लघुकथा
डिँउटा
पैल्हपैल्ह हमार बाबा बुडुनके पालम् डस्या डेवारिम डिँउटा पुजबेर डेहुरार कोन्टिमसे लैके डवारिक आघ माटिक डियम् तेल बाटी बार्क आपनआपन रिट अन्सार भेंर्वा मुर्गी चिंगीनके रकट ओ छाँकी चरहाइँ । छाँकी नैरलसे लवांग पानी बनाक फेन चरहाइँ ।

जब पुजैया करुइया मै बन्नु, भेंर्वा मुर्गि चिंगीनके रकट छोर्क बजरहा पँचमेरा मिठाइ चरहाइ लग्नु । बोट्लक् छाँकीक बड्लम् साडा पानी ओ गैयक् दुध चरहाइ लग्नु । कुछ डिन रहिके एकलाग कपार बठैना, पेट किचोरेहस बठैना हुइल । ढिरढिरे कम्जोर हुइटी गैनु । शरीर सक्कु सुखाइ लागल । भात पानी फेन खैनास नैलागे लाग ।

बलटलके आछट पाटी कर्ल केसौका फुफा ट डिँउटा डाहल बटैल । पैल्ह संसारीम पुज्ल आपन डेउ डुर्गन आब बल्जब्री भक्टी बनैबे ट कहँु मनही अरे पैल्हक लहाइल घट्वा खाइल बानी कहँु छुटहिन केसौका कलैं । डिँउटा कलक पुर्खा जो हुइटैं । अट्रा कहटि एक हाँठम् पैँयक लट्ठी ओ एक हाँठ हिलैटी आपन डगर नम्ल केसौका फुफा ।
सन्देश दहित
जानकी २ खरग्वार कैलाली