पसग्यान मन्ह्ला दयाराम सक्करहीं काँसक् डु खोरिया लगा सेक्ल । राटभर नैसुटल हस लाल-लाल आँख बिल्गाइटिन । बिना एक डु खोर्या नैलगैल ट मजासे डिन नैकट्ना ससुर । दयाराम आपन जवानी म बरा बल्गर गाउँ भरिक सुग्घुर ठर्या रहैं ।

जस्ट नाउँ ओस्ट दयालुफे रहैं । गाउँम दयालुहन कैयौठो नाउँले चिन्ठिन । दयालु, पिउना, सुघरका, पसग्यान मन्ह्ला, बघिपुर्या सब्से ढ्यार जसिन ट जारक्याँ कैक चिन्ठिन । आझ्काल बैँस मठ्वा नाहाँग सेक्लिन । नेटावनसे उठबैस मजा रहल ओहर्से गाउँक डख्खिन स्कुलम पिउन काम पाइल रहैं । जन्नी सड्डक लाग लहेर रठिन । छावक आसम टिन ठो छाइ बाटिन । बर्किक भोज कराडेल एक्ठो भर अप्नह उरहर्क चल गिलिन । छोट्की भर आपन डाइक् संग रठिन । पिउन जागिर खिलसेफे तलब मजा हुइलक ओहर्से पक्की घर बनासेक्ल रहैं । पिउन जागिर कर्टी-कर्टी ओह स्कुलम पह्रैना पर्बटिनिया मस्टरिनियाँसे मिल गिल । मस्टरिनियाँह छोट्की जन्निक बना लेल । मस्टरिनियँक ठर्वा बिडेस रहिन । छोट्की जन्नी लन्लक कारनसे बर्की जन्नी आढा अंशक लेक छुटापाटी कर लेलिन । छोट्की जन्निक चक्करम जागिरसे डुनु जहान निकार डेलिन । मस्टरिनियँक पुरान ठर्वा नेपाल अइठिन । दयारामह जारी टिरक लाग पक्की घर बेच पर्ठिस । समय बिटटि गिल ।

खै का बाट नि मिल्लिन बचल जग्गा सब आपन नाउँम कराक मस्टरिनियाँ आपन पुरान ठर्वक ठे चल डेहल । टबसे दयाराम हिट्वा हस होगैल । साहारक नाउँ म जार ओ डारु किल रठिस । मुर्घिनियाँ जट्रा फुटफुट्री खेल आपन जिउम ढुर कह हस दयारामक टुट्ली झोप्री किल बचल रठस । आज आढा पागल हस टुट्ली झोप्पिक कोरै बाटी गन्टी दयाराम पस्टैटी बा । मो यी कसिन जरम कसिन करम । दयाराम बल छोरके जोर्से चिल्लैल । हे भग्वान महि आपनठे लैजाउ टोहाँर मैगर हुइना मन बा।
डियर अबिरल
गुलरिया-१५ खैरापुर बर्दिया