‘जहाँ संघर्ष बा, वहाँ अवसर बा’

दांग जिल्ला घोराही उपमहानगरपलिका वडा नम्बर १७ गुलरिया गाउँके बाबा धर्म बहादुर चौधरी ओ डाइ पार्वती चौधरी कोखसे जल्मल चित्रकार आकृति चौधरी एक चित्रकारके रुपमे परिचित हुइल बटैं । छोट्टेसे चित्र बनैनामे रुची रहल हुँकार बनाइल मेरमेरिक चित्र बहुट ठाउँमे पुगल बा । बीएमे अध्ययन कर्टी रहल उहाँ अब्बे पर्हाइके संगसंगे चित्रकलामे हिरगरके लागल बटैं । हुँकार बनाइल स्क्रेचसे हुँकार मजा पहिचान बनटी बा । इहे क्रममे हुँकार सीप चित्रकलामे केन्द्रित होके सागर कुस्मीसे करल छोटमिठ बातचित यहाँ प्रस्तुत कैल बा ।

१.अप्ने चित्रकलामे कहियासे ओ कैसिक छिरली ?
चित्रकलाम मै छोटेसे बनाउँ । स्कूलम हुइना चित्रकला प्रतियोगिताम मै भाग फें लिउँ । कुछ चित्रकला पहिलेके समयम प्रकाशित हुइना गणतन्त्र पत्रिकाम फेन छापजाए । तर बीचम परहाइके व्यस्तताके कारण कलाओर ओत्र समय डेह नैसेक्नु । पाछे फेन डोसरे २०७५ सालसे फेनसे कलाहे प्राथमिकता डेटि बाटुँ ।

२.अप्नेक् बनाइल चित्र कहाँसम पुगल बा ?
चित्र भर मै सिसाकलमसे ओ डिजिटल कला फेन बनैठुँ अभिनसम । मोर बनाइल कला स्थानीय स्तरसमके कबिला हुकनके माग अनुसार टमान ठाउँम गैल बा । मै खास कैक माग अनुसार चित्र कोरठुँ ।

३.एकर सँगसँगे आउर का–का काममे व्यस्त बटि ?
मेर चित्रकला संग सम्बन्धि टाटू फेन हुइना हुइलेक ओरसे अझकलके समय ओे पुस्टा संग फेन सम्बन्धित हुइलक ओसरे टाटू फेन सिख्टि बटुँ । संगसंगे अझकल पार्लरके काम फेन करटि आइल बाटुँ । और अस्टही घरहीक काम कैक दिन बिटटा ।

४.चित्रकार हुइक लाग कट्रा संघर्ष करे परल ?
मै जेडासे युट्युबम हेरके सिख्ठुँ । मोर पहिल गुरु कलक युट्युब जो हो । युट्युबसे सिखल बात मै आपन शैलीम घरहिं बैठके, हेरके प्रयास करठुँ । नैबुझल बात आपनसे अग्रज चित्रकार डाडु हुकनसे संग सल्लाह लेठुँ । अइसिक अपन कलाहे निखरटि मै आघ बहर्टि जैटि बटुँ । संघर्ष हर ठाउँम कर परठ । जहाँ संघर्ष नैहो वहाँ कुछ नैहो । जहाँ संघर्ष बा वहाँ डाम बा ।

५.अपन सिखल सीपहे अपनसे पाछेक् पुस्टनहे कैसिक सिखाइ चहठी ?
सीप जैसिन हुइलेसेफें इहिहे हम्र सही तरिकासे प्रयोगम आन सेकपरठ । मै चित्रकलाके कौनो पेंm क्लास लेल नैहुइटुँ । ना कोइ घर आक सिखाइल हो । बस अपन घरहि अपनही मेहनत करठुँ । मोर रुचि, इच्छा इहे हुइलेक ओरसे इहिह मै कौन तरिकासे प्रयोगम आन सेकम कना उपाय खोजटी रठुँ । आपन कलसंग सम्बन्धित कला औरे जाने बहुट मजासे बनाइँट डेख्के मै फेन वहाँसम पुग सेकम कि कैह्क अपन मेहनतहे आघ लैजैटि बाटुँ । अभिन फेन सिख्टी बाटुँ ओ अभिन सिखटी जैम । कोइ सिख्ना चाही कलेसे मै अपन जानल कलासीप सिखैना तयार बाटुँ ।

६.पेशाले सौन्दर्यकर्मी हुइटी, मने कला क्षेत्रमे लग्नाके कारण ?
कला क्षेत्रम लग्नाके कारण भर चित्र बनैना काम आपनहे बहुट मन परठ । चित्रकला मोर रुचिके विषय जो हो । आपनहे जौन चिज आनन्द ओ खुसी मिलठ, ओहे चिज कर परठ कना महि लागठ ।

७.अप्ने साहित्य, फेन लिख्ठी का का विधामे कलम चलैठी ?
महिन साहित्य बहुट मन परठ । लकिन कलम चलाइ नैसेक्ल हुइटुँ । समय मिलि कलसे आब कुछ ना कुछ जरुर लिखम ।

८.अपन जीवनमे कब्बुनै बिसराइ सेक्ना यादगार पल बटा डी ना ?
यादगार पलके बात कहबेर, महिन ट सब पल यादगार जो लागठ । मनो एकठो भर मोर मनम याद अइटि रहठ, बाबाडाइक पहिल चित्र बनाके जब मै बाबाडाइनहे डेखैनु टब उ चित्र हेरके बाबाडाइनक मुहारम जौन मेरक खुसी रहिन, ओह खुसी मोर लाग एकदम यादगारके पल हो ।

९.कला कलक अपने कैसिक बुझ्ठी ? मनैंनहे कैसिक बुझाइ सेक्जाइ ?
चित्रकला अपनही एकठो अर्थ डेना ईस्वरके सुन्दर उपहार हो । सक्कुहुन ठन हरेक मेरके कला हुइ सेकठ । तर आपनम रहल कलाहे बाहेर आन सेक्ना ओहे जो महान काम हो ।

१०.ओरौनीमे इ पत्रिकामार्फत का सन्देश डेहे चाहटी ?
आपनहे कौनो फेन चिज सिक्ना या कर्ना बा कलसे उ चिजहे कब्बु फें डबाके जिन ढरबी । निरन्तर ओम्ह लागल रहि । एक ना एक दिन जरुर सफलता हाँठ लागि । धैर्य करि हर कामम सफल हुइसेक्जाइठ । मोर कला ओ बातहन यहाँसम पुगाडेलकम अपनेनक पत्रिका परिवारहे बहुट बहुट धन्यवाद ।