अन्तरवार्ता
‘थारु समुदायके सफल कलाकार (मोडल) बनके डेखैम’

सुजिता राजवंशी
बर्दिया जिल्लाके बारबर्दिया नगरपालिका वडा नम्बर ८ कटरनियाँके सुजिता राजवंशी, थारु कलाकार मध्ये एक हुइँट । हुँंकार जलम २०५८ साल अगहन महिनाके २३ गते बाबा कृष्ण चौधरी ओ डाइ लिला चौधरीके कोखसे इ धर्तीमे गोरा टेकलैं । उहाँ थारु आधुनिक सांगीतिक क्षेत्रमे चचिर्त मोडेलके रुपमे स्थापित हुइल बटैं । ओहकान अभिनय करल एक दर्जनसे ढेर थारु ओ नेपाली गीत बजारमे आइल बा । एहे क्रममे समसमायिक विषयमे पत्रकार सागर कुश्मीसे करल छोटमिठ बातचित यहाँ प्रस्तुत कैल बा ।

१.अप्ने कलाकारिता क्षेत्रओर कहियासे लग्ली ? गीतमे खेल्ना आशिर्वाद कहाँसे मिलल् ?

मै कलाकारिता क्षेत्रमे लग्ना आब भरखर सुरुवात हुइल बा । बजारमे थारु गीत आइठ डेख्के बहुत मन लागे । मै फें खेलँु कि जसिन । मोर सपोर्टमे कोइ फें नाइ रहैं । मलेसियामे रहल हमार एक्दमे चर्चित सब्द लिखुइया केशब राजबन्शी सर महि गीत संगीतके बारेमे जानकारी डेहनैं । मोरिक पहिलो भिडियो पागल मन कना भिडियो हो । ओस्टेक कौने ठँर्या कना भिडियो हुँकार सब्दमे रहल खेल्लँु । अभिन सम आउर ओस्टेके सबसे ढेर धन्यवाद डेहेक चाहटुँ हमार केशब राजबन्शी सरहे । आउर ओस्टेके महिन जन्म डेहुइया मोर बाबाहे बहुत सपोर्ट करठैं । अस्टेके प्रेरणा मिललओरसे मै कलाकारिता क्षेत्रमे आपुग्नु ।

२.अप्नेक बाल्यकाल कैसिक बिटल बटा डिना ? कबु भुले नैसेक्ना जिन्गीमे सबसे यादगार पल कुछ बा ?

मोर बाल्यकाल टे मजेसे बिटल बा । आउर ओसिन टे कोनो नैहो यादगार । कुछ नाइ हो भुलाइ नैसेक्ना मेरिक । बस स्कुल लाइफ टाइम सन्घरियन संगे रहल बैठल, उ भर कबो नैबिसरैम । असिन दिन आब कहाँ आइ ।

३.अब्बेसम थारु ओ नेपाली मिलाके सक्कु कैठोसम गीतमे खेल सेक्ली ?

अब्बेसम टे भिडियो खेलल मोर ३ ठो हुइटा । बाँकी आब कुछ दिनके बादमे डोसर गीत अइटी बा । अभिनय करल गीत बहुट बा अभिन बजारमे अइना बाँकी बा ।

४.गीत संगीत क्षेत्रमे लागके का पैली ओ का गुमैली ?

गीत संगीतमे लागके मै बहुत जनहनसे प्रेरणा पैलुँ । एकठो गीतमे खेल्नु टे मोर डाइ बाबा आउर संघरिया ओइने प्रगति कैटि रहहो कहिके सल्लाह सुझाव डेटी बटैं । सपोर्ट फें सक्कु जनहनसे मिलटा । एकदम खुसी लागठ । यहाँ हजुर गुमैना बात पुछलि गुमाइल टे कुछु नैहुँ । अब्बासम कलासे बहुत मनै नैमजा सोच्डेठंै । गाउँ घर नैमजा बात करठैं । टब बहुत दुख लागठ ।

५.अप्ने कैसिन मेरके गीतमे अभिनय कर्ना मन परैठि ? खास कैके गीत प्राथमिकता डेठी ?

मै सब मेरिक गीतमे अभिनय कर्ना मन परैठुँ । खास कैके कल्चर गाना महिन बहुत मन परठ । तर अभिनसम खेल्ना मौका नैपैले हुइटुँ । मने आब कुछ दिनमे डोसर गीत अइटी बा कल्चर गीत । खास कैके मै थारु कल्चरल गीतहे प्राथमिकता डेठुँ ।

६. अपन खेलल गीत मध्य सबसे मन पर्ना गीत कौन हो ?

मोर खेलल गीत मनसे कौने ठँर्या कना गीत हो । स्याम चौधरी, सोनु कुस्मी, केश कुमार के । मजा बा सक्कुजे मैंया करडेले बटैं । खुसी बटुँ आउर ओस्टेके अइना दिनमेफें अस्टेके मैंयाँ करडिही कना आस बा ।

७. गीतमे खेलके यहाँ सम पुगसेक्ली । कैसिन कैसिन दुख, समस्या ओ बाधा आइल ?

आर्थिक समस्या बहुत सटाइल । चिन्हल मनै. नैहोके अवसर नैमिलल ।

८.एकठो सफल कलाकार बनक लाग का का करे परठ ?

एकठो सफल कलाकार बनेक लाग बहुत मेहनत करेक परठ । सक्कु जनहनके साथ सहयोग पाइक परठ । अपन खुबी कलाहे एकदम खुल्के डेखाइ परठ । एक्टिङ हुइल डान्स एकदम खुल्के डेखाइ परठ कलेसे जरुरफें सफल कलाकार बने सेक्जाइठ । मै अभिन ढेर मेहनत करे पर्ना बा । संघर्ष करटी बटुँ ।

९.अभिनय बाहेक आउर का काममे समय बिटाइटी ?

अभिनय बाहेक मै आउर अध्ययन करठुँ । अब्बे मै १ं२ मे पहर््ठुँ । आउर ओस्टेके अपन परहाइहे निरन्तरता डेटि बटुँ । आउर कलाकारिता क्षेत्रहेफें आघे बरहैटी रहम ।

१०.भविस्यमे का बन्ना सपना बोकके नेंगटी ?

गीत संगीत मन बहलैना साधन किल नैहो । गीत भासा, संस्कृति ओ प्रतिभा संरक्षण कैना माध्यम हो । ओहे मारे थारु समुदायके एकठो सफल कलाकार (मोडल) बनके डेखैम । दिलमे सपना भारी हुइ परठ सफल हुइक लाग । कलाकार हुइलाग हर चुनौतीसे सामना करे सेके परठ ।

११.ओरौनीमे कुछ बाँकी बा कि कहे पर्ना ?

मोर आवाजहे यहाँसम पुगैली । मोरहस लावा पुस्टाहे मौका डेलकमे इ पत्रिकाहे बहुत बहुत धन्यवाद बा । महिन मैंयाँ कैके साथ डेहुइयनहे फेन सक्कुहुन सम्झना बा । धन्यवाद ।