‘पुरान गीत हमार संस्कार, भासा, कला, साहित्यसे जुरल बा’

कैलाली जिल्लाके कैलारी गाउँपालिका वडा नम्बर ३ भररी कैलालीके गायक राजु चौधरी, थारु गायक मध्ये एक हुइँट । सुमधुर स्वर, कला, गला खानी राजु चौधरी ‘राज’ २०३९ साल चैत महिनाके १२ गते बाबा बेचन चौधरी ओ डाइ रामकुमारी चौधरीक् कोखसे इ धर्तीमे गोरा टेकलैं । थारु लोकगीत ओ आधुनिक गीत गाके सांगीतिक क्षेत्रमे चर्चित गायकके रुपमे स्थापित हुइल बटैं ं। अब्बेसम उहाँके ५ दर्जनसे ढेर थारु ओ नेपाली गीत गासेक्ले बटैं । इहे क्रममे सागर कुश्मीसे करल छोटमिठ बातचित यहाँ प्रस्तुत कैल बा ।

१.अप्ने गायन क्षेत्र ओर कहियासे लगली ? गीत गैना आशिर्वाद कहाँसे मिलल ?
मै गायन क्षेत्रमे २०५८ साल ओरसे लागल हुइटुँ । महिन गीत गैना प्रेरणा हमारे गाउँक् संघरिया स्व. गायक पतिराम चौधरीसे मिलल । उहाँक् आशिर्वादसे मै गायन क्षेत्रमे पहुँरटी गैनु ।

२.अप्नेक बाल्यकाल कैसिक बिटल बटा दिना ? जिन्गीमे सबसे यादगार पल कुछ बा, जौन कबुनै भुले सेक्ना ?
मोर बाल्यकाल कलेसे सामान्य रुपमे बिटल । खासे हाइफाइ फें नैरहे । खासे एक्दम कमजोर अवस्था फें नैरहे । जिन्गीमे यादगार पल टे बहुत बा । ओम्मेसे सबसे यादगार सबसे पहिला गीत रेकर्ड करेबेरके याद आइठ । बिसराइ नैसेक्ना कलक मोर घाँतीक अप्रेसन हुइबेर बात महिन ढेर स्मरण कराइठ ।

३.अब्बेसम थारु ओ मिलाके सक्कु कैठोसम गीत गासेक्ली ? कौन कौन एल्बम बजारमे लान सेक्ली ?
अब्बेसम सक्कु कैके बहुत गीत गासेक्ले बटुँ । नेपाली कभर कुल सक्कु गन्लेसे टे ढेरे हुइ । ५० ठो कट्जाइ । अभिनसम मै आवाज डेहल एल्बम असरक डगर, मोर चम्फा फुल्वारे, सोला सिंगार, रोजल दुल्हनियाँ लगायत टमान एल्बममे गीत गासेक्ले बटुँ ।

४.गीत संगीत क्षेत्रमे लागके का पैली ओ का गुमैली ?
गीत संगीतमे लागके मै सबथोक पैनु । दर्शक श्रोता हुकन्के मैंयाँ । ओहे हो मोरिक सबसे भारी कमाइ ओ कुछ गुमाइलहस टे नैलागठ अभिनसम ।

५.अप्ने सक्कु मेराइक गीत गाइल डेख्जाइठ । खास कैके कसिन गीतहे प्राथमिकता डेठी ? खास कैके कैसिन गीत मन परठ ?
हजुर मै सक्कु मेराइक गीत गैठँु । गीत कना सक्कु मेरिक मन परठ । मने मोर सांगीतीक यात्रा सांस्कृतिक गीतसे सुरुवात हुइलेक ओरसे पुरान पुख्र्यानी गीतहे प्राथमिकता डेठँु । काहे कि पुरान गीतमे हमार संस्कार, भासा, कला, साहित्यसे जुरल बा ।

