गयर्वा बुडु खिस्सा भिट्टर बच्पनके कहानी
सानु चौधरी

चिनजान ट माहा पुरान तर बातचित औंसी ओ पुन्वाँसी जस्ट कभुकाल्ह केल होए । बातचित घनक नैहुइल ओर्से हुइ सायद शेखर जी के बारेम मजासे नैबुझल रहुँ । जब थारु मानक भाषाके चर्चा हुइ लागल ट शेखर जी के लिखल थारु भाषम लेख टमान मिडियाम छापगैलन । जत्रा फें छापगैल लेख एकठो फेन नैछुटाक पहरल रहुँ । सुरुसुरुम बहुट कर्रा लाग थारु भाषाम लिखल नैपहर्ना बानि होख हुइ रसरस जब सजिल लाग लागल जब पहर्ना बानी परल ट आब और आर्टिकल कहिया आइ कैख पुछ डाँरु । लिखाइ पहराइके बाट ठनिक गझिनक चललागल रह । एक दिन शेखर पुछल म्वाँर लिखल किताब पहर्ल बाटी कि नाइ । नैपहर्ल हुइटी ट धनगढी आइबेर लानडेम कल टब पटा पैनु उहाँ किताब फेन लिख्ठ कैख ।

कुछ दिन पाछ म्वाँर हाँठम किताब आइल कामके व्यस्ततालेक पहर नैपैल रहुँ मनम खुल्दुली लग्टी रह कब समय मिली टे पहरम कैख । एक दिन फुर्सद मिलख पहर बैठनु किताब ट एक बैठावन म ओरैनु मने एकचो पहरक हौस नैबटाइल । फेन जाके पहर्नु, गयर्वा बुडु खिस्सा संग्रह छुटी रलसेफे बहुत्त बाट सिमोटल बा । इ खिस्सा संग्रहम रलक सक्कु कथा एकठो पहिचान बोकल बा । थारु समुदायम पहिलसे भोग्टी आइल आर्थिक सामाजिक समस्याहे बरा मज्जासे उत्थान कैगिल बा । बहुट रोचक बैराग लग्टीक सिन फेन बा ढेर ठाउँम ।

गयर्वा बुडु कथाम मैफें कौनो ठाउँम आपनह भेटैनु । हम्र छुटीछुटी रहल ब्याला कभुकाल्ह गैया चरहाइ गैलक दिनके याद आइल । इ कथाम सब्से मन छुलक सिन हो गयर्वा बुडुक लभ पर्लक बाट । ना ठुन्यारसे उत्थान कैगिल बाट । ढिरढिर मैयाँ बहर्टी गैलन गयर्वा बुडुह डेख्टी की मुसुक्कसे हाँसी हुँ आँखीसे सान मारि हुँ उ ध्यार रात बुडुक कोनाम सुट्ली हुँ डुनुजे उक्वार भिर्क कक्वा बर्झाठ । ओजरिया रात हो या अन्ढरिया रात उ अघ्रान ओहर्ल ठँ्याचा ठँ्याचा रटरानीक फुला झोटिम गोस्क धनसरोक पाछ आइ । डुनुजहनके उ सच्चा मैयाँ ढेर दिन मौलाइ नैपैलन बिचारा गयर्वा बुडु गरीब हुइलक कारणसे आपन मन पराइल मनैयाहे गुमैल बाट ।

ओस्टहक छारा लर्कनके संघरेन लर्क रठ कठ इ बाट जाटटीक हो छुटीमसे छेग्री भेरी सँगसँग चरहैलक बिहानसे लेक साझसम सँग खेल्ना सघरया एक्कासी छोर्क जाइबेरीक पिडा संघरियनके कत्रा ढेर मैयाँ रहट कना इ कथाम लिखल बा ।

म्वाँर भाग जब मै म्वाँर भाग कथा बिट्खोर्नु ट आँगम काँटा फुलगैल हमार नेपाली समाजम रलक जल्डोबल्डो घटना हो नेपालम बहर्टी रलक बेरोजगारी डेखासिखीके प्रविधिके हाबी परिवारके खुशिके लाग आपन जिउ ज्यान के प्रवाह नैकर्खे विदेश गैलक हजारौं युवा हुकनके वास्तविक घटना हो । धन सम्पति कमैना आशम घरबार उजर गैलक बरा मार्मिक कथा बा ।

बटिया, अँट्वारीम मोर डाइ मामक घरक अग्रासनके खोब बटिया हेरठ बटिया हेरठ हेरठ कभु ट सन्झ्या होजाइन बटियाके बरा भारी अर्थ बाटिस कना बाट टब पटा पैनु । ओस्टक हमार थारु समुदायम प्रदेस जैना चलन अनुसार सल्गाउँक मनै जब गाउँभर सिढा मिलाइठ । टिना जाँर ट्याल न्वान चाउर उ घरसे उ घर करिंट ट गाउँम औरमेरिक चैनार लाग जब प्रदेस जाइकलाग घरमसे निक्र लागठ ट गल्ली भर गरागर पट्निक पहाँट लह्रिया ना ठुन्यार डेख जाए । जब लह्रिया नेग भिर ट छुटी छुटी लर्का आपन आपन बाबाके लह्रिया छुअ जइना ओ इ लान डिहस उ लानडिहस कहिंट ।

