कंचनपुर टोली अइटी रहिंट । मै अपन काममे बेस्ट कारन बर्दिया बह्रैया जाइक लाग फे अटुर रहँु । बिहन्नेसे अपन कामके छुट्टी मिलइटी रहँु । ओहरसे सागर कुस्मी झबाझब फोन कैके हैरान कैले रहिंट ।
मै जुन गोचाली एफएम ९० मेगाहर्ज मे कार्यक्रम चलइना हुइना हइुलक ओरसे डट्करल रहुँ । कार्यक्रम टे सुक्के राट नौ बाजे बोल्ना रहे । मने मै बिफेक टयार कैलेले रहुँ । बिफेक माघ ४ गटे बह्रैयामे राट रहे पुगना रहे । फे बिहन्ने अपन काम भैयाहे जिम्मा लगाके मै बिहान आठ बजे गोचाली एफएम मे जाके हाली–हाली रेकर्ड कैनु ओ मिक्स कैके सेकले नै रहँु । फे फोन कै ढर्लां सागर हाली लम्की पुगी । हम्रे कंचनपुर से नेंगगैली ।
मोर जिउ और हडबडा गैल । मै हाली घर गैनु ओ हटर पटर हाँठगोर ढोइनु ओ कल्वा खैना टयार हुइटी रहुँ । फे सागरके फोन आगैल । हम्रे सुख्खड पुग्ली अप्ने काकर्टी हाली आइ । अप्ने घाटा लगैबी कहे लगलै । लि आब कल्वा फे नै खैम कनु ओ हाली लुग्गा बडल्नु ओ खाली झोला पकर्के बिन् कल्वा खैले नामडेनु ।
टीकापुर बस पार्क ओर नै जाके अगोछी काट्के लम्की रोड टि. एम. सि. होके बस रोक्ना ठाउँ गुल्मा लावा बसपार्क पुग्नु । हाली बसम् डौरके चहुर्नु ओ डैबरवा पुछल् कहाँ सम जाइटी कहल । मै कनु चली हाली जहाँ जाइ वहाँ उट्रबे करम । बसजुन् असिन पर्गील रहे कि डगर ओस्टे काना हो । रोडफे फुटल–फुटल रहे । ओस्टहे डैबरवा फे ढिला गारि हाँके । एक किलोमिटर पार कैना फे टिन चार मनेट लगाए । कि जबकी बाइकमे बाइक एक मिनेटमे एक किलोमिटर पार करट सोच्टहुँ ।
सागर फेन फोन करके मचैले रहिट । मै कहटँु आइटँु आइटँु । कहट कहट बलटल लम्की पुगाइल । हाली बसेम् से उट्रनु फोन कर्नु सागरहे । कहाँ बटी कनु । मै पुग्गैनु । कहाँ बटी अपने एक बोटल पानि लि ओ बिस्कुट लि कलै ओ पोख्रेल होटल आघे आइ । मै सोच्नु मै खाना नै खैले हँु । टबे बिस्कुट लेहे कहलै । मै हाली बिस्कुट ओ पानी लेलँु । बिस्कट डुठो लेनु । एक बिस्कुट खोलके खाइ लग्नु । एकघचिक पाछे सागर लोगफे पुगगैलंै ।
टब सोच्नु मै आब लम्कीसे मोर ओ कंचनपुर टोलीसे मोर मजा यटा« सुरु हुइ । ओ चिसापानीमे फे फोटु खिचैली कर्णाली पुलमे । फोटु खिचके फे यात्रा सुरू हुइट । बाँसगढीके चोकमे उटरके बाँसगढीके डख्खिन ओरसे अटोमे बैठ्के बह्रैया ताल ओर हमार आठ जहनके यात्रा सुरूहुट अटोमे असिक बैठ्गैलि कि डुइजे अटोक् पाछेक् सिटके डिग्गीम बैठ्गैलंै । चार जे सिटमे ओ डुइजे डैबरवक् अंजर पांजर बैठ्गैलंै । अटो जस्टेक् झट्के ओस्टक् सीता ओ सिमाके मुन्टामे ठक्कर लागिन खभक्का खभक्ककी अइटी किल । टरे मुन्टा कैले रहिट । कोनुम् आजाउ बैठे कहिट सागर सर । नै बनल बा कहिट सिमा मिस मने खुचुङ खुचुङ करट पुगैली बह्रैयाके बह्रैया टल्वा । टल्वा किनारे हमार अटोमसे उटरलि ।
