कविता
अच्छर–स्तम्भ

हम्रे मनभरके
आरु फुलल् सपना बिछैटी
समय किचुलके, समय नप्टी बटी
काँटा सवाँरके सुगम यात्राके संकल्पमे
सिर्जनाके फूला
इन्दे्रणी–सपनक् बौनी उप्पर
ठर्हियाके अच्छर‘स्तम्भ’ ठह्र्यौटी बटी ।

हम्रे, अन्ढार चिंठके, ओज्रार खोजटी
ओहोंर गपसे ओज्रार लिलके
अन्ढार साम्राज्य कैटी बा
ओ नैतिकता माटिमे खिस्मोरके
अप्ने खोंखुर बन्टि बा
यहोंर
इतिहास नोंछके कुछ करिया हाँठ
वर्तमान उप्पर करिया पोट्टी
खिट्रा हाँसी हँस्टी बटाँ
सपनक् भिट्टर अज्गर साँप पालके
बिष–भ्रूण हुर्कैटी बटाँ
ओ टिर्छी इसारा कर्टी
समाजहे ‘ब्ल्याक–होल’मे ढकेल्टी बटाँ ।

हम्रे, मौटसे जिट्ना, समयसे युद्ध लर्टी बटी
मुले, कब्बो मौटसे जिटे नैसेक्ना हम्रे
समयक उप्पर रीस ओ प्रतिशोध कैटी
बम मर्ठी, क्षेप्यास्त्र सोझर्ठी,
अन्त्यमे समयके टेक्नी जब टुटठ्
हम्रे मौटके पाउँमे गिर्ठी ।

सपनक् फुलवारीमे
जगमग–जगमग फुलल् फूलाहे
जब रिसोटके किचुल्ठाँ
अपवित्र पौलीन
स्वाभिमान निरीह हुके हेर्टि रहठ्
यहोंर आँशके टलुवामे डुबके
उत्पीडित जीवन ओ कुहिरासे उट्मुटाके
जिटी बा वर्तमान
डँडुर घाम खोज्टी ।

शिशिर खल्हाके, बसन्त उचियाइठ्,
जब उचियाइठ् उ
यहोंर फूला हाँसठ्
पून्वाँसी मुस्कुराइठ्
ओ हिर्डाक घुर्घुटिक भिट्टरसे मन फेन खुसाइठ्
असिके, उठठ्
सिर्जनाके अच्छर–‘स्तम्भ’ ।

छविलाल कोपिला
लमही ६ मजगाँवाँ डेउखर दांग