लघुकथा
डैजाहा
बिपटपुरान बरापुक् चारठो छावा रहिस् । सक्कु छावनके भोजबिहा करके पटुहिया फेन नानसेक्ले बा । बर्का, मझला ओ छोट्का छावा भर बुक्रहा घरेक डमडुवा रठंै । संझला छावक् लग भर धनी घरसे पटुहिया ननले रहठ । धनी छाइ बिहा कर्लक ओरसे संझलिक बहुट डैजाहा सामान टिबि, शोफा, डराज, पलङ्ग भाँराभर्टन, घेंटरु, छेग्रिक पठ्ररु. का हो का का नै । टमान चिज डेले रहिन । अपन जोरल चिज कोलकाहि किहु छुए नैडेन । बेल्सबे नैकरिन अपन डैजहा चिज ।

संझला छावा ओ पटुहिया घरेक काममे एक्को ध्याने नैडेना । ठोरचे नेतनके लग्घे रहलक ओरसे संझलि सरकारी अफिसमे काम पैले रठिन । पैंसा बहलाबुहुल रहना कि का घरेक किहिनोहे नै टेरना । उप्परसे जिम्डारिनके बेटी । खोटिया रिझापकाके खैना । अड्रिक अड्रिक कोल्हकाहि लगाम लगैना । लैहरिक डेहल डैजाहा छेग्रीनके लाग घाँसबुसा, चह्रैना भर घरेक मनै कर्ना । मुर्घीनियक आँरा टक खाइ नैडेना बरे सुम निसट रहिन संझलि । डैजाहामे डेहल सामानमे डोसरके हक नैलग्लक कारण कोइ फेन कुछ कहे नैसेक्ठंै । लैहरिक डेहल डैजाहा चिज छेग्रि ओ मुर्घि कोलकाहि कर्लक ओरसे बिपटपुरान बरापुक स्वर्ग जस्ते घरेम डरार फट्टी गैलिन । सिर्फ कोल्काहा कर्लक मेल हुइल घरेम् फेन डरार परगैलिन । बरापु बुझल इ टे डरार नाही डैजाहा हो हमार घर फुटुइया ।
प्रबिन बौखही
कैलारी ५ बैजपुर कैलाली