निन्द नैलग्ना भुख नैलग्ना गीत मन्के लागल

सागर कुस्मी
धनगढी । मानव जाटिन किल नाही, हरेक परानीनहे संगीत चाहठ । संगीत बिना जिए सेक्ना मनै इ संसारमे सायद कमे हुइहीँ ।

ओहेमारे हुइ धनगढी कैलालीसे सुलभ फिल्मस् प्रालि समय समयमे लावा लावा थारु म्युजिक भिडियो बजारमे छिट्कैटी बा । इहे जेठ १९ गते एक्ठो लावा भिडियो युट्युब मार्फत संसार भर छिटकैले बा ।

जोन भिडियो के बोल हो-
आउ सजना टुहिन दिल पुकारे, निन्द नैलग्ना भुख नैलग्ना, जन का करडेलो सजना ।।
ओ मोर सजनी टुहिन दिल पुकारे, निन्द नैलग्ना भुख नैलग्ना, जन का करडेलो सजनी ।।

इ गीत लिखके सुन्टी सोहावन ढुन भरुइया उमेश मुस्कान हुइटैं । उहाँ इ गीतमे सक्कुहुनके मन छुना मेरके मैगर ओ सैगर ढुन गुडगरके कसले बटैं । इहे गीतहे आउर चम्पन बनाइक अपन सोहावन रागसे रंगैले बटैं गायिका अन्नु चौधरी ओ गायक उमेश मुस्कान ।

भिडियोहे बारोमास हेर्टी मन लग्टी रहना अपन कला भरले बटैं चर्चित मोडेल समु चौधरी ओ जगत गुरु । इ डुनु हेरोहेरोनीक् चौंकस कला जिभरके हेरे सेक्जाइठ ।

दर्शक ओइनके मनहे खिचक भिडियोके डम्डार निर्देशन कैके हाँठ मिलैले बटैं निर्देशक आदर्श महतो कलेसे क्यामेरा भिंरके छाँयान्कन, सम्पादन करुइया हुइटैं दया शंकर चौधरी ।

इ भिडियो हेरक लाग युट्युबमे जाके शुलभ फिल्मस प्रालीके च्यानलसे मजासे हेरे सेक्जाइठ ।

इ कार्यक्रम धनगढीके थारु छात्रवासमे रहल बातचित घरमे हुइल रहे । कार्यक्रम गायक राजु चौधरी ‘राज’ कैले रहिंट । जहाँ टमान संगीतप्रेमी ओइनके सहभागीता हुइल रहे ।