कैलारीमे दुई दिन विदा, थाकससे समयमे विदा घोषणा माग

धनगढी । थारु समुदायसे विशेष पर्वके रुपमे मनागिल यि बरसके अँटवारी पर्व यिहे भदौ ३१ गते परल बा ।

अष्टिमकी टिहुवार परलक दुसर अँटवारके मनाजैना अँटवारी यि बरस भदौ ३१ गते परलक हो । अष्टिम्की गैल २० गते परल रहे । थारु समुदायमे विशेष रुपमे मनैना अँटवारीके लाग तयारी सुरु हुसेकल बा । यी पर्वमे अन्डीक रोटी विशेष रुपमे रहल ओरसे अन्डीक पिठा पिसैना, पटिया टुरना, काठपाटा जुटैनामे लाग घोडाघोडी नगरपालिका वडा नम्बर १० लठैया गाउँक सुनिता चौधरी बटैली ।

उहाँ कहली, अँटवारी पर्वमे सबसे महत्वपूर्ण अन्डीक रोटी हो । अब्बे मिलके जाके रोटी बनाइकल लाग अन्डीक पिठा पिसैनालगायतके तयारी हुइटी बा । ओकर संगे फुलौरी, खरिया बनैना पिठाफे पिसाजाइटा । जेकर घर सिधरा नइहो कलेसे चाउरसे साटकेफे व्यवस्था हुइटी बा ।

अँटवारी टिहुवारमे थारु समुदायके महिला ओ पुरुष दिनभर निराहर ब्रत बैठना, साँझयके ब्रत खोल्ना करठै । खास कैकै महाभारतके भीमके पूजा कैना चालन बा ।

पाहिल रोज ब्रत खोलके अन्डीक रोटी, खुरमा, फलफुल, खिरा एक भाग काँढके खैना चलन बा । दिन डुबलपाछे फेरसे कुछ नइखाके विहान फेरसे व्रत खोल्टी थारु समुदायमे पकाजैना परिकार भात, टमान मेरिक टिना, खरिया, फुलौरी एक भाग काँढके खैना चलन बा । पहिल ओ दुसर दिनमे काँढल परिकार भोज हुइल चेलिबेटिनहे डेना चालन बा । जिहीहे अग्रसान कहिजाइठ ।

कैलाली जिल्लाके कैलारी गाउँपालिका थारु समुदायके विशेष टिहुवार अँटवारीके अवसरमे दुई दिन सार्वजनिक विदा डेना निर्णय कैगिल बा ।

कैलारी गाउँपालिका थारु समुदायके बाहुल बासोबास रहल ओ अँटवारी टिहुवार विशेष हर्षोल्लासके साथ मनैटी अइलक ओरसे यिहे भदौ ३१ गते ओ कुवाँर १ गते विदा डेना निर्णय हुइल गाउँपालिकाके प्रमुख प्रशासकीय अधिकृत विरबहादुर ऐर जनैलै । दुई दिन गाउँपालिका, वडा कार्यालय, शिक्षण संस्था, स्थास्थ्य संस्थामे स्थानीय विदा रहना उहाँ जनैलै ।

ओस्टेक करके थारु कल्याणकारिणीसभा कैलालीसे थारु समुदायके अटवारी टिहुवार यिहे भदौ ३१ गते परलक ओरसे प्रदेश सरकार ओ स्थानीय सरकारहे समयमे विदा घोषणा कैना माग करल बा । थारु कल्याणकारिणी सभा कैलालीक कार्यबाहक सभापति माधव थारु अँटवारी पर्व यिहे भदौ ३१ सक्कुजनहनहे मनैनाफे अर्जी करले बटै ।