अन्तरवार्ता
‘नाटक कर्टी जिन्गी बिटैना मोर लक्ष्य बा’

बर्दिया जिल्लाके गुलरिया नगरपालिका वडा नम्बर १ बेलटाँरीमे बाबा पतिराम चौधरी ओ डाइ हिउंटी चौधरीके कोखसे २०५२ माघ १ गते जन्मल रंगकर्मी ओ मोडल सुनिता चौधरी थारु कलाकार मध्ये एक हुइटैं । थारु आधुनिक नाट्य कलाक्षेत्रमे चर्चित कलाकारके रुपमे स्थापित हुइल बटि । उहाँ मै टोहाँर दिवानी, गाउँ घरक् छैली, रहर, मेरो पनि मन छ, पागल मन, डौनक् माला डेहबु घलाइ लगायत एक दर्जनसे ढेर थारु ओ नेपाली गीतमे अभिनय कैसेक्ले बटैं । ओस्टेके भुरभरा रहर, गोतीयार फिलिम, करोट, दृश्ती नाटकमे फेन डमडार रोल बटिन । २०७४ सालमे बर्दिया कलाकार मंचसे उत्कृष्ट कलाकारके रुपमे सम्मान फेन पाइल बटैं । एहे क्रममे इ पत्रिकाके प्रधान सम्पादक सागर कुश्मीसे करल छोटमिठ बातचित यहाँ प्रस्तुत कैल बा ।

१.सुनिता बाबु अप्ने कलाक्षेत्रमे कहियासे लगली ? इ क्षेत्रमे लग्ना आशिर्वाद कहाँसे पैली ?

–मै ८÷९ बर्षक पुग्नु टे महिन नाटक कर्ना, नच्ना मोर बहुत रहर रहे । हमार मन्ल्ही दिदी महिसे आघे सडक नाटकमे जाए । महिनफें नाटकमे खेल्ना बहुत इच्छा रहे । घर काम कर्ना बेला, खेल्ना बेला अक्कल्हे अक्कल्ही नाचु ओ कौनो फिलिमके डाइलग बोलँु । दिदिक भोज हुइलिस टे २०७१ सालमे महिन बिष्णु थापा, नरेन्द्र श्रेष्ठ , शम्भु सुनार नाटकके लाग बलाइ अइलैं । पहिल नाटकमे मै सक्कु दर्शक हुकनके मन जिट्ना सफल हुइनु । ओठ्ठेसे मै कला क्षेत्रमे लगातार लागल बटँु ।

२.अप्नेक बाल्यकाल कैसिक बिटल बटाडिना ? जिन्गीमे सबसे यादगार पल कुछ बा, जौन कबु नैभुले सेक्ना ?

–मोर बाल्यकाल ठिक ठिके बिटल । मै ज्या कहुँ, हमार घरक् मनै मोर इच्छा पुरा कैडेहेंट । सक्कुनके मैयाँ पैनु कहपरल । विशेष कैक हमार काका गोपाल चौधरीके बहुट प्यारी रहुँ । मोर जिन्गीके सबसे यादगार पल कलक, मै जब १ कक्षामे पर्हु टब सद्द स्कुलसे भागके घर आजाउँ । कबु स्कुल जैना समय हुइल कलसे किउ फें निडेख्ना ठाउँमे जाके नुकु । जुन दिन बाबा स्कुल जिब्या टे पैसा डिहम कह ओ पैसा डेके स्कुल पठाए उ दिन स्कुल जाके फें १ घन्टि पहरके घर भागजाउँ । एकदिन बाबा मोर हाँठ गोरा बाहानके फोहोर फकैना खोल्भट्टिम फकाडेहेल । टट्टन मट्टन घाममे खोब रोइनु । बहुत पियास लाग । डाइ सुफ्लाइ कैके साेंचल रहुँ, डाइ फें नैसुफ्लाइल । सन्झ्या हुइल टे बाबा अप्पन्हे महिन छोरल । यी मोर बहुत यादगार पल हो । कब्बु फें बिस्राइ नैसेकम ।

३.अब्बेसम् थारु ओ नेपाली मिलाके सक्कु कैठोसम गीतमे अभिनय कैसेक्ली ?

–पाँचठो थारु गित ओ एकठो नेपाली कैके ६ ठो गीतम खेल्ले बाटँु । मै टोहाँर दिवानी, गाउँ घरक् छैली, रहर, पागल मन, डौनक माला डेहबु घलाइ ओ नेपाली गीत मेरो पनि मन । ओस्टेके आकुर गीत अइना क्रम जारी बा ।

४.कला संगीत क्षेत्रमे लागके का पैली ओ का गुमैली ?