६.अपन गाइल गीत मध्य सबसे मन पर्ना गीत कौन हो ?
मोरिक गाइल गीत टे महिन सक्कु मन परठ । अपन सन्तान सकुहुन्के मैंयाँ लागठ । मने मोर मन छुना लेहंगा फरियम् डेख्ठुँ टुहिन कना गीत हो ।

७.गीत गाके यहाँसम पुगसेक्ली । इ समयमे कैसिन कैसिन दुख, समस्या, बाधा अड्चन आइल ?
गायान क्षेत्रमे यहाँसम पुगक् लाग बहुत दुख कैले बटँु । सुरुवाती दिनमे अब्बेहस प्रविधि नैरहे । गीत गैना सजिल वातावरण नैरहे । आर्थिक रुपमे फें सब्बल नैरहि । महिनाके आठ सौ रुपियामे काम कर करके घरेसे ४÷५ घन्टा साइकिल चलाचला हम्रे गीत रेकर्ड करे अतरिया पुगि । घर परिवारसे खासे सहयोग नैरहे । बहुत दुख कैके आझ यहाँसम पुगल बटुँ ।

८.एक्ठो सफल गायक बनक लाग का का करे परठ ?
एक्ठो सफल गायक बनेकलाग लगनशील, मेहनत, अनुशासन, धैर्य हुइना एक्दम जरुरी बा । हारेस नैखाइ परठ एकदिन जरुर सफलता हाँठ लागठ । हरेक मनैंनमे धैर्यता हुइ परठ ।

९.गायन बाहेक आउर कहोंर समय बिटाइटी ?
गायन बाहेक अझकल मै धनगढी मोतीचोकमे राज सपिङ्ग प्वाइन्ट छोटमोट रेडिमेड कपरा डोकान चलैठुँ । ओ डाइ बाबनहे गाउँमे खेतीपातीमे सहयोग करठुँ ।

१०.मनैंनके जिन्गीमे गीत संगीतहे कैसिक परिभाषित कर्ठी ?
मनैनके जिन्गीमे गीत संगीत एक्ठो मन हल्लुक कैना डवाइके काम करठ । हरेक मनैं जबजब दुख पिरमे रठैं टबटब गीत संगीत सुन्ठैं । मन बहलैना आधार हो । काहेकी मनैनहे खुशीमेफें गीत संगीत चहठिन दुखमेफें गीत संगीत चहठिन ।

११.अब्बे थारु भासा गीत संगीतके अवस्था कैसिन बा ? कौन कौन मेरके गीत बजारमे आइटा ?
अब्बे थारु गीत संगीतके अवस्था बहुत मजा बा । पहिलेसे बहुत आघे बर्हसेकल बा । मने विकासके संगे विकृतिफें बा । संस्कुति नाउँमे गलत गलत गीतफें आइटा । ओ सक्कुजे असिन नैहुइटैं बहुतसे हमार सांस्कृतिक गीतहे नयाँपन फें डेले बटैंै । उ फें मजा बात हो । लकिन आधुनिक जबाना बा कटिकिल हमार पुरान चिजहे पुरा पुरा बिगर्ना मजा नैहो । जस्ते झुम्रा हो टे झुम्रा बनाइ । नैकि झुम्रा के नाउँमे औरे चिज नाही । समग्रमे कहबी कलेसे बहुत आघे बर्हल बा । गाउँ घरमे थारु गीत बाहेक औरे गीत नैसुन्जाइठ ओत्रा । इ हमार गौरबके बात हो ।

१२.अन्तमे कुछ बाँकी बा कि छुटल बात ?
अन्तमे मोर सक्कु कविला हुकन अत्रे कहना बा आझ सम मोर गीत सुनके हेर्के महिन जस्ते मैंयाँ डेटी आइल बटी आब अइना दिनमेफें अस्टे मैंयाँके आस बा । ओ अपनेनके टिम निरन्तरता चल्टी रहे । धन्यवाद ।