१३ बैशाख २०८१, बिहीबार
१३ बैशाख २०८१, बिहीबार
कथा
सपथके डिन
प्रधानमन्त्रीक सपथ खैना डिन रह । सपथ कार्यक्रमम पुग्नु ट अचम्म लागल । गन्नु भाई कटि बोल्कारल किउ महि । असिक हरेठुँ ट मै बैस्लक कुर्सिम फस्टलक मनैयाँ मुसुमुसु मुस्काइटह । चिन्हलअसफें निचिन्हलअसफें लागल । भक्वाइलअस ह्यारटहुँ ।
निचिन्ह्लि का महि ? मै राधाकृष्ण का ट ?
भुर्कैहेक ना ? आपन बाबक सङ्घर्या बटाक कनु ।
गुलरिया राधाकृष्ण चोक बाटजे । उह चोकक राधाकृष्ण का मै । खिटखिटसे हँस्टि कल ट झस्कबो कर्नु । मै एकघचि आकुर निबोल्नु ट फें ठप्ल ।
आम्हि निचिन्लि कि का ?
चिन्हुँ जे काजे निचिन्हँम । उह जबान मुक माटि बन्स्याकल मनैनसे भ्याँट कर, ब्वाल पारख्नु कैक भुँइएम ग्वारा निरह म्वाँर ।
आझ के प्रधानमन्त्री बन्टा भाई ? ना उत्सुक होक पुछ्ल ।
के बनि सर, रामलाल ।
टिकापुर आन्दोलन होक जेल परल रलह उह ?
हजुर ।
रामलाल डुल्हाअस सँपरक अइल । ढाका टोपी, दौरासुरुवाल, कोट ओ पार्टी सुज घाल्क । डुनु जानक आँखि जरजर जरजर हुँकहिन ह्यार लागल ।
ह्मारबेर कसिन रह । आप ट थारुफें प्रधानमन्त्री बन्ना हुइल । रामलालहन हेर्ने कहटलह राधाकृष्ण सर ।
रामलाल सपथ खैल । सिपाहीनके एक टुकुडि सम्मान गारट डेल । टब मै ओ राधाकृष्ण सर उठ्क जाइबेर शेखर दहित सरसे भ्याँट हुइल ।
जय गुर्बाबा शेखर सर कनु ट ।
ओख्खो जय गुर्बाबा, अप्नफें आइल बाटि गणेश भाइ ? पुछ्ल ।
शेखर सरके बाट घुमाइल निरनहुँ । म्वाँर लग्गु आक के हुइट कैक खुस्फुसाइ लग्ल राधाकृष्ण सर ।
थारु भाषक चर्चित पोस्टा गयर्वा बुडु, गयर्वा बुडुक ठाह्रा, थारु जोधा किताबक लेखक हुइट ।
थारु जोधा म ट म्वाँर बारेमफें बरन कैगिल बा काहुँ । ओत्रा कहबेर शेखर सर ओ राधाकृष्ण सर लग्गु हुइल ओ हाँठ मिलैल ।
हो सर अप्नक बारेम लिखुइया मैहे हुँ ।
सोच्नु यी बाट ट गिनिज बुक म लिख्जाइ पर्ना हो ।
गणेश वर्तमान
बर्दिया, हाल–काठमाडौ
