कथा
छट्पटावन
चार पाँच दिन होस्याकल । टिभी रातिक २ बजेसम् जागल पलि रहठ् । मै जबसम् चहठुँ टबसम यी म्वाँर साथ डेटि रहठ् । का करि बिचारा, वाकर छर्की ट म्वाँरठे बा । ज्या करैबो उह ट करुइयाहो काहुँ ।

जन्नी बिनाक रात सुनसान । निंडक ट मतलव निहुइटिस् । ना ट खैना लागठ् ना ट सुट्ना । घरम चिया निपिलक फें ध्यार दिन होस्याकल् । हुँकाहार हाँठक चिया अइलेसे पिजाए । आझकाल्ह छट्पटैटि दिन ओ रात कटठ् ।

गैल रातठेसे अभिनसम् जन्नीक मोबाइल फोन स्वीच अफ का स्वीच अफ कहटि बा । मोबाइल, माफ गर्नुहोला बाहेक और कबे निकरठों ।

जन्नी बाहेर गैल ब्याला कम्टिम फें दिनिक आठ नौ चो फोन कैडर्ठुं । एसएमएस कबु मुक्तक ट कबु गजल । कबु का काम कर्टि बाटुँ, वाकर जानकारी ट कबु हुकाँहार हालखबर ओ कामक जानकारी लेठँु । मने आझ उ सब कुछ निहो । म्वाँर मन पुरा छटपटाक रहिगैल बा । कैयौठो सन्देश पठासेक्नु । डेलिभरी स्ट्याटस डेखाइट निहो । जवाफ ट डुरिक बात हो । फोनम डायल कर्लक सैचो सेफें ढ्यार होस्याकल । डिमाग खराब । फेन कर्लक सैचो सेफे ढ्यार होस्याकल । डिमाग खराब यार । मै हुँकाहार उप्पर आपनसे ज्याडा बिश्वास कर्ठुं ।

जाट्से मै कबुकाल्ह ट बरा अजिब लागठ् । का कबुकाल्ह असिक मन छट्पटाइठ् कबुकाल्ह आपन परफें झ्वाँक लागहस् करठ् । का जे मै असिक कर्ठु ? महि भित्रभित्र आपनपर रिस उठ भिरठ् । दिनभर अफिसक काम फें मन लगाक कर्नास् निलागठ् । संघर्यन कैयैचो पुछसेक्ल,का जे आझ चौकस मन्गर निडेखाइठुइटो ? कुछ नि हुइल हो कैह्के छटपटि डबाडिउँ ।

बरा भिट्टरसम कहाँ कहाँ पुग्ठुँ, कुछ ठेगान निचलठ् । मन अहरीक ना ठहरीक डगुर्टि रहठ् । मनमन फेरसे सोच्ठुँ, का जे उ असिक कर्ठि ? अरे यार दिनभरीम कमसेकम एकचोट फोन करना चाही । एकठो एसएमएस पठाडेलसे फें ट हो जैने रह जे । कमसेकम मोबाइल फोन ट ह्यारक चाही । का जे असिक कर्ठि यार जन्नी ? मन मन मुरमुरैटि रनु ।

हँुकाहार तालिम अट्रा व्यस्त रना तालिम फे ट निहुइटिन् । ढक्या, गाेंरि, कटौटि, मुढा तालिम । तालिम डेहुइया औरजे बाट । उ ट खाली वाकर व्यवस्थापन कर्ना किल ट हुइटिन । उहिका का व्यस्त कना हो । तालिम का कसिन हुइटा, केहँकक् समस्या बा ? आवश्यकता का बा ? उहे हेर्ना ओ पुगैना ट हुइटिन् । ओट्रा रहलम फे खाली २ मिनेट फें फोन कर निसेक्ना । डिमाग खराब होजाइठ् यार । मै उकुसमुकुस कर्टि रठुँ ।

कबुकाल्ह ट लागठ् म्वाँर जन्नी मोबाइल का जे बोक्ठि । मोबाइल नाउँक का काम । २१ औँ शताब्दीक बात बट्वा जाइठ् । मने, म्वार जन्नी यी मामलाम बरा क्लासिक सोंचम पलि रठि । पाँच छे ठो म्यासेज पठैबो ट वाकर रिप्लाइ बल्लटल्ल एक्कठो आइठ । उ फें जम्मा आधा लाइन या ट दुइ अक्षर किल । का बटैना हो यार । हँुकहिन मै कैयौचो कैह्सेक्नु कि महि कम्तीम चार लाइनसे ढ्यार एसएमएस लिख हो । फेरसे चिमचाम पलि रहो । खिसिक्क हाँस डिहि, मन डबैल पलिरहो । यिहिसे एकदिन आघ फोन हुइल रह । कली, एकको फ्र्सद निहो हेरो । अट्रा ब्यस्त बाटुँ कि का कना हो ?

