संस्मरण
बन्जरियक लस्गर याड
सक्कर्ही आइल फोन सागर दाजुक, भाइ बन्जरिया आइटी कि नाइ ? मै कनु खै दाजु का कर्ना हो ? कैसिक जैना हो ? मै टो अभिनसम बन्जरिया डेख्लेफे नाइ हुँ । सागर दाजु कनै अंकरसे नै टो रामचरणसे आइ । रामचरण सर टो अपन बाइकमे बसन्ती मिसहे जाइट रहंै । उहेमारे मै अंकर दाजुहे फोन कर्नु टो अंकर दाजु कनै ठिके बा भाइ हमार घर अइबी एत्तिरेसे जाब । मोर घर धर्मापुर ओ अंकर दाजुक घर जबलपुर हुइलेक कारणसे नेंगके जैना बात नाइ आइल । अंकर दाजुक घरफें नाइ डेख्ले रहुँ टबेमारे मै किशोर काकुहे कनु चोलो पठाइ महिन जबलपुर । किशोर काकु मोर बात काटे नाइ सेक्के अपन काम छोर्के अपन बाइकमे महिन जबलपुर पठाइ गिनै । जबलपुर पुग्ली टो अंकर दाजुसे भेंट हुइली, अंकर दाजु किशोर काकुहे कनै आब यहाँ तक पठाइ अइली कलेसे चली ना टो रोडसम पठाइ । किशोर काकु बात नाइ काटे सेक्के हमरहिन बाइकमे बैठाके रोडमे पुगैटी किल बस आगिल । टब हम्रे बसमे चहरगैली ओ किशोर काकु हमरहन पठाके चल्गिनै ।

सररर अमौरासे लम्की हुइटी अत्तरिया पुग्गिली । अत्तरियासे औरे बसमे चहरली टब पुग्ली कृष्णपुर । कृष्णपुर पुग्ली टो फोन लगैनै अंकर दाजु सागर दाजुक फोनेम, टबजाके भेट हुइली सागर दाजुसे । सागर दाजु शुभम अपसेट प्रेस उहंै रहंै । टबेमारे हमरहिन यिहंै बैठो कनै हम्रे बैठल रही टब्बही शुभम अपसेटके मलिक्वासे परिचय हुइल । परिचय कर्के सेक्ली टो मोहन सर ओ अनिता मिस अइनै । चिया पिली ओ बन्जरिया जैहिक्टन रहि टब्बही आइगिनै छाबिलाल कोपिला दाजु, नीम बहादुर थापा दाजु ओ राम अवतार सर । भेट हुइली टब एक्घची पर्से नेंग्गैली बन्जरिया ओर । बन्जरिया जैना आधा डगरिम पर्से हमरहिन मिलल सवारीकलग डल्लब । सागर दाजु हमार सवारीक् लग अगड्डेही डल्लब मगासेकल रहंै । डल्लबमे बैठके बहुत मजा लागल । बात बट्वैटी गैली, फोटोफें खिचैली, बन्जरिया पुग्ली टो अइनै बन्जरिया गाउँक मनै हमरहन स्वागत करे । हमरहन माला घलाके पानी पिवाके माँगर गाके बहुत मजासे स्वागत कर्नै ।