टल्वा किनारे मघहा बजारफे रहे । ओहे लग्गे पाल लगाइल रहे । राष्ट्रिय थारू साहित्यिक मेला ३ के कार्यक्रम हुइना फे टेन्ट लगैटी रहिट । आयोजक हुक्रे सागर जुन फोन कर्टि रहिट अयोजक हुकनहे । हम्रे पुग्ली कहोर हो हमार कार्यक्रम पहुनन्के बैठ्ना पुछ्टी रहिट । फे टल्वा ठन्से डख्खिन ओर लग्ली गाउँक् एक्ठो घर जाके पानी पिली ओ फे यात्रा सुरू हुइ गाउँक् जैना ।
एकठो मनैयाँ हमार बैठ्ना ठाउँ डेखाइ संगे गैल । डगरी डगरी फोटु खिचैटि हम्रे पुग्ली । जहाँ हमार बैठ्ना बेवस्ठा रहे । श्री नेपाल राष्ट्रिय इन्दिरा भुसाल माध्यमिक विद्यालय मैनापोखार ३ बढैया बर्दिया पुग्ली । वहाँ गाउँक् मनंै भन्सा कर्टि रहिट । थारू साहित्य मेलामे अउइया पहुनन् लाग खाना पकैटी रहिट । हमार झोला ढर्ना एक्ठो कोठा डेखैला सुट्ना फे ओहै रहे । हमार स्कुल पुगट सम सांझ हुसेकल रहे । हम्रे अपन अपन झोला ढैके कोइ नल्की ओर टे कोइ टोइलेट ओर लग्ली । कोइ पठ्रिम ओडर गैलाँ । मै जुन भन्सरयनठन् आगी टापे गैलँु ।
ठोरचे लगैना मन लागटहे । सागर जाइ लेहे कहैं । लग्लंै टे हम्रे सन्तोष सर से गाउँमे खोजे निकरगैल रहि । बेरी जुन फे होगैल रहे । गाउँक् बेरी खैटी रहिट । अँसर्वामे बैठ्के टे कोइ बहरिम । हमार खोजल चिज जुन टिन चार डुकान पुछ्ली टब मिलल् टे लेके अइली । हमार आइट सम सागर सर हुक्रे बेरी खासेकले रहिट । सुटल रहिट सागरहे कनु चली जाइ लगाइ । नै मै खाना खा सेक्नु कलै । मै चिरोरी कैनु टभु नै गिलै । सागर हम्रे सन्तोष सर से बेरी खाइ गैली ।
मै कनु सर लगाइ । नै सर मै नै लगइठँु सनतोष कलैं । महिन जुन एक्केली नै मन लागटहे । पाछे बेरी खाके सक्कुजे कंचनपुर टोली बैठ्के परिचय कैली । मै गोझो लेहल जुन पिएक लाग टोटा घुटघुटैटी रहे । टिना लेहे मै गैनु । भन्सरयन जुन ढेरे टिना प्याज मुरै ढेरे डैडेलै । मै जुन भित्तर बाहर कर्र्टि रहँु । टमान संघरयन केके आइल बटै कैके हेरेक लाग ।
पाछे सर्वहारी, सुसिल, सोम डाजु, दिल बहादुर, बलिका डिडि, छबिलाल डाजु, श्याम शराबी, बिनोद सर हुक्रे जुन पुक्के लगइटी रहिट । ओम्हे मै फे मिलगैनु । लगालेनु मै फे गिलास । ओहोरजुन नाच जम्कल रहे । सोम डाजु हुकनके पुनाराम कर्याबरिक्का बलिका टमान मनैफे रहिट मघहा गीटमे । खोब नाच जम्कैले रहिट । पाछे मैफे सुट्ना ओर लग्नु । सागर से अक्केठे सुटली । गाफ गाफफे चल्टी रहे ।