पर्वट्वाम बन्कस कट्ना कहल जसिन सजिल काँहा रही एक जन ग्वारा रपटके गिरक मुगैल जब प्रदेससे सक्कुनके बाबन आइबेर बगालम खोब आपन बाबह चिटाइट नैडेखट ओकर बाबा ट इ दुनिया छोरसेकल रठिस काहाँसे आपन बाबाह डेखि उ बगालम । बाबसे लान माँगल पहुरा पहुरामे सिमिट हुइल बा ।

ठण्डा बरफ, सायद पहिल हमार पालाम एक रुपियाके एकठो बरफ आए उ ब्याला एक रुपिया फेन नि जुहाए जब कि आब कम्तीम पचास रुपियासे टरक बरफ फेन माहा सस्टा कहबेर । बरफ खाइक लाग पैसा नैहोक मसरी डाँइबेर भैस मस्री मस्री ठसठस ह्यागँट । उह ग्वाबर छिट्वाभर उठाक अगैयक लडियम ढोए गैलक दिन आँखिक आघ डेख्नु । गोहँु बिट्वार गैलक, बरफ किनख खोरियाम पानी बनख पिलक बचाबचा बरफ चाटबेर पलिस्टरके झबली भिजैलक प्वाँकप्वाँक बज्टी कि टठियक भात छोर्क डौरलक बाल्यकालह खिटखोरल बा ।

काला, पहिल गाउँगाउँम खोब कलन्डर आइठ उप्पर कुर्टी ओ टर पेटीकोट अस फर्र फेक्करल पैजामा हुइन कि का हुइन घल्ल रहिंट । चुरिया मदर टरिया टिक्ली लुगा लत्ता ओ कोइ साँप लेक कभु ग्वारा बठैला ट्याल का का हो का का । मनैक दिमाग चटना काम ट के सेकी । हुकनसे दिनभर गाउँम रहट साझके बोक नैसेक्ना गोहुँ मसरी लेक जाइँट इह मार कहल हुइहि पहिलक मनै मुअल बाजी जित्ती नेपाली हुकन ठक्ठ ओ हमार थारु कत्रा सोझ रलह कना बात फें प्रस्त बुझसेक्जाइ । काला कथामसे काजे कि उ कलन्डरन फें ज्या डिहबेर ढक्या भर भर डेना ।

सिरुवा, आर्थिक चपेटाम परक आपन जहान पालन पोषणके लाग जिम्डरुवक आडम वर्षांै बरस जिम्डरुवक बनाडेलक सिरुवाम बैठक जिन्गी गुजर्लक जिम्डरुवक सौखी टिर नैसेक पुस्तांै पुस्ता सिरुवाम बैठलक बरा दर्दनाक कथा बा सिरुवा कथा । एम्न बुधनीके भुमिका जात मन परल आपन गोस्यक समस्या देखक एकठो गोन्याँ ओ सिक्रल सिक्रल माहा पुरान गटिया ले कैयो बरस कट्ली जिन्गीक सफरम आपन गोस्याह कसिक साथ डिहे परट कथा बाट मज्जासे उठाइल बा इ सिरुवा कथाम ।

डलडल, राजदरबार हत्याकाण्ड पाछ जनयुद्धके ब्यालम थारु समुदायह हेर्ना नजरिया फरक रहिन सक्कु थारुन माहोबादीके बिल्ला भिराक सयांै जहन प्रहरी प्रशासनसे यातना पैल कयोजन आभिन फें बेपत्ता बात हुकनके कनौ खोजिनिती नैहुइटन जस्टहक रध्वा काकुक मुअल जियल पटा नै हो । छोटहीम बाबा गुमैलक छावा आब भारी हुइल पाछ आपन अस्तिव खोजट ।

बाबक चिठ्ठी आपन लर्का पर्कन कत्रा मैयाँ कर्ठ कना सन्देश डिह खोजल बा छावा मजासे पहर्क मजा काम करी ट हमार जसिन दुख कर नैपरहिस कैख अप्न नैखा नैलगाक छावह शहरम पहर पठैठ छावा जुन शहरके रमझमम फस्क रुपिया पैसा उरैटी रलक सारा सम्पति बेंच्क फेन पैसा नैपुगा पाइ लग्ल ट अन्तिम विचारा स्वाज बाबा आपन छावासे माफी मागल मार्मिक चिठ्ठी लिखल बा ।

इ गयर्वा बडु खिस्सा संग्रहम ढेर बात सिमोटल बा भाषा धर्म संस्कार थारु समुदायम पुस्तांैसे भोगटी आइल समस्या हमार पुस्ता हुक्र बेल्सलक शब्द हमार वाल्यकालमक भोगाइ थारु समुदायम घटल घटनाके सहज तरिकाले उत्थान कैगिल बा थारु समुदायके इतिहासम हेर्ना हो कलसे एकचो गयर्वा बुडु पहर्ना जरुरी बा । गयर्वा बुडु थारु समुदायके पुरान इतिहासके पोकरी हो । कभुकाल्ह अक्कल झुक्कल सुनगैलक अघट्यक खिस्सा आझ आपन हाँठम ढैक पहर्ना मौका मिलल याकर लाग ढक्या भरके धन्यवाद डेहम कथाकार शेखर दहिदहे । आघक दिनम आकुर ढेर अस्ट अस्ट इतिहास सिमोटल किताब पहर मिले कना शुभकामना फेन बा ।