पहिचान बचाइक लाग जुटल मजगाउँ

धनगढी । थारू समुदायके हेरैटी गैल लोककला, रीत, संस्कृति, संरक्षण सम्र्बद्धन ओ पहिचान बचाइक लाग मजगाउँमे माघ महोत्सव हुइना हुइल बा ।

‘संस्कृति संरक्षण, स्थानीय पर्यटन ओ आधुनिक कृषि प्रर्वद्धनके लाग एकजुट हुइ’ कना मुल नाराके साथ गोदावरी नगरपालिका वडा नम्बर ८ मजगाउँमे तीनदिन माघ महोत्सव आयोजना हुइना हुइल हो ।

थारू कल्याणकारिणी सभा गोदावरी नगरसमिति ओ बरघर भलमन्सा नगरसमितिके आयोजनामे माघ १२, १३ ओ १४ गते महोत्सव आयोजना करे लागल सभाके नगर अध्यक्ष जनकलाल चौधरी बटैलंै ।

‘थारू समुदायके पहिचानसँग जुरल लोककला, संस्कृति, गीतबाँस, रीतभाँठ, चालचलन, बोलीभाषा, लवाइखवाइ दिनदिने हेरैटी गैल बा, इहिहे संरक्षण सम्वद्र्धनके लाग महोत्सव आयोजना करे लागल बाटीँ’,उहाँ कहलंै ।

थाकस कैलालीके पूर्व कावा सभापति माधव चौधरी थारू समुदायके संस्कृति संरक्षण ओ ऐतिहासिक चिजके जगेर्ना कैना उद्देश्य सहित महोत्सव आयोजना करे लागल बटैलैं । एकर संगे उहाँ स्थानीय पर्यटन, आधुनिक कृषि प्रवर्धन ओ पर्यावरण संरक्षणके लाग फेन महोत्सव आयोजना करे लागल बाटी ।

उहाँ कहलै, ‘थारू समुदाय लोककला, संस्कृति ओ ऐतिहासिक चिजके जगेर्ना ओ स्थानीय पर्यटन तथा आधुनिक कृषि प्रर्वद्धनके लाग महोत्सवके आयोजना करे लागल बाटी । इहीसे समाजके लाग सकारत्मक भूमिका खेल्ना बा ।’

महोत्सवके प्रदेशके भुमि व्यवस्था, कृषि तथा सहकारीमन्त्री रामेश्वर चौधरीसे समुद्घाटन हुइना आयोजक जनैले बा । महोत्सवमे स्थानीय भाँकी प्रदर्शन, थारू कलाकारनके प्रस्तुति रहना बा । महोत्सवमे ऐतिहासिक थारू खानपानके व्यवस्था, थारू कला संस्कृतिके जगेर्ना सम्बन्धी विविध कार्यक्रम, थारू समाज सेवा तथा प्रतिभावान व्यक्तिहे सम्मान, हिरोल्ना, चर्खा तथा अन्य रमाइलो मेला प्रदर्शन हुइना आयोजकले जनैले बा ।

महोत्सवमे थारू परिकार, कृर्षि उपज, स्थानिय उत्पादन लगायत १५ से ढेर स्टल रहना बा । महोत्सवमे २६ गाउँके थारू नाच प्रस्तुत हुइना फेन आयोजक जनैले बा । पाँच लाख अनुमानित लगानीमे हुइ लागल महोत्सवमे हजारौँसे अवलोकन कैना अनुमान करल बा ।

महोत्सवहे सफल बनाइक लाग अध्यक्ष जनकलाल चौधरीके संयोजकत्वमे मुल आयोजक समिति गठन फेन हुइल बा ।