‘साहित्य लिखित इतिहास हो, जे लौव पुस्टाहे डगर डेखैना लिरौसी बनाइठ’

बर्दिया जिल्लाके बढैयाताल गाँउपालिका वडा नम्बर ७ कालिकाके युवा पुस्ताके साहित्यकार शेखर दहित, एक सशक्त अख्यानकार हुइँट् । उहाँक गयर्वा बुडु खिस्सा संग्रह, ठाँह्रा खिस्सा संग्रह, थारु जोधा जीवनी संग्रह लगायत थारु पोस्टा प्रकाशित हुइल बटिन । छोट्टेसे साहित्य, संगीतमे रुचि रहल दहितके बालकथा, लोककथा, आधुनिककथा ओ टमान मेरमेरिक लेख रचना प्रकाशित हुइटि आइल बटिन । उहाँ अंग्रेजी साहित्यमे स्नातकोत्तर कर्ले बटैं ओ लुम्बिनी विश्वविद्यालयसे बुद्ध दर्शनमे विद्यावारिधी कर्टि बटैं । यिहे क्रममे साहित्यिक विषयमे केन्द्रित होके सागर कुस्मीसे करल छोटमिठ बातचित यहाँ प्रस्तुत कैल बा ।

१.अप्ने साहित्य लेखनके सुरुवात कैहियासे कर्ली ? लेखन प्रेरणा कहाँसे पैली ?
साहित्य लेखनसेफें म्वाँर ढ्यार पहर्नाम मन जाए, ढ्यार जैसिन आइडल हुकनक बायोग्राफी पहर्नु । पह्रबेर स्कुलिक पुस्तकालयसे ढ्यार किताब सटहा माँगु । क्याम्पस पह्रबेर, गोचनसंग लाग्क डान्चे गजल लिख्ना कोसिस करुँ । म्वाँर लिखल गजल टनिक लैलाहा मेरिक बन्जाए । संघर्याहुकन सुनैना ट बन, सबजे रसफें लिहँठ ओ होहल्याइठँ । लेकिन सार्वजनिक हिसापसे सुनाइ नैबन ओहओर्से, ढिरढिर गजल लिख्ना बानि फें हट्गैल । पाछ क्याम्पस पहु्रइया लर्कनक भाइ सल्लाह अन्सार महिन एकठो खिस्सा लिख्ना जुम्मा डेल । केरनी कथा लिख्नु । जौन २०५७ साल थारु फिलिम बनल । ओकर पाछ २०६२ सालम आइल बहार, हमार बस्टी डुठो थारु फिलिम लिख्नु जौन थारु मोफसल जिल्लाम बजार लिह नैस्याकल ।

बुह्राइल पुरान मनैन कहावट हस, संगत अन्सार फें जाँगर लागठ । थारु पुस्ताक ढुरखम्भा सर्वाहारी, सुशिल, महेश, अशोक, धरकट्वा डाडु हुकनके बाट फें ओनाउँ । लिख्ना कामम सर्वाहारी, सुशिल डाडुहुक्र सड्ड गँरखोड्डी लगाँइ । घरम फें बाबा धार्मिक ग्रन्थ पहर्ना ओ लिखट डेखँु । यि सब माहोल लिख्ना हौस्याइल महि ।

२.गयर्वा बुडु खिस्सा संग्रह लगायत आउरफें पोस्टा निकर्ली, कैसिन कैसिन प्रतिक्रिया आइल ?
गयर्वा बुडु म्वाँर पहिल खिस्सा संग्रह हो । ओस्टके ठाँह्रा खिस्सा संग्रह डुसरा ओ थारु जोधा जीवनी संग्रह टिसरा पोस्टा अहो । ढ्यार जैसिन गयर्वा बुडु पह्रुइया मनै फोन कैख महा चोड्गर लागल कहँठ । अघट्यक् पुर्खन बोल्ना थारु बोली अन्सार स्याकटसम् निमांग शब्द खिस्साक संवादम ढारल बा । कुछ पाठक गोचन, डान्चे लैलाहा होगिल कि, आपन लर्कन किताब पह्र कैसिक कना हो, भिट्टरक खिस्सा पह्रबेर भर थारु गाँउ समास झल्झल्ह्यट डेखपरट, ढ्यार जसिन खिस्सा भुँइचेप्ठा, गरिब डुख्यारिनक खिस्सा मजासे बहल बा कठ । ढ्यार जसिन गोचन, म्वाँर नाँउ गयर्वा बुडु फें खर्का डेल ।

