कविता
बर्डिवा

फाटल फाटल कट्टु
उज्जर चिंठल बन्याँइ
पेउँडा लगाइल झुल्वा
आउर
मैलाइल मैलाइल टवल्या लैक
डिनभर टुप्पनहस् घामेम
पंस्ना पोंछ्टी, आँस गिरैटी
बर्डा चरुइया मनैयाँ
मै ‘बर्डिया’

मै मलिक्वक् ‘बर्डिया’
परलबेर बर्डाकिल चरहैना नाइ
सबकुछ करेक पर्ना
चाहे इ ‘जिउ’ चिक्कन रही चाहे नाइ
बिहानसे लैके सन्झ्यासम्
एक्ठो मसिनहस् डहल रहठुँ
महिन वरसभरमे एक्केचोट
मोर काम कर्लेक् बटाहा डैजाइठ
उ हो पाँच छे बोरा ‘धान’
डुइ चार बोरा ‘लाही’
आउर
एक डुइ बोरा ‘मस्री’

महिन कबु गयँर्वा बनाजाइठ
कबु छेग्रौहुवा भेंरौहुवा बनाजाइठ
कबु कमैयाँ बनाजाइठ,
टो कबु भैंसर्वा बनाजाइठ,
मुले, महिन
चाहे ज्या बनैलेसेफें
मै उहे कमैयाँ ‘बर्डिया’ हुइटुँ
जिहिनहे सबकोइ
‘बर्डिया’ कहिके चिन्ठैं

मै ‘बर्डिया’
भिन्हर्ही किच्रहे आँखी मिस्टी
ढुस्मुस्रारे कन्ढम् लोहिया हर
हाँठेम् चप्का
आउर एक गोरु लैके चल्ठँु
खेट्वा जोटे,
जुर बयाल सरसर सरसर बहटी रहठ
इ मन फें उ बयालसंगे जुर हुइटी रहठ
हो, अस्टेक मोर डिन गुजर्टी रहठ,
मलिक्वक् गुलामी कर्टी,
ओकर घरडुवार सवँर्टी,
इहाँ ‘बर्डिया’ बर्डिवा किल नैरहिके
मै एक्ठो लोहेक बनाइल
मनैयाँहस् बनल बटुँ
जिहिन हे ‘बर्डिया’ कहिके चिन्ठैं
मै उहे रोवर्टहस्
रातदिन काममे डँटल रहठुँ
ना टो मोर खैना ठेगान हो
ना टो सिहरा मर्ना ठेगान हो
ना सुट्ना ठेगान हो
ना टो उठ्ना ठेगान हो
बस्
काम से काममे डँटल रहठुँ

महिन एकठो ‘बर्डिया’ बनागैल बा
मोर उर्ना डैना छुरियासे काटगैल बा
छोटेसे मोर खुशिके हत्या करगैल बा
उहमारे,
खबरदार ‘मलिक्वा’
मै आब ‘बर्डिया’ जाग्गैल बटुँ
अपन अधिकार लेहेकलाग
सक्कु बर्डिवन एक मुठ्ठा बनाइटुँ
जिहिनहे टोर शाषण टुरे नाइ सेक्ने हो
हाँ मलिक्वा मै ‘बर्डिवा’
आब जाग्गैल बटुँ ।

अंकर अन्जान सहयात्री
जानकी ८ जबलपुर कैलाली