‘भोज कैके सुखमय जीवन बिटैना’

कैलाली जिल्लाके धनगढी उपमहानगरपालिका वडा नम्बर १९ फुलवारीके महिमा कुस्मी, थारु कलाकार मध्य एक हुइँट । हुँंकार २०५५ साल भदौ महिनाके २४ गते बाबा दुखिराम चौधरी ओ डाइ बालिका देवी चौधरीके कोखसे इ धर्तीमे पैला टेकलैं । थारु आधुनिक गीत ओ लोक सांगीतिक क्षेत्रमे मोडेलके रुपमे स्थापित हुइल बटैं । ओहकान गीत दर्जनसे ढेर थारु ओ नेपाली गीतमे मोडेल खेल सेक्ले बटी । इहे क्रममे समसमायिक विषयमे सागर कुश्मीसे करल छोटमिठ बातचित यहाँ प्रस्तुत कैल बा ।

१.अप्ने कलाकारिता क्षेत्र ओर कहियासे लगली ? गीतमे खेल्ना आशिर्वाद कहाँसे मिलल् ?
मै थारु कलाकरिता क्षेत्रमे २०७४ साल ठनसे लगनु । गीतमे खेल्ना आशिर्वाद घरेक मनैनसे मिलल् । डाइ बाबा सक्कु जाने बहुत सहयोग कैनै । टबसे यी क्षेत्रामे मै आघे बहर्नु । यी क्षेत्रमे अइना रुची नैरहे । टब फेन मोर डाइके इच्छा रहिन कि मै यी क्षेत्रमे आघे बरहुँ कना ।

२.अप्नेक बाल्यकाल कैसिक बिटल बटा डिना ? जिन्गीमे सबसे यादगार पल कुछ बा, जौन कबु नैभुले सेक्ना ?
मोर बाल्यकाल टे मजे रहे । ठिक ठिके हुइल कहक परल । ८ कक्षासे लेक १० कक्षा पर्हेबेर ठोरा झगरालु रहुँ । यी पल भर कबु नाइ बिसराइ सेकम ।

३.अब्बेसम थारु ओ नेपाली मिलाके सक्कु कैठोसम् गीतमे खेल सेक्ली ?
और थारु नेपाली मिलाके मोर ढेर बा म्युजिक भिडियो बजारमे सार्वजनिक हुइल बा । आब बिरा थारु कथानक चलचित्र अइना बाँकी बा ।

४.गीत संगीत क्षेत्रमे लागके का पैली ओ का गुमैली ?
गुमैना टे कुछ नैगुमैनु । मने यी क्षेत्रमे आके महिन जौन चिज पैना रहे उहिनसे बहुत ज्यादा पैल बटुँ जस्ते लागठ । थारु कलाकरिता क्षेत्रमे आके जौन मेरके मान, सम्मान, इज्जत मै पैले बटुँ । इहिसे महिन बहुत गर्व महसुस हुइठ ।

५.अप्ने सक्कु मेराइक गीतमे खेलल डेख्जाइठ । खास कैके कसिन गीतहे प्राथमिकता डेठी ? खास कैके कैसिन गीत मन परठ ?
सक्कु मेराइक गाना मन परठ । खास कैके महिन थारु संस्कृतिसे जुरल नाचगाना भेषभुसा और थारु पहिचान मुलक गाना मन परठ ।

६.अपन खेलल गीत मध्य सबसे मन पर्ना गीत कौन हो ?
महिन मोर खेलल गाना सबसे मन पर्ना गाना ‘कबु दिन कबु रातमे’ कना हो । मोर पहिल भिडियो हो नेपाली गाना आउँछु माया घुम्न लाई धनगढी कना हो ।

७.गीतमे खेल्के यहाँसम पुगसेक्ली । इ समयमे कैसिन कैसिन दुख, समस्या आइल ?
बाधा अड्चन कलेसेफें बिना तयारीके सुटिङ्गमे जाइक परठ टे ठनिक कर्रा परठ । बाँकी टे ओइसिन कुछ फें नैहो ।

८.एक्ठो सफल कलाकार बनक लाग का का करे परठ ?
मेहनत ओ लगनसिलताके साथ काम कर्बी कलेसे ओ परिवारके साथ सहयोग मैंयाँ पैबी कलेसे एकठो सफल कलाकार बने सेक्जाइठ । पहिले गाउँ घरमे नाटक, कार्यक्रकमे सहभागी हुइठ हुइठ संगीत क्षेत्रमे छिर्नु ।

९.अभिनय बाहेक आउर केहोंर समय बिटाइटी ?
अभिनय बाहेक मै आउर घरक काम करके बिटैठुँ ।

१०.मनैंनके जिन्गीमे गीत संगीतहे कैसिक परिभाषित कर्ठी ?
मनैंंनके जिन्गीमे गीत कना सबके लग्घेक संघरिया हो जस्टे लागठ । यदि मनैंनके जिन्गीमे गीत नैरहि कलेसे जिन्गी अधुराहस रहि । मनके भावना व्यक्त कर्ना सबसे सजिल माध्यम गीतहे कहिजाइठ ।

११.भविस्यमे का बन्ना सपना बोकले बटी ?
भविस्यमे भोज कैके परिवारके साथ सुखमय जीवन बिटैना हो । भोज कैके कुछ समयसे घरही बटुँ । आब लावा भिडियो अइना समय लागि, योजना बन्टी बा । कुछ लावा कुछ फरक आइ ।

१२.ओरौनीमे कुछ कहे पर्ना बात ?
ओरौनीमे का कहना चाहटँु कलेसे जौन हिसाबसे अब्बा कलाकरिता क्षेत्रहे हेर्ना दृष्टिकोण बा, जहाँसम लागठ उ गलत दृष्टिकोण हो । इ चिजहे हम्रे सक्कु थारु कलाकार मिलके मजा डगर नेगैना बा । ताकी आबके अइना पिढी एकठो मजा पाठ सिखे कना मोर बिचार हो । मोर आवाजहे संसार भर पुगाडेलकमे अपनेनके टिमहे बहुत बहुत धन्यवाद ।