महि झवाँक लागल् । फोन ढरो कैह्के काट्डेनु । का कर्ना हो ट यार । अट्््रा दिल लगाक मैगरसे हालचाल पुछबो ट एकलाग असिक कठि मैगरसे हालचाल पुछबो ट एकलाग असिक कठि । असिन जवाफ । असिक कह परठ् एकर लाग यार । कमसेकम स्वाँचक् ट चाही फोन कर्लक कट्रा हुइल कना ठिक बा ना, मनैयाँ कोन कामक लाग गैलकहो । ओम्न ट मन लगाक करक चाही । दिलहँसे लागक काम सफल पारो । आपन छुट्ट छाप छोरो । ताकि और मनै कहँट ओहो कट्रा मजा काम करल कैह्के । आपन नाँउ रोशन करो । टर यी सब काम करबेर ठर्वा, लर्कापर्का फे भुलाडर्ना ट ? बट्वाइक लाग २ मिनेट समय निकार निसेक्जाइठ् । बराबरा तालिम, गोष्ठी, बैठकम रहल ब्याला ट घरक फोन उठाजाइठ् । २ मिनेट बट्वाक बाइ कैजाइठ । ट गाँउक ढक्या तालिम का चोह्र्याडी । गुस्सा निलागि यार ।

लेउ जानोकि दिन्क फोन कर्ना माका निजुरल । मने बिहानक उठबेर, सन्झया सुटबेर ट फोन करक चाही । यी मन कट्रा सबुर हुइने रह । शान्तिसे सुट्जैने रह । चौकससे, दिनभर काम करजैने रह ।

बिहानक उठल टपसे हाँठमुह ढोइना एक घन्टा, सप्रना आधा घन्टाभर मिल्जैना हुँ । महि फोन कर्ना एक मिनेट फे निमिल्ना । यी कहुँ सोहैना बात हो । हुँकहिनसे बट्वैना म्वाँर मुड खराब होजाइठ् । माहोल लटपटा जाइठ् ।

ड्वासर दिन सन्झयाक फोन कर्लि उहँरसे । महि ट उठैनास निलाग्टह । एक मन ट कह हुँकहिन फें असहँक छटपटि करैम । फेर सोंच्नुु, फोन निउठाडेम ट दुःख लगहिन । ओठहँ आस गिराइ लगहि । बर्का लरम मनक मनै । दिनभर भकभोस्रार मुह लेल सहभागिन रहही । टिस्रा फोन उठैनु ।

का कहटो ?– मुर्झुराइल लबजम कनँु ।

का बा हालखबर कहटहुँ–बरा ढिरसे कठि ।

कुछ निहो–मन मर्ल कनु ।

का जे असिक कर्ठो ? कमसेकम एकचो ट फोन करनाए चाही । हमार ट कुछ मतलब निहो । –झर्कटि कनु ।

म्वाँर प्यारी एक घचिक शान्त रली ।

आपन बात शुरु कर्लि । आपन दुःख अरैलि ।

यहाँ के दिनसे लाइन निहो ।

एकदिन डिनचे चार्ज बँचल रह । टुहिन फोन करल बाट अफिससे फोन आगैल । चार्ज ओरागैल । लाइन निहोक चार्ज कर निमिल् हो । एकठो घरक सोलार बाटिन् ट चार्ज कर निडेठ । लाइन अइटि कि एकघचिक चार्जम लगैनु । मोबाइल खोल्नु ट टुहाँर ११÷१२ ठो लग्ढार एसएमएस डेख्नु । और का बा हालचाल ?

ठिक बा । आपन काम करो । म्वाँर अब्ब फुर्सद निहो । सन्झ्या जुन फोन करहो । अट्रा कटिकि मै फोन ढैडेनु । अस्ट हो यार यी लाइन, यी मोबाइल ओ मैयक जुझाई ।
सोम डेमनडौरा