कथा
माउक डमन्ड्वा
सोम डेमनडौरा
बटास्या दश कक्षासम् पह्रल् बा । पह्र ब्याला उहिँका सब्से महान लग्ना शब्द कलक डाइ रहिस् । हरेक कापी ह्वाए या पन्ना डाइ लिख्ल रह । आठ कक्षा पह्र ब्याला डाइ शिर्षकम निबन्ध लिख पर्ना रहिन् । उ डाइ शिर्षकम निबन्ध लिख्क फस्ट मर्ल रह । टबसे ट आउर डाइ भगवान, डाइ सृष्टि, डाइ संसार…..या कहि डाइ जो सबकुछ । हर ब्याला डाइक् महानता गाए ।

भ्वाज करल् डु बरस रहिक रसरस डाइ लिखल् पन्ना ढुरयैटि गइल् । उ पन्ना पुराका पुरा मक्का गैल् । ड्वासर पन्नम झरझरसे लिख्ल रह– “म्वार जन्नी” । उ आपन जन्नीहँ बहुट मैयाँ करठ् । आपन जन्नीक हर माँगन पुरा करठ् उ, चहा पहार बिल्टाइ पर । ठर्वक कन्ढासम् बाटिस् वाकर जन्नी । टर जन्नीक आघ पुँछि हिलाइठ् बटास्या ।

माउ, जेठिन्याँ, सरजिया, साली, साला…..हाँ अस्टहँ नाटनट्कुर पलि रठिस् वाकर घर । मिठमाठ पक्लसे सब्से पैल्ह वाकर सस्रार पुग पर्ठिस् । यदि निपुगल् कलसे बटास्यक जन्नी खटोलपाट शुरु । बटास्यक फें बान पर्सेक्लिस् । लरांै साह्रे बार बजे राट्क साली फोन कर्लिस् ।

“दिदी, डाइक प्याट बठाइटिस् । भाटुहँ बिर्वा लेक पठाड्या ।”

बटास्या हडर बडर पाइन्ट लगाक निकर्जाइठ् मेडिकलम बिर्वा लिह । बिर्वा डिह ड्वासर गाउँ पुग्जाइठ् । बटास्या जब घर पुगठ् ट राटिक डु बजल् रहठ् । माउ ठिक हुइलक खबर सुनाइठ् । जन्नी एक चुम्मा डेठिस् । बटास्या बरा गहिँर निंड सुटठ् ।

ड्वासर राट वाकर डाइक दाँत बठाक जुरी आइ भिरल् रठिस् । दाँत आब चुपाइ टब चुपाइ कैक पिरा सहक बैठल् रठी । टर दस बजठ् बजठ् सह निसेक्ना होजैठिन् । बठ्ठक झार जुरी आजैठिन् । मन्का हनहनाइ लग्ठी ।

हनहनाइठ् सुन्क ठर्वा मेढर्वन अन्कुस् लग्ठिन् । बटास्या बल्खिच कच्वाटहस् पुछठ्, –“का हुइटा डाइ ट्वार ?”

डाइ ब्वाल पैल निरठि, टर्नी खपाकसे कचोट्ठी ।

“हिंकार जब फें अस्ट हुइठिन् । बठैहिन् चुपा रहहिन् ।”

डाइ– “निसेक्नाहस् लागटा छावा । बिर्वा लान्डेट्या ट ।” डाइ बिन्ति कर्ठी ।

“अट्रा राट ट कहाँ जैहिँ ना । चिमचाम सुट रना हो । ना सुटहि ना सुट डिहीं । सिकार उकार ना खैहो ट कठुँ, आँखर आँखर चबैटि रठो । दाँत निबठाइ ट का बठाइ । चिमचाम सुटो । अट्रा राट कहाँ जैबो । मेडिकलक मनै फें ट निजग्ठ अट्रा जुन ।”

जन्नी अट्रा कठिस् ट बटास्या फेर ओंडर जाइठ् पठ्रिम ।
राजापुर बर्दिया