काल कार्यक्रममे कैसिक जैना कैके ओ साहित्यिक बाटफे चल्टी रहे । बाट बट्वइटी क्रममे और कोठासे बालिका डिडीक् आवाज आइल सुटो रेउ लर्को कैह्के । टबु गाफ हमार नै चुपाइल । हमार सुटल ठाउँसे डख्खिन कोठामेसे फे मेसेज आइल कोपिला डाजुक् । टब सागरफे हाली चुपा गैलै । सब्जे चुमाइल सुट्लै । सिमा ओ सितुके बात सुरु हुइल गफ मैफे अब सुटो कैके मैफे चुमा गैलुँ ।
उ रात मजा से निंद नै पुगल । बिहानके फे औरेजे उठसेकल रहिट । मै सुट्ले रहँु औरेजे पालिक पाला उठ्ठी रहिट । मै टे पाछे उठ्नु । डोस्रे उठ्के चिया चाय पिलि । गाउँ ओर घुमे गैल रहि । कोपिला डाजु ओस्टक् रमेश डङ्गाली, रामकुमार बिग्रल चक्क,ु गाउँक् डख्खिन ओर घुमे गैल रहि । घुम्के आके कल्वा खाके फे कार्यक्रम ओर लग्ली ।
बढैया टल्वाफे घुम्ली कार्यक्रम चालु रहे । डिनक् कार्यक्रम ओराके बेरी खाके डहिटान ढेंकी कुटे गैली । डहिटान ढेंकी फे कुटट् फे मजा आगैल । डहिटान ढेंकी कना नाटक रहे । हेरके पहिले खोब हँसाइल । पाछे टे आँस पोछाइल । ढेंकी नाटक हेरे पैनु बहुट खुसि लागल । नाटक पाछे जन्नी कना फे नाटक हेर्ली । नाचगन फे रहे । दर्पाण कुसुम्या के गीतमे । दर्पण अक्केली माइक पकरके पुरा समय अक्केली लेलै । इ बाट मन नैपरल महि । आप से असिन ना होए । खबरदार । मैफे खोब नच्नु । मने सागर मै ओ औरेजे अपन प्रस्टुटी डेखाइक लाग रही । मने डेखाइ नै पैली ।
पाछे दस बजे ओर कार्यक्रम फे पाँच गतेक ओराइल । ६ गतेक कार्यक्रममे हम्रे अपन अपन प्रस्टुटी डेखाइक लाग रही । टमान गजलकार ओ गायककार हुकनफे टमान प्रस्टुटी रहे । हम्रे जुन हाली घर घुमेक् लाग रही । सागर हाली पाला मंगले सेफे मने पाला हाली करट और संघरियन छुट गैलाँ । सागर हाली अपन पाला लेलाँ ओ मै फे हाली कनु सोम डाजुहे । मै फे घर जैना कैह्के हाली मै फे पाला मँग्नु । श्याम शराबीफे मोर नाउँ बोल्कार डर्लां । सागर कंचनपुर टोलीहे लेके हाली स्कुल ओर चल्डेलै ।
महिन जुन झबाझब फोन करे लगलैं । अपन टे हडबडाइल जिउ स्टेजमे मजासे प्रस्टुटी डेखाइ नैपैनु । हाली हाली दुई मुक्टक ओ एक्ठो गजल सुनाके हाली स्कुल ओर लग्नु । सागर हुक्रे मिझनी खैटी रहिट । मै फे पछ पछही पुग्गैनु । कार्यक्रम ओर्वाके अटो बुकिङ कैके सक्कु जे अटोमे बैठ्ली । अटो बाँसगढी सम छोरडेहल । हमार सुमिरन बगाल फेन नेंगल कैलाली कंचनपुर ओर ।
रामचरण चौधरी ‘अजराइल’
टीकापुर–१ कैलाली