फ्रेन रेकवेस्ट

शान्ती चौधरी
१२ श्रावण २०७८, मंगलवार
फ्रेन रेकवेस्ट

संस्मरण
फ्रेन रेकवेस्ट

सक्कु जहन पटा बटिन फ्रेन रेकवेस्ट कलक का हो । काहे की सक्कु मनै आझके २१ औं शताब्दीमे आके फेसबुक चलइया केनै हुइ । लकडाउनके समय रहे । सक्कुजे अपन अपन घरे चलगैल रहैं । सक्कु स्कुल, कलेज आउर कार्यलयमे ताला लागगैल् । सक्कुजे अपन अपन घरमे रहैं । कुछ काम करुँ कलेसे कुछटे रहे नै । अधिकतम मनै सोसल मिडियामे ज्याडा जाइ लगनै । कोइ वाटसप, कोइ इस्तग्राम, कोइ ट्वीटर टे कोइ फेसबुकमे ज्याडा टाइम बिटाइ लगनै ।

सक्कु मनैनके जैसिन एकदिन एकठो लौंडी फेसबुकमे रेकवेस्ट एकसेप्तफें हुइलिन, आउर कुछ मनैनसे बातफें होए । कुछ दिन बाड एकसेप्ट होगैल् । डुनु जहनके बात कैना सुरु होगैलिन् । बात करटी करटी एकठो बात पटा चलल् । लौंडी टे अउरे डेसके रहिन् । लौडक् ठन कौनो विकल्प नैरहिन टे उ लौंडीसे बात करे लगलैं । लौंडी हुुकिन काहे बात कैना मन परिन कि हुँकान भरखर ब्रेकप हुइल रहिन् । उ लौंडाहे भुलक लाग महिनसे बात करिन ।

अस्टेक समय बिट्टीगैल । हमरे घन्टौंसम समय बिटाइ लगली । एकठो समय असिन आइल बिना बात करले हमरे रहे नैसेकी । हमार विचमे संघरीया कसिक मैयाँमे बडलगैल पटै नैचलल् । ओस्टेक हमार बात रोज हुइ लागल् । रोज मन भर बात होए । हुँकिनसे बात करट करट एकठो बात पटा चलल् । हुकिन कथा हुइल, कहानी सुन्ना मन परिन् । टे मै खोज खोजके कबु कथा टे कबु कहानी लेके आउँ । बात करटी करटी लकडाउनफें ओरागैल् । आब सोंचे लगली का कैना हो कसिक कैना हो । काहे की हमार विच ओसिक मैयाँ बाझल रहे कि हमरे ब्रेकपके बारेम नैसाेंचली । असिन नै रहे की हमार विच झगरा नैहोए कना, मने कुछ बेरमे डुनु जे फेन बात कैके मिलजाइ ।

हमार डुनु जहन अपन अपन जिन्गिमे कुछ बन्ना रहे । डुनु जहनके सल्लाह हुइल डुइ साल बाड मिलप । इ कहक लाग टे बहुट सजिल रहे मने कैना ओट्रै कठिन रहे । बात टे होए मने पहिलके जस्ते नाही, एक डुइ दिन बाड होए । समय अस्टक बिट्टीगैल । लौंडी अपन पर्हाइके संगे काम करिन । हुँकान काम आउर पर्हाइके कारन महिन समय नैडेहे सेके लगलिन् । उ महिन समय नैडेहेसेके लगलिन टे महिन नैमजा लागे लागल ् । काहे कि रात दिन बात कैना मनै महिन टे कठिन हुइ लागल रहे । मै बहुट ठाउँमे काम खोजनु मने काम नैमिलल् । अस्टेक हुँकान आउर मोर सम्बन्ध ढिरेढिरे बिगरे लागल् । आब जबफें बात हुइट टे झगरा किल हुइट् । डोसर बिहान पटा चलल् उ टे औरे भटार लेके ताप कस्डेलिन् ।
शान्ती चौधरी

फ्रेन रेकवेस्ट

शान्ती चौधरी