सिमानामे काँडेतार लगैना धनगढीमे हस्ताक्षर अभियान

धनगढी । राष्ट्रवादी चलचित्र काँडेतारके च्यारिटी शो मे हस्ताक्षर संकलन कैगैल बा । भारतके सिमा विस्तारवादहे रोकक लाग नेपाली भूमिमे काँडेतार लगाइ पर्ना कहटि काँडेतार चलचित्रके टीम धनगढीमे हस्ताक्षर संकलन करल हो ।

भारत करटि रहल नेपाली भूमि अतिक्रमण रोकक लाग सरकारहे दवाब स्वरुप काँडेतार चलचित्रके च्यारिटी शो मे सहभागीनसे हस्ताक्षर संकलन करल नायक तथा निर्देशक नवल खड्काके कहाइ बा । च्यारिटी शो के हस्ताक्षर संकलनमे धनगढीके नगरप्रमुख गोपाल हमाल समेत हस्ताक्षर कैले बटैं ।

राष्ट्रवादी तथा नेपाल–भारतके सिमा विवादमे आधारित चलचित्र काँडेतारके शनिच्चर धनगढीके एसटिएस सिनेमा हलमे च्यारिटी शो डेखाइल रहे । च्यारिटी शो मे सुदूरपश्चिम प्रदेश सभा सदस्य जानकी ऐर, सन्तोसी थापा सर्मा, कैलालीके प्रमुख जिल्ला अधिकारी धर्मेन्द्र कुमार मिश्र, धनगढीके नगर प्रमुख गोपाल हमाल लागायतके सयौँ दर्शक रहिंट ।

हलसे निकरेबेर कुछ दर्शक चलचित्र नैहोके नेपालीनके वास्तवीकता रहल कहाइ रहे । चलचित्र काँडेतार अइना फागुन २५ गतेसे देशभर प्रदर्शन हुइक लाग बा । राष्ट्र ओ राष्टियताके भावना बोकल काँडेतार चलचित्र फागुन २५ गते सबजाने हेरे पर्ना नायक तथा निर्देशक खड्का अर्जि कैले बटैं ।