३.कथा लेखन बाहेक आउर कौन कौन विधाम कलम चलैटि आइल बटी ?
म्वाँर पेशागत कामक हिसापसे ट सामाजिक समस्या, चलल नैमजा रिटभाटक, छुवाछुट, विभेद, उप्पर ब्लग्स फें लिख्ठुँ । मै बालबच्चन लिरौसीसे फोटुहेर्क पह्रसेक्ना भारीनक किताब नेपाली भाषाम मीना र कछुवा फें लिख्नु जौन सामुदायिक विद्यालयक पुस्तकालयम भेटाइ सेक्साइ । कबुजबु थारु गीत फें लिख्ठुँ ।

४.अप्ने थारु भाषा साहित्यम कलम चलाक कैठो अपन जैसिन युवा साहित्यकार जर्मा रख्ली ? ओइने अझकाल का का कर्टी बटैं ?
जरमाइ ट अभिनसम नैसेकगैल । कुछ म्वाँर नेटवर्कम रहल भैया बाबुन भर सड्ड हौस्यइठुँ । गफछटाक उठल व्याला, कथाक विषयम लिख्ना सल्लाहभर हुइटी आइल बा ।

५.अब्बक अवस्थामे समाज परिवर्तन ओ थारु भाषा साहित्य विकासक लाग कैसिन मेरके साहित्य सृजना कैलेसे समाजमे परिवर्तन लाने सेक्जाइ ?
गाँउ समाजह बदल्ना एक्ठो हिरगर विधा साहित्य फें हो । जेकर सहायतासे समाजह फटिकसे हेर सेक्जाइठ । समाजम रहल हरमेरिक चालचलन, रिटभाँटक बचाइक लाग साहित्य लिख्ना जरुरी बा । रहल सवाल थारु बोली भाषा, साहित्यक, अभिन थारु साहित्य कोहोर बा कलसे फें हुइ, थारु साहित्यक फँट्वा अभिन ढ्यार पर्र्टी जमिन जस्ट बा, जहाँफें हरफार, कोड्रा चलाइ सेक्जाइ । थारु साहित्यह पन्ह्वाँडार बनैना, मलगर बनैना बहुट काम बाँकी बा । भर्खर थारु भाषाक लेखक झरफराइट, थारु मानक भाषाक विषयम ठोली बोली हुइ डटल् बा । थारु शब्दकोष, व्याकरण लिख्जाइ कलसे मानक भाषाक विषय एक कोन्वाँ लागी । ठाँउ, समय, परिवेश अन्सार साहित्य लिख्लसे मजाहुइ जस्ट कि टीकापुर घटनाह जोर्क अनलाइन साहित्य टीकापुर ट्रमा एक्ठो जिउगर उदाहरण हो । जे सरकारक छाटिम हजारांै मुक्का ठोक्ल बा ।

६.साहित्य लेखनक दौरानम कब्बु नैबिस्राइ सेक्ना यादगर पल कुछ बा ? ओ अगामी दिनम कौन कृतिके तयारीम बटी ?
बहुट बा, कट्रा सम्झना हो । खासकैख खिस्सा लिखबेर, कबुजबु खिस्सम पाठ लिहुइयन निब्बर डेखपर्ठ, ओइन्क अधिकार डिहाइ नैसेकल ब्याला मन छट्पटाइठ । महा सोग लागठ । एक्ठो खिस्सा द्वन्द्व पीडितक विषयम लिख्ना कोसिस करल रहुँ । ठर्वा बेपट्टा पारल जन्निक डुख ढ्यार लिख नैसेक्ल हुँ, सिपैहनसे करल दुव्र्यवहार समझक आँस झर्रझर्रह्यट चुहल । ड्वासर खिस्सा लिखबेर यि याड महिन खोब झकझोरट । यि साल, गर्यवा बुडुक खिस्सा संग्रह, ठाँह्रा, थारु जोधा आसेकल बा, पाठकहुक्रनसे मजा मजा आइल बा ।

८.समग्रम थारु भासक साहित्यक भविष्य कैसिन बा ?
थारु भाषा साहित्यक ढ्यार विधा अभिन क्वार (भर्जिन) बा । पहिलसे कुछ ढ्यार सुध्रल बा, आझकाल थारु भाषम पोस्टा लग्ढार निक्रटि बा, लौव गीत गजल, खिस्सा बट्कोहीम कलम चलुइया रसरस बहर्टि बाट टब्भु फें सोँचलहस भर नैहुइसेकल हो । संख्या बह्रलसे फें गुड्गर साहित्यम कमि बा ।

