गलचुम्मा

संगम चौधरी
३१ भाद्र २०७८, बिहीबार
गलचुम्मा

कथा
गलचुम्मा

अपन मनके बाट असिक सुरु करुँ । काहाँसे सुरु करुँ अपन मनके बाट खोब सोंचु । कसिक सुनाउँ । जब मै उ डिन सम्झठु मोर आँखिमसे आँस गिरे लागठ । ओहे बाट मोर मनेम उकुसमुकुस हुइठ । मै अपन मनके बाट किहिहे सुनाउँ, हल्लुक मन हुइ कठुँ । हाँ आझ मै ओहे मनके बाट लिखे जाइटुँ । मैयाँ कना सबके जिन्गिम नैहोके नैहुइना चिज हो ।

मै फें अपन डाइ बाबाके मैयँम् बहरटि गइनु । छोटेसे महिन डाइ बाबा बहुट मैयाँ करिंट । डाइ बाबा मोर कौनो चिजके कमि नैकरलैं । महि खुसि करैना डाइ बाबक् चाहाना रहिन । सब चिजमे खुसि करैना डाइ बाबनके चाहाना रहिन । मै अपन डाइ बाबक् मैयँम् बर्हटि गैनु । स्कुलिम फेन संघरियनके मैयँम् रमाइ लग्नु संघियनसे घुम्ना नेंगना मजा लागे । संघरियनसे बाट करु टे आउर मजा लागे । खुसि लागे । असिन लागे कब स्कुल जैना हुइटा । हम्रे बहुट जे संघरियन स्कुल जाइ, रमैटि हँस्टि खेल्टि । हर बिहानके अस्रामे रहुँ । कब संघरियन अइहि ओ स्कुल जाब । संघरियन संग भेटघाट हुइलेसे मिठमिठ बाट बटवइना बरा मजा लागे ।

डिन अस्टके बिट्टि गइल । मै फें बर्हटि गैनु । इहे समयम मोर मनमे एकठो लवन्डा बैठ सेकल रहे । खै काकरे उ लवन्डाके चालचलन महि बहुट मजा लागे । उ लवन्डाके बोली वचन महि बहुट मिठ लागे । जब उहि नैडेखुँ टे मजा नैलागे । डेखनास लागे । बोल्नास लागे । कबुकाल्ह स्कुल नैअइलेसे काहे नैआइल हुइ जसिन लागे । अउरे डिन आए टे मै पुछडारुँ । काल्ह काहे स्कुल नैअइलो ? टप लवन्डा कहे घरे काम पर्गैल रहे । टबे आइ नैसेक्नु । डिनडिने हमार सम्बन्ढ गार्ह हुइटि गइल । बेलुक लासा चप्के हस । लवन्डा फेन कहे मैफें टुहिन नैडेख्ठँु टे सुनसान लागठ । जब टुँ स्कुल नैअइठो उ बेलाफेन महिन यी स्कुल सुनसान लागठ । मै टोहाँर याड करठुँ । टुिहन डेख्नास लागठ । टुहिनसे बोल्नास लागठ कहे । हम्रे एक डोसरके मैयँम् रमैटि गैलि ।

मने डिनडिने ढिरेढिरे आकाश महिसे डुर हुइ लग्लंै । जब अकाशसे भेंट नैहुइ लागल टे मै फोन करुँ । आकाश बाहाना बनाइँट् । मै यहाँ गैल रहुँ, मै उहाँ गैल रहुँ कैह्के । फोन लगैलेसे फोन नैउठे । मै पुछुँ फोन काहे नैउठठ टोहाँर कहुँ टे, मोबाइल साइलेनमे रहे । मै व्यस्त रहुँ । मै कामेम रहुँ । मोबाइल अन्टे ढैल रहे । टबे फोन नैउठल कैह्के बाहाना बनाइँट् । म्यासेज रिप्लाइ नैहोए टे मै पुछुँ ना फोन, ना म्यासेज काहे ? आकाशके जवाफ आए कामके बेस्टटासे । आकाश अनेक बाहानासे महिसे डुर हुइटि गइलंै । महिसे बाटचिटफें नैकरना । फोन सुइच अफ कैके ढारडेना । अचनक कबुकाल्ह फोन लगलेसे बेस्ट कराडेना ।

मै आकाशसे बहुट बाट कर्ना कोसिस करुँ । मने हुँकारमे फोन नैलागे । हुँकार संघरियकमे करुँ टे संघरियाफें नैउठैना । आखिर काहे आकाश । महिसे डुर हुइटहिंट जाने नैसेक्नु । आखिर का डोस रहे मोर । का बिगार डेले रहुँ मै । काहे महिसे डुर ? जबकि मै आकाशहे सँच्चा मैयाँ करनु । सारा जिन्गि सौंपले रहुँ । सबकुछ मने अकाश काहे महिसे डुर हुइटहिंट । महिन कुछ पटा नैरहे । मै कारण जन्ना चहनु । मने पटा लगाइ नैसेक्नु । आकाश महिसे केबल डुर हुइना चहलंै । पाछे महिन पटा चलल कि आकाश टे केबल महिसे मैयँक् नाटक करले रहिंट केबल स्वार्ठके लाग ।

मनैनके मनफेन कसिन । जाने नैसेकजाइठ । कट्रा छल कपट । मनैनके हृडय बुझे नैसेक्ना । मनैनके मन पल भरमे बडल जैठिन । मैयँक् एकठो डेखौटि नाटक करठंै । जस्टेक कन्ठुठ्रा रंग बडल्ठैं ओस्टके मैयँक रंग बडलठैं । आकाशहे सँच्चा मैयाँ करुँ मने अकाश महिसे डुर हुइना चहलैं । महिसे अलग हुइना चहलैं । कोन सत्रु हो हमार मैयँक् । बिच्चेम काँटा बेंराडेहल । महिन पटा नैरहे । मैयँम् फेन स्वार्ठ रहठ कैह्के । अपन स्वार्ठ पूरा करकलाग फेन मैयाँ करठैं कना । आप टे महि कोइ मैयँक सब्ड निकारठ कलेसे उहे स्वार्ठिके याड आजाइठ । जे मोर जिन्गिसे खेलवार करल ।

बहुट जे अइठैं महिसे मैयँक् प्रस्ताव ढरुइया । मोर रुपके प्रशंसा करुइया । मने महि नक्कलि लागठ । के सँच्चा मैयाँ करठ । के झुँठा । महिन बिस्वास नैलागठ । हाँ के डेखल बा मोर मनके पिर । बाहेर हाँसठ सबकोइ डेखठ । मने मोर मन जरट कोइ फेन नैडेखठ । जब अपन मनै ढोखा डेठैं कलेसे पराइके टे का भरोसा । गलचुम्मक् का फाइडा । ओराइल ।
संगम चौधरी

गलचुम्मा

संगम चौधरी