मुक्तक १

दिल कहठ टुहिन कजरा बनालिउँ ।
दिल भिट्टरके जैना डगरा बनालिउँ ।
टोहाँर नसालु हेराइ डेखके अज्कल,
मन कहठ आँखिक गहना बनालिउँ ।

मुक्तक २
टोहाँर मोर मैयाँके लावा संसार सजैना बा ।
हमार मैयाँके टागट इ संसारहे बटैना बा ।
दुनिया ज्या कलेसेफें दुःख नैमनहो प्यारा,
जिन्गी हमार हो आब संगेसंगे बिटैना बा ।

मुक्तक ३
टोहाँर मुहार बिना बिहानफें फिक्कल लागठ ।
एक वचन बिना मुस्कानफें फिक्कल लागठ ।
घनि अइठो घनि जइठो दिल भिटटरसे मोर,
खै काहे टोहाँर निसान फें फिक्कल लागठ ।

मुक्तक ४
जिए सिखटुँ, मैं जिन्गी जिए सिखटुँ ।
दुःखकष्ट आँसमे घोरके पिए सिखटुँ ।
संघर्ष कर्टी बाटुँ सफल हुइक लाग,
लिडरल मुटुहे सम्हाँरके सिए सिखटुँ ।

मुक्तक ५
बाबा टोहाँर हर सपना पुरा कैना बा ।
समृद्ध समाज बनाके आघे बर्हैना बा ।
टोहाँर सिखाइल हर अर्टी याद बा महि,
उ अर्टीहे पूरा कैके दुनियाँहे डेखैना बा ।

काजल थारु
बर्दिया