बरघर गुरुवा पर्यटन प्रवद्र्धन सम्मेलन हुइल

सागर कुस्मी

धनगढी । कैलाली जिल्लाके कैलारी गाउँपालिकाके हसुलियामे बरघर गुरुवा पर्यटन प्रवद्र्धन सम्मेलन हुइल बा ।

उद्योग पर्यटन वन वातावरण मन्त्रालय प्रदेश पर्यटन कार्यक्रम कार्यान्वयन इकाईके आर्थिक सहयोगमे आदिवासी जनजाती पत्रकार महासंघ (फोनिज) सुदूरपश्चिम प्रदेशके आयोजनामे उ सम्मेलन हुइल रहे । सम्मेलनके प्रमुख अतिथि उद्योग पर्यटन वन तथा वातावरण मन्त्री रमेश धामी, फरक पहिचानके रुपमे रहल थारु समुदाय अपन पहिरनहे संरक्षण कैना बटैलैं । उहाँ कलैं, थारु समुदायके पहिचान बरघर, गुरुवा, परम्परागत पहिरन, भासा, संस्कृति हो । आब थारु समुदाय अपन परम्परागत पहिरन, थारु भासा ओ संस्कृति सम्वद्र्धन कैटि जैना बटैलैंै ।

थारु समुदायसे अपने ढेर सहयोग पैलक बाट बटोइटी अपनेफे प्रदेश सरकारमे बरघर, गुरुवा प्रथाहे लिपिबद्ध कैटी कानूनी मान्यता डेहुइना प्रतिवद्धता फेन जनैलैं ।

संिवधान सभा सदस्य तथा पूर्व प्रदेशसभा सदस्य विरमान चौधरी बरघर, गुरुवा प्रथाहे कानूनी मान्यता डेहुवाइक लाग संविधानके मुल कानूनमे समावेश कराइ पर्नामे जोर लगैना बटैलैं ।

कैलारी गाउँपालिकाके निवर्तमान अध्यक्ष लाजुराम चौधरी बरघर गुरुवा थारु समुदायके पहिचान रहल बटैलैं । उहाँ कलै, पहिलेक समयमे अस्पताल, स्वास्थ्य चौकी कुछफें नैरहे । लर्का जल्माइक लाग सोरहिनिया, गुरुवासे सहयोग लिहे परे ।
गाउँघरमे कुछ विवाद हुइलमे जनअदालतके अगुवा थारु समुदायमे रहल बरघरहुुक्रे समस्या सुल्झाइट । जोन अभिनफें मिलाजाइठ । बरघर लोग जानअजानमे डेवानी ओ फौजदारी मुद्दा मिलाइल कारण अपने जेल जैना तारेक बोके परल बटैलैं ।
उद्योग पर्यटन वन तथा वातावरण मन्त्रालय प्रदेश पर्यटन कार्यक्रम कार्यान्वयन इकाई धनगढीके प्रमुख कालीचरण चौधरी कैलाली कञ्चनपुरमे बसोबास करटी आइल थारु, रानाथारु समुदायके बरघर, गुरुवा, सोरहिनिया प्रथाहे प्रवद्र्धनके लाग सहयोग करल बटैलैं ।

ओस्टेके थारु कल्याणकारिणी सभा कैलालीके कार्यवाहक सभापति माधव चौधरी, कञ्चनपुरके सभापति सानु चौधरी, कैलारी गाउँपालिका वडा नम्बर १ के वडा अध्यक्ष धोजहरिपाल बोहरा, थारु विद्यार्थी समाजके जिल्ला अध्यक्ष आशिष चौधरी, भल्मन्सा जिल्ला संयोजक विलारु चौधरी, गुरुवा समितिके संयोजक रामप्रसाद चौधरीलगायतसे बरघर गुरुवा, सोरहिनीय प्रथाहे कानूनी मान्यता डेहे पर्ना बातमे जोरे डेले रहिंट ।

इ कार्यक्रममे भलमन्सा, गुरुवा, सोरहिनियँनके २५० जाने हाजिर हुइल रहिंट । सम्मेलनमे भलमन्सा, गुरुवा ओ सोरहिनियाँके बारेमे नाथुराम महतो, बलबहादुर डंगौरा ओ माधब थारु प्रशिक्षण डेले रहिंट । कार्यक्रम फोनिज सुदूरपश्चिम प्रदेशके अध्यक्ष रामलखन चौधरीके घरगोस्याइमे हुइल रहे । कार्यक्रमके संचालन महासंघके महासचिव उन्नती चौधरी स्वागत मन्तव्य सचिव दिनेश दहित डेले रहिंट ।