आठुवा थारु साहित्य राष्ट्रिय सम्मेलन माघ २६ गतेसे हुइना

सागर कुस्मी
धनगढी, २२ माघ ।  आठुवा थारु साहित्य राष्ट्रिय सम्मेलन २०८० सुनसरी जिल्लाके गढी गाउँपालिका २ गढीथानमे हुइ जैटी बा ।

थारू भाषा, साहित्य, कला, संस्कृति प्रवद्र्धनमे सहयोग पुगैना उद्देश्य सहित माघ २६ ओ २७ गते डु दिनसम हुइना राष्ट्रियस्तरके साहित्य सम्मेलन हुइ जैटी बा । थारू लेखक संघ नेपाल ओ हौली परिवार मोरङ सुनसरीके आयोजनामे सम्मेलन हुइना जनाइल बा ।

थारू भाषा, साहित्य, कला संस्कृति प्रवद्र्धनमे सहयोग पुगैना उद्देश्यसे सम्मेलन आयोजना हुइ लागल थारु राष्ट्रिय साहित्य सम्मेलनके मूल आयोजक समितिके संयोजक एवं थारु लेखक संघका केन्द्रीय संयोजक डा. कृष्णराज सर्वहारी बटैलैं ।

उहाँक अन्सार सम्मेलनमे थारू समुदायके पोस्टा विमोचन, थारू भाषा साहित्यके लेखक ओ थारु महिला सशक्तिकरणके अभियन्ताहे सम्मान फेन हुइ । सम्मेलनमे थारू भाषाके मानकता, थारू समुदायके इतिहास, धर्म ओ संस्कृति, थारु साहित्यमे अनुवाद कार्य, सुनसरी, मोरङके थारु साहित्यके अवस्था, थारु सामूहिक भवनके औचित्य, थारू केन्द्रित विकासके लाग जनप्रतिनिधिनसे बहस लगायत विषयमे विज्ञ लोगनसे प्यानलमे छलफल हुइना बा ।

ओस्टके साहित्यिक सम्मेलनमे इ बरसमे प्रकाशन हुइल पुस्तकके विमोचन कैना ओ थारु भाषाके टमान पुस्तक प्रदर्शनी तथा विक्रीवितरणके लाग स्टल ढारजैना जनाइल बा ।

सम्मेलनमे देश भरके करिब १५ सयसे ढेर स्रष्टनके सहभागिता हुइना जनाइल बा । सम्मेलनमे थारु बाहुल्य रहल तराईंके सक्कु जिल्लाके थारु साहित्यकार, लेखक, पत्रकार, कलाकार, साहित्यप्रेमीनके सहभागिता हुइना जनाइल बा ।

जिल्ला बाहेरके साहित्यकार माघ २५ गते साँझके रात बसेरा लेहे पुगे पर्ना आयोजक जनैले बा । ओस्टेके कार्यक्रममे स्थानीय थारु सांस्कृतिक नाचगान फेन डेखैना हौली परिवारके संस्थापक सचिव राम सागर चौधरी जानकारी डेलैं ।

हरेक साल हुइना साहित्य सम्मेलन इहिसे पहिले दांगके घोराहीमे २०७३ बैशाख ३–४ पहिल, कैलालीके पटेलामे २०७३ चैत १९–२० डुसरा, बर्दियाके बर्हैया तालमे २०७४ माघ ४–६ टिसरा, रुपन्देहीके उचडिहुवामे २०७५ चैत २२–२३ चौठा, सुखेतके वीरेन्द्रनगरमे २०७७ चैत २१–२२ पँचुवा, कन्चनपुरके सिंङ्गपुरमे फागुन १२-१४ छठुवा, बाँकेके सिढन्वाँमे माघ १८-१९ सटुवा हुइल रहे ।