अब्ब ढ्यार गैह्रथारु लेखक थारु परिवेश, भेषभुषा, रहनसहन, लोक कला, संस्कृतिह साहित्य बनाक लिखल बाट । थारु लोक साहित्य खन्गर हुइलक ओर्से थारु पात्र, थारु परिवेशसे लिखल कथा, उपन्यास लग्ढार मदन पुरस्कारसे सम्मानित हुइल बा ।
अभिन फें थारु साहित्यम अध्ययन अनुसन्धान हुइ नैसेकल हो, यि खुला विश्वविद्यालय हुइलक ओर्से अइना साहित्य थारु परिवेश केन्द्रित हुइ सेक्ना ढ्यार सम्भावना बा ।

९.अब्बे बर्दियामे थारु भाषा साहित्यिक अवस्था कैसिन बा ? अपनेक गाउँ ठाउँमे साहित्य श्रृंखला हुइठ कि नाही ?
बर्दिया कलक साहित्यक फरगर ठाउँ हो । यहाँसे वरिष्ठ साहित्यकार जर्मल बाट । जस्टकि अधिवक्ता सन्तराम धकटुवा महा मैगर साहित्य लिख्ठ । उहाँके लिखल कथा मनह झक्झोर डिहठ । गरिब, बेसाहारा मनैन्क लाग वकालत करठ ।

ओस्टक सुशिल चौधरी साहित्यक ढ्यार विधाम कलम चलैठ । उहाँ नाटक लिख्नम महासिपार हुइट । उहाँसे लिखल नाटक, दहितान ढेंकी, हिट्वा, भुरभुरा रहर महा चट्कल बा । ओस्टक उहाँ कविता फें आगिक चिट्किन फाँकट, निबन्ध लिख्लम फें महाहौस्यार बाट । आझ उहाँ डक्टार बिर्वा करैटि बा, म्वाँर डिउँटनसे अर्जि बा कि हाली उहाँह चुम्मर कराए । आझकल, बर्दियासे सोम डेमनडौरा, बालिका चौधरी लगायत ठँर्यन कलम दौराए भिरल बाट ।

बर्दियम जंग्रार साहित्यिक बखेरी लग्ढार कार्यक्रम कर्टि आइल बा ओस्टक और फें साहित्य बगाल लागल डेखपरठ ।

१०.अप्ने बहुत लम्मा समयसे साहित्यमे कलम चलैटी आइल बटी । यी साहित्य कलक का हो बटा डि ना ?
साहित्यह ढ्यार मेर्से हेर सेक्जाइ, साहित्य आपन लोक कला, भाषा, संस्कृति, पहिरहन, रहनसहन, टरटिउहार, भ्वाजकाज, मर्निकर्नि, अघट्यक चलन रिटभाँट ओ ढ्यार चिजह फट्कारसे चिन्हैना विधा हो ।

साहित्यके सहारासे आपन मौलिक पहिचानह सम्डिट्ठ ह्यार सेक्जाइठ । ओत्रकेल नाहि, साहित्यम ढ्यार मेरिक चिज भेटाइ सेक्जाइठ, जस्टकी बिटल काल, आझके भोगाइ ओ अइना दिनह साहित्यक आँखसे झल्झल्ह्यट ह्यार सेक्जाइठ । कह खोज्लक साहित्य लिखित ओ मौखिक इतिहास हो जे लौव पुस्ताह डगर डेखैना लिरौसी बनाइठ ।

थारु साहित्य, अभिनसम लौव ठँर्यनभर लोभाइ नैसेक्ल हो, यि दुखक बाट हो । जौन मेरिक साहित्यम हल्कोरा उठ्ना रह, उह डुम्मारा मार नैसक्ल हो । राज्य फें यि बाटम ध्यान डेहल नैबिल्गठ । थारु आयोग, भाषा आयोग, थारु कल्याणकारिणी सभा लगायत थारुन्क हितकारी संस्था फें बेखबर बा । थारु साहित्यह फें हुर्चुलैना जरुरी बा जस्ट काँठी बरक लाग ठेँट्की खिडोर्ना जरुरी रहठ ।

११.जैटिजैटि इ पत्रिका मार्फत कुछ कहना बा कि ?
संसार भर ७ हजारसे फें ढ्यार बोली भाषा बेल्सठ । हर एक पाखम एक भाषा नामेट हुइटि जाइटा । ओहमार थारु बोली भाषा साहित्य बचैना अभियानम लागक् लाग हर जुझारु ठँर्या बठिन्यन अरजि करटँु । ओस्टक थारु बोली भाषा बचैना अभियानम परगा बह्रुइया अपने हमार जैसिन डरगर लेखक ओइन ढ्यार शुभकामना ओ सक्क्ुहुनके लेखनम बर्कट अइटि रह । धन्यबाद ।