मै टीकापुर रोइटुँ

बलराम चौधरी
९ भाद्र २०७८, बुधबार
मै टीकापुर रोइटुँ

कविता
मै टीकापुर रोइटुँ

अपन पहिचानके लग
अपन अधिकारके लग
लर्टि रहल बेला
मोर निर्डोस छावाहे
दोसी हो कहिके
जेलमे ठुन्ले बटो सरकार
छोट जाट ठारु हुइटंै कहिके
हम्रिहिन हेप्ले बटो सरकार

ना हमारठेँ बन्ढुक रहे
ना हमारठँे बम बारुड रहे
रहे टो सिर्फ घरेलु हठ्यार रहे
भाला ओ बन्चेरी रहे
हमार भाला ओ बन्चेरी मन्से
ना टो गोली निक्रट
न टो बम बारुड निक्रट
टबुनफे टुँ गोलीसे
टमान मनैन मर्लो कहिके
झुठा आरोप काहे लगैठो सरकार
यीहे बाट साँझ बिहान सोंच्टी
मै टीकापुर रोइटुँ

टुँ टो सरकार
अट्नासम हम्रिहिन हेप्लो कि
ठारुनके भासा
भासा नाइ हुइटिन
ठारु नेपाली नाइ हुइटंै
ठारुनके पहिचान नाइ हुइटिन
मनो टुँ गलट सोंच्लो सरकार
हमार अपने ठारु भासा सँस्कृति बा
चालचलन रिटिरिवाज बा
यहाँटक अपने लवाइ खवाइ बा
टुँ ठारु जाटिन नेपाली नाइ सोंच्लो
यिहे कारणसे टो
मै टीकापुर रोइटुँ

जब हम्रे
सान्तिपुर्ण आन्डोलन
कर्ना सोंच्ली टो
आन्डोलन करे नाइडेलो
ठारुनके बाट धरे नाइडेलो
औरटो उल्टे ठारु जातिनपर
झुठा आरोप लगैलो
आँखिर टुँ ठारु जाटिनभर
अट्ना जेडा हेल्हा काहे कर्ठो सरकार
हम्रेफें टो नेपाली हुइटी
हमारफें टो हक अधिकार बा
मनो टुँ हमार बाट अभिनसम
नाइ ओनैलो उहेमारे
मै टीकापुर रोइटुँ

निर्डोस मनैन सजाय भोगैन
गल्ती करल मनैन सही बटैना
यी कैसिन कानुन हो
जहाँ सही औ गलट
छुट्याइ नाइ सेक्ना
डोसीन जेलमे करयाइ नाइ सेक्ना
टुँ टो सरकार
आँन्ढार हुइगैल बटो
ठारु जाटिन नाइ हुइना नाइ हुइना
आरोपकिल लगैले बटो
रंगीबिरंगी सोहावन लग्न टीकापुर
अझकल चारुओर भयाँवन लागठ
उहेमारे
हररोज तरप तरपके
मै टीकापुर रोइटुँ

बलराम चौधरी
जानकी १ धर्मापुर, कैलाली

मै टीकापुर रोइटुँ

बलराम चौधरी