स्थापना दिवसके अवसरमे वृक्षारोपण कैगैल

एकपरगा
१८ जेष्ठ २०८०, बिहीबार
स्थापना दिवसके अवसरमे वृक्षारोपण कैगैल

स्थापना दिवसके अवसरमे वृक्षारोपण कैगैल

धनगढी, १८ जेठ । सामुदायिक वन उपभोक्ता महासंघ नेपाल सुदूरपश्चिम प्रदेश महासंघ अपन स्थापना दिवसके अवसरमे वृक्षारोपण कैले बा ।

महासंघ अपन २८ औं स्थापना दिवसके अवसरमे वृक्षारापण कैल हो । वृक्षारोपण धनगढी ७ स्थित सृजना महिला सामुदायिक वनमे कैगैल बा । जहाँ जाम, नीम, बेल, बकैन, लगायत टमान जातके बोटबिरुवा लगागैल बा ।

महासंघके स्थापना दिवसके शुभकामना डेटि प्रदेश महासंघके अध्यक्ष झुमा चौधरी ‘अनुपा’ कलैं, नेपालके बनुवाँ उजाड हुइटि गैल अवस्थामे सामुदायिक वन ढेर भुमिका निभैटी रहल बा । स्थानीयनके सक्रियसे स्थानीय सामुदायिक वन संरक्षण हुइटी गैल उहाँ बटैलैं ।

उहाँ कलैं, अब्बेक अवस्थामे महिला ओइने सामुदायकि वन संरक्षण ओ हेरचाहमे ढेर भुमिका रहल बा । महिला ओइने अपन घरके काम संगे सामुदायिक वन उपभोक्ता समुहसे वनके संरक्षण हुइटी गैल बा । अइना दिनमे हरेक सामुदायिक वनमे पर्यटकीय क्षेत्र बनाके पर्यटक ओइनहे अवलोकन कराइ पर्ना उहाँ बटैलैं । वनके दिगो व्यवस्थापन करटि हरित रोजगारी सृजना कैके आघे बर्हना बात बटैलैं । एकर लाग अइना दिनमे सामुदायिक वन उपभोक्ता महासंघ नेपाल सुदूरपश्चिम प्रदेश महासंघसे निरन्तर साथ सहयोग हुइ ।

वृक्षारोपण कार्यक्रममे धनगढी उपमहानगरपालिका वडा ७ नम्बरके अध्यक्ष मोती राना, सक्कु सामुदायिक वन एकआपसमे मिलके आघे बर्हना बटैैंलैं । उहाँ कलैं, सामुदायिक वनहे दिगो वन बनाइक लाग सबजाने सचेत ओ जागरुक होके लगलेसे सामुदायिक वनहे संरक्षण ओ संवद्धन करे सेकजाइ । हरेक नागरिक सामुदायिक वन जोगाइक लाग निस्वार्थ रुपमे लागे पर्ना सुझाव डेलैं ।

ओस्टके सव डिभिजन कैलालीके अधिकृत गोपीकृष्ण जोशी, वन अतिक्रमणहे रोके पर्ना सल्लाह डेलैं । उहाँ कलैं, अनियत्रित रुपमे बर्हटी गैल अतिक्रमणहे रोके सेक्लेसे किल सामुदायिक वन संरक्षण करे सेक्जाइ । ओकर लाग स्थानीय सामुदायिक वन उपभोक्ता स्वयम सचेत हुइ पर्ना बटैलैं ।

अस्टेके कार्यक्रममे पारिवारिक निजि वन संघ प्रदेशके अध्यक्ष गगन बहादुर सिंह, अब्बेक अवस्थामे स्थानीय सामुदायिक वनहे संरक्ष्ण करक लाग सामुदायिक वन उपभोक्ता महासंघसे सहकार्य कैके अइना दिनमे कार्यक्रम कैना बटैंलैं ।

सामुदायिक वन उपभोक्ता महासंघ नेपाल सुदूरपश्चिम प्रदेश महासंघके आयोजना ओ सृजना महिला सामुदायिक वन उपभोक्ता समुहके व्यवस्थापनसे हुइल कार्यक्रममे शुभकामना मन्तव्य सृजना सावके अध्यक्ष सरस्वती चन्द डेले रहिंट कलेसे कार्यक्रमहे सहजिकरण महासंघके प्रदेश सदस्य भुवन राज शर्मा कैले रहिंट ।

सृजना महिला सामुदायिक वन उपभोक्ता समुहके अंगनामे हुइल कार्यक्रममे टमान सामुदायिक वनके पदाधिकारी, वनप्रेमी ओ स्थानीय ओइनके सहभागी हुइल रहे ।

स्थापना दिवसके अवसरमे वृक्षारोपण कैगैल

एकपरगा