी बटँु जिÞन्गीक यात्रा समझके । शिलासे अकस्मात घोडाघोडीमे भेंट हुके मोर जिन्गीमे एक्ठो लावा मोड लेहल । उ घटनासे फेन एकचो मोर जिन्गीम ढुम्मिल ओ पिडादायी उल्टाडेहल बा । शिलासे कोनो समयमे मोर जिन्गीक सपना साटल रहे । ओसिक हेर्लेसे ओहकार ओ मोर जिन्गी सुखद् सम्बन्धके पर्याय जो बनल रहे । मने आझ मोर सपना धरापमे परल बा । शिलक संगे जोरल मोर सपनाके सुन्दर महल एक एक कर्के भटकगिल बा । मोर जिÞन्गीक डगर भटकगिल बा ।

आब यहाँसे कहाँ जिना ? महि कुछ पटा नैहो । मै अन्यौलमे आघे बहर्टी बटँु । मनैनमे कत्रा हलहल ओ कत्रा ढेर परिवर्तनके चरण एकसे एक कर्टी हुइटी रहठ । काल्हिक मायालु ओ चुल्बुली शिलामे आझ ढेर परिवर्तन आइल बटिन । अत्रा मायालु लागीन । मने आझ ढेर दिनके बाड शिलासे भेंट हुइल महि कहोर कहोर नैमजा महसुस हुइल । टभु फें मै अपनहे सम्हर्नु । एक मन टे कहटेहे कहुँ भाग जाउ, ओहकार नजर झुक्वाके । मने नैसेक्नु मै ओसिक करे । पलपल महि शिलाके याद सम्झना सटैटी रहठ । टब मै एकचो खोब हेरठुँ । बिरेन्द्र । कत्रा परिवर्तन हुइल बटो ना ? एकाएक कानमे बजल मधुर आवाज । घुम्के हेरठँु ओहे शिला महि हेर्के हँस्टी रठी । ठाकल बिरेन्द्र, प्यारमे हारल बिरेन्द्र, जिÞन्गीक प्रिय चिज हेर्वाइल बिरेन्द्र । परिवर्तन नैहुके का का हुइ टे । नै कहँु कटीकटी आजाइठ मुहमसे यी सब शब्द । आब टे जिन्गीक बारेमे लेखाजोखा करे छोर सेकले बटँु ।

समयके भेलमे मै फें दुबा डेहल बटँु जिन्गीहे । बर्खायÞामके लडिया हो मनैनके जिन्गी । किनार मोर्के नेंग डेहठ कबु कहोर टे कबु कहोर । पटा नैहो कहाँ पुगके ओराइठ यी जिन्गीक यात्रा ? कहाँ पुगके ओराइठ मै नेंग्टी रहल यी डगर ? शिला एक्कासी भाबुक हुइली । मनैनके जिन्गीमे समवेदना ओ संबेगके महत्व हुइठ कहंै कबि हँुक्रे । मने आझ महि ओहे समवेदना ओ संबेगसे सटैटी रहठ ओ साेंच्टी रठुँ मोर प्यारी शिलाहे मजा हुइहिन कना बिस्वासमे बैठल बटँु । मोर जिन्गी अझकल कोनो गति पक्रे नैसेकठो । मै समयके पैलाहे पछयइटी नेंग्टी बटँु । समय जोहोर डौराइठ ओ.हरे डौर्टी बटुँ । कहुँ कलेसे बहकटी बटुँ ।
शिलासे भेंट हुके फें मै बातचितके क्रमहे बर्हाइ नैसेकठुँ । अत्रैमे एकठो लौडा आके कहल शिलाहे हलहल करो ना । ढि़ला हुगील । टब जाके जाइटँु ना कहिके शिला महिसे बिदा हुके उ लौडक संग गैगीली । सायद उ लौडा शिलाके जीवन संघरिया हुइहिन । महिसे ओकर चिनजान फें नैकरैली । कर्रा पर्के हुइ उ ओसिक कर्ली । हेर्टी हेर्टी उ मोर यी आँखीसे हेरागिली । शिला कहिके बलैना मन लागल मने मै उ बेलम् हिम्मत करे नै सेक्नु ।
बिरेन्द्र चौधरी जलन
घोडाघोडी ४ गणेशपुर कैलाली