कैलारी उद्योग वाणिज्य संघके टिसरा वार्षिक साधारणसभा निप्टल

हसुलिया, ३० सावन । कैलारी उद्योग वाणिज्य संघके टिसरा वार्षिक साधारणसभा मंगरके रोज हसुलियामे निप्टल बा ।

कैलारी गाउँपालिकाके अध्यक्ष राजसमझ चौधरीके वडका पहुनामे हुइल कार्यक्रममे उहाँ कैलारीके विकासके अपनेहुक्रे प्रतिवद्ध रहल बटैलैं । उद्योग वाणिज्य संघसे बुझाइल सात बुँदें ज्ञापनपत्र बुझटी उहाँ पालिकासे पुरा करे सेक्ना माग प्राथमिकताके आधारमे पुरा कैटी जैना बटैलैं ।

संघसे बुझाइल मागपत्रमे सक्कु कैलारीके विकासके लाग हो,’ गाउँपालिका अध्यक्ष कहलैं, ‘यिहे पुरा करे सेक्ना माग स्थानीय सरकारसे पुरा करी । प्रदेश ओ संघसे हुइना मागके लाग हम्रे पहल करब ।’

उहाँ कहलैं, स्थानीय सरकार अपन क्षमता भ्याइना माग पुरा करेक लाग तत्पर बटी । यहाँसे पुरा नइहुइना माग रिपोट तयार पारके प्रदेश ओ केन्द्रमे सिफारिस कैजाइ ।

कैलारी उद्योग बाणिज्य संघसे उठाइल छोटी भन्सारके माग केन्द्रमे पहल करटी रहल गाउँपालिका अध्यक्ष बटैलैं । उहाँ कहलैं, छोटी भन्सार हुइट कलेसे यहाँफे राजश्वफे संकलन हुइट । व्यापार व्यवसाय बह्रठ । मने छोटी भन्सार स्थापना केन्द्र सरकारसे पुरा करे पर्ना हो । हम्रे केन्द्रमे पहल करटी बटी ।

सशस्त्र द्वन्दकालमे विस्थापित हुइल छोटी भन्सारके बाट केन्द्रमे उठटी रहल उहाँ जानकारी करैलैं । कैलारीके विकास लाग केन्द्रमे डेलिगेशन जाके सम्बन्धित मन्त्रालयमे पहल कैना उहाँ आग्रह करलैं ।

कैलारीमे विद्युत महशुल काउण्टर नैरहे । अब्बे महशुल काउण्टरफे उदघाटन हुइल बटैलैं । यहाँ किसानहुक्रे मारमे परल बटैं । मलखादके लाग प्रदेश सरकार ओ केन्द्रसे पहल हुइटी रहल उहाँ बटैलैं । विद्यालयमे बालालिकाहुकनहे डेना खाजाफे स्थानीयस्तरमे उत्पादन हुइना खाद्य बस्तुहे प्रथामिकता डेना उहाँ बटैलैं ।

कार्यक्रम विशिष्ट पहुना कैलारी गाउँपालिका उपाध्यक्ष भगवतीकुमारी चौधरी, प्रमुख प्रशासकीय अधिकृत विरबहादुर ऐर, राप्रपाके जिल्ला अध्यक्ष होमबहादुर गुरुङ, विओपी इन्चार्ज दिनेश खडका, नेपाली काँग्रेसके जिल्ला उपसभापति खेमराज डगौरा, एमालेके केन्द्रीय सल्लाकार होरीलाल चौधरी, नेकपा माओवादी केन्द्रके कैलारी अध्यक्ष बतासु चौधरी, राप्रपाके कैलारी उपाध्यक्ष पिङगला थारु, नागरिक उन्मुक्ती पार्टीके प्रदेश सदस्य भीष्म चौधरीके उपस्थिति रहे ।

ओस्टेक करके वडा नम्बर १ के अध्यक्ष ध्वजहरिपाल बोहरा, वडा नम्बर २ के वडा अध्यक्ष विकास चौधरी, वडा नम्बर ३ के वडाअध्यक्ष सन्तराम चौधरी, वडा नम्बर ४ के वडा अध्यक्ष ठागुराम चौधरी, वडा नम्बर ७ के वडा अध्यक्ष दिपेन्द्रबहादुर बमलगायत टमान संघ संस्थाके प्रतिनिधि, भल्मन्सा, व्यवसायी, बुद्धिजिवीहुकनफे उपस्थिति रहे ।

कार्यक्रममे आर्थिक २०७९÷८० के १ लाख ७५ हजार ५९० रुप्याके आय व्यय प्रस्तुत कैगिल बा ।
कैलारी उद्योग वाणिज्य संघके अध्यक्ष नेपालु चौधरीके अध्यक्षतामे हुइल कार्यक्रमके संचालन सचिव कासीराम चौधरी करले रहिंट ।