बन्जरिया गाउँक् भलमनसक् घर पुग्ली टो बिन्तीराम दाजु, भौजी ओ संगम सरसे भेट हुइल । भनमनसक् घर बेरी खैली । बेरी खाइबेर घोंघी, गेंगटा, अमारिक चट्नी, मच्छ्रीक टिना, मेरमेराइक टिना खैली । टबजाके पुग्नै रामचरण ओ बसन्ती मिस । रामचरण सर ओ बसन्ती मिस खाना खाके सेक्नै टो सबजाने बैठ्ली ओ अपन अपन परिचय डेली । ओस्टेके बन्जरिया गाउँक् मनैफें अपन अपन परिचय डेनै । परिचयात्मक कार्यक्रम बाड सुटगैली । मनो मोर, रामअवतार सर ओ रामचरण सरके निन नाइ परट रहे । सायद टो हम्रे दुई बजे निन्डाइल हुइबी । बिहान हुइल टो बन्जरिया गाउँक् बन्वाँ घुमे गैली । बन्वाँ घुमघाम करेबेर ओ बन्वँक कार्यालयमे बन्वँक बारेम सारा बात पटा पैली । बन्वाँसे आके छोट्की बन्जरियामे कलुवा खैली । कलुवा खाइबेर छोट्की बन्जरियाक मनै सुटही, घोंघी, मच्छ्री, गेंगटा, ढिक्री, मेरमेराइक टिना डेले रहं,ै मनके खैली । कलुवा खाके कार्यक्रम ओर गैली । कार्यक्रममे अपन अपन रचना सुनैली । मै साहित्यिक कार्यक्रममे पहिलबार गैलेक ओरसे ठोठोर जिउ ढकढक कर्टेहे । मनो जिउ ठामके अपन रचना सुनैनु ।

ओस्टेक औरे संघरियनफें अपन अपन साहित्यिक रचना सुनैनै । बन्जरियक साहित्यिक कार्यक्रममे सखिया नाचफें डेखे मिलल । सब्जे थारु पहिरन लगाके बन्जरिया गाउँक् सब मनै बरा सोहावन बिल्गाइट रहैं । साहित्यिक कार्यक्रममे मिझ्नीजुन मिझ्नी खैली । साहित्यिक कार्यक्रमके बाड रामचरण सर ओ बसन्ती मिस घरे चल्गिनै । हम्रे भर बन्जरिया रहिगैली । साँझ हुइल टो बेरी खैली । बेरी खाके छोट्की बन्जरियक मनैन भेंट करे गैली । भेंट कर्के आके हम्रे अंगनामे मै, अंकर दाजु, रामअवतार सर बात बट्वाइट रही, बात बट्वाके सेक्के सुट्गैली । बिहान हुइल टो कलुवा खैली, कलुवा खाके सेक्ली टो खोज्नी बोज्नी कार्यक्रम कर्ली । कार्यक्रममे फेसे अपन रचना सुनाइ मिलल टो महिन बहुत खुशी लागल । कार्यक्रम सेक्के खोब मजासे हमार बिदाइ कर्नै महिन बरा मजा लागल । बन्जरिया गाउँसे बिदाई लैके टब बस चहुरना रोडमे पुग्ली टो नीम बहादुर थापा दाजु राजीपुर चल्गैनै । मै, राम अवतार सर, सागर, अंकर, छाबिलाल दाजु, बिन्तीराम दाजु भौजी महाकाली (दोदोधारा) पुल हेरे गैली । पुल हेर्ली फोटो खिचैली उहाँसे आइबेर गंगा दाजुसे भेट हुइल । रामअवतार सरके एफएममे काम हुइलेक कारणसे साँझीके चल्गिनै बसमे चहँुरके घरे । मै, अंकर, सागर, छाबिलाल दाजु कन्चनपुरिक एक्ठो गाउँमे रात रली । टबजाके बिहान हुइल टो बसमे चहुँर्ली, सागर दाजु गुलरियामे उटरगिनै । हम्रे तीनजे किल रहिगिली । कैलालीक लम्की पुग्ली टो छाबिलाल दाजुक घर दांगके बसमे चल्गिनै घरे । हम्रे अंकर दाजुसे लम्की उटरगैली । लम्कीसे टीकापुर जैना बसमे बैठ्ली, अंकर दाजु अपन घर जैना डगर अमौंरा ओ मै अपन घर जैना डगर पठरहियामे उटरगिनु ओ घरे पुग्नु ।
बलराम चौधरी
जानकी गाउँपालिका १ धर्मापुर कैलाली