–कला क्षेत्रमे लागके मै दर्शक हुकनके मैंयाँ पाइटुँ । सुनिता एकठो असल अभिनेत्री हो कैह्के परिचित हुइटि बटँु ।

५.अप्ने सक्कु मेराइक गीतमे भूमिका निभासेक्ली । खास कैके कसिन गीतहे प्राथमिकता डेठी ? खास कैके कैसिन गीतमे मन परठ ?

–मै सेन्टिमेन्टल गीतहे ढेर प्राथमिकता डेठुँ । काहे कि जत्रा फें मै नाटक गीत खेल्ले बटँु ढेरहस् सेन्टिमेन्टल किल बा । सायद महिन सेन्टिमेन्टल सुट करट कनाहस् लागठ । सायद मोर सेन्टिमेन्टल गाना, नाटक मन नैपरुइया कमे हुइहि । सेन्टिमेन्टलमे खेल्लेसेफें पुरान सांस्कृतिक गीत महिन बहुत मन परठ । आब आधुनिक गीतमे खेल्ना खेल्ना रहर बा ।

६.अपन अभिनय करल गीत मध्ये सबसे मन पर्ना गीत कौन हो ?

–महिन अपन अभिनय कर्लक गीत मसे मन पर्ना गित पागल मन ओ रहर हो । काहे कि इ गीतमे मोर सोंचलहस् रोल बा ।

७.नाटकमे खेलके यहाँसम् पुगली । इ समयमे कैसिन कैसिन दुख, समस्या, ओ बाधा अड्चन आइल ?

–नाटकमे सबसे पैल्हे टे मै करियर बनैना बहुट कर्रा परठ । नाटकके समयमे ना घाम, ना पियास, ना भुख सक्कु मैयाँ मारे परठ । जब महिन नाटकमे चाहे सुटिङमे बलैठैं, मै जौन ठाउँ जिठुँ टे सुरुम महिनसे केउ फें नैबोल्ठैं । महिन डेख्के यी का कर सेकि कना मनमे लग्ठिन । टब महिन बहुत दुःख लागठ । काहे कि मै ढेर नैबोल्ठु । काम लागक् भरिक किल बोल्ठुँ । जब मोर काम डेख्ठैं टब बल्ल महिनसे बोल्ठैं ।

८.एक्ठो सफल कलाकार बनक लाग का का करे परठ ? अभिनय कर्ना साधना कहाँसे सिख्ली ?

–एकठो सफल कलाकार बनक लाग टे सबसे पैल्हे मिठ बोलीवचन हुइ परल । किहिसे कसिक बोल्ना कैह्के साेंच्के बोले परठ । डोसर बात हमे्र का काम करटि ? यिहिन कसिक कौन हिसाबसे प्रस्तुत कर्लेसे मजा हुइ ? कैह्के साेंचे परठ । ता कि दर्शक हुकनके मन जित सेकि । अभिनय कर्ना टि.भी. हेरके, रेडियो सुनके मै सिख्नु । टब २०७४ सालमे काठमाडौं मण्डला थिएटरमे ६ महिनक् एक्टींग कोर्स सिख्नु । छात्रावृतिमे नाटक सिख्ना मौका पैनु ।

९.इ बाहेक आउर का काममे समय बिटाइटी ?

–कलाकार क्षेत्र बाहेक मै एक बर्ष सहकारीमे काम कर्नु । नाटकमे जाइ निपाके बहुट छट्पटाउ । कबुकाल्ह बिदा माँगके हुइलसेफे नाटकमे चल्जाउ । टब सहकारी छोरडेनु । आब ब्युटि पार्लर सिखक लाग बटुँ ।

१०.मनैंनके जिन्गीमे गीत संगीतहे कैसिक परिभाषित कर्ठि ?

–संगित एकठो मनैंनके मन बहलैना साधन हो । बैराग लागल बेला मन चौकस करैना एक मेरके औषधी हो कनाहस लागठ । जब मनैं दुखी रठैं, उराठ हुइल रठैं टब संगीत सुनके, भिडियो हेरके आनन्द लेठैं । संगीत सुनके अपन मन हल्लुक परठैं ।

११.ओरौनीमे कुछ बाँकि बा कि कहे पर्ना बात ?

–ओरौनीमे मै जत्रा बेराम रलेसेफे नाटक कर्ना बेला सुटिङ कर्ना बेला मजा होजैठँु । मोर इच्छा नाटक सुटिङ कर्टि कर्टि मुना हो । नाटक कर्टी जिन्गी बिटैना मोर लक्ष्य बा । अस्टेक मुए पैम टो मोर मन शान्ति पाइ कनाहस लागठ । कुम्हाँ चम्काके हिहि..। धन्यवाद ।