गजल
टुहिन अपन ढकढिउरम ढर्ना मन लागल ।
माया महिन आझफें बोल्कर्ना मन लागल ।

टुँ मोर मनके बात ओनैना काहे ढिला कर्टो,
टुहिनसे अपन यी जिन्गी सवर्ना मन लागल ।

एक दुई सालसम असरा हेर्टी मिच्छाइ जैम,
टोहाँर सँग आब जिना ओ मर्ना मन लागल ।

अटना ज्यादा याद कर्केहो छटपटाइठ जिउ,
बुझोना मोर मनहे सेन्दुर भर्ना मन लागल ।

आब अइना दिनमे डुनुजाने मिल जुल्के रहब,
टोहाँर सँग जिन्गीमे आघे बहर्ना मन लागल ।

बलराम चौधरी
जानकी गाउँपालिका–१ धर्मापुर, कैलाली