आझसे १८ बरस पहिले रेडियो कार्यक्रमक लाग प्रश्न पुछबेर महि थाहा नि रह कि यि कार्यक्रम रेडियो प्याकेजि हो कैक । मनै पहर्क जन्ठ कि ट पर्क कठ । रेडियो पत्रकारिता ना मै पह्रल रनहँु ना मै बनैना ठाउँ डेख्ल रनहुँ । उ समयम रेडियो नेपाल काठमाडौं ओ क्षेत्रीय प्रशारण सुर्खेतसे केल कार्यक्रम सुन मिल । २०५९ सालम एकराज चौधरी नेपालगंज मिडिया सेन्टर स्थापना कर्ल । वाकरपाछ थारु भाषक रेडियो कार्यक्रम ख्याल उहसे उत्पादन ह्वाए । ढिर ढिर अबधि भाषक कार्यक्रम, थारु भाषक नाटक लगायतक ढेर कार्यक्रम रेकर्ड हुइ लागल ।

म्वार रेडियो पत्रकारितक गोंरी फे रेडियो ख्यालसे जो हुइल । थारु ओ पहारी मिलल् बस्तीम बैठल मै ब्वाल जन्लसे फे थारु भाषा लिख्नम अभ्यास नि रह । उह फे रेडियो नाटकम बोल्लक मार काम कर सेकडरही कैक मै ख्यालम काम कर्ना अवसर पैनु । रेडियो ख्याल कार्यक्रम ब्याकवार्ड सोसाईटी एजुकेशन (बेस) क संचालन करल कार्यक्रम रह । रेडियो ख्याल मुक्त कमैयन्हँक गाँस, बास ओ पुनस्थापनाक बारेम संचालन हुइल कार्यक्रम रह । कमैयन्हँक समस्या बुझक लाग बाँके, बर्दिया, कैलाली, कन्चनपुर ओ दाङ जिल्लम फिल्ड जाइ पर । फिल्ड जैना क्रमम पहिल फ्यारा कन्चनपुर जिल्ला परल ।

सोनी कम्पनीक रेकर्डर लेक मै कन्चनपुरक झलारी कमैया वस्तीम फिल्ड गैनु । रेकर्डर चलैनम ओट्रा ज्ञान नि रह । रेकर्ड कर्टि कर्टी का डाब मर्नु थाहा नि हो । रेकर्ड हुइल कि नाइ कैक बाट सुनबेर आवाज सुन नि जन्नु । संघ रेडियो ख्याल कार्यक्रमक टेलिफोन रिपोर्टर भागिराम चौधरी डाडु रलह । डाडु आवाज नि आइठो जे का करुँ कैख पुछ्नु । उहाँ महि फे थाहा नि हो कल । उ समयम कन्चनपुरम थारु पत्रकार कैक चिनगिलक बलबहादुर डंगौरा रलह । आब का कर्ना हो कैक मनम छटपटाहट हुइल । दिमागम बलबहादुर डंगौरा सम्झनु ओ फोन कर्नु । सर रेकर्ड करबेर का डब्नु थाहा निहो रेकर्ड हुइल चिज सुन नि स्याकठुँ कैख कनु । उहाँ डोसर रोज बनाडेल । मने फे खै का डाब मर्नुु और रोज फे कमैयनक बोली रेकर्ड कर नि सेक्नु । बिना रिपोर्टक कट्रा डिन बैठँु कैक रेडियो ख्याल कार्यक्रमक संयोजक एकराज चौधरी ह जानकारी करैनु । नि जानठुइ ट आ जाइ, बैठ क का कर्बी ट कल । मै बिना रिपोर्टक नेपालगंज फिर्ता हुइनु । यि म्वार रेडियो पत्रकारितक पहिला घटना हो । जेहिले ढ्यार बाट सिख्ना मौका मिलल् ।

यहाँ पुर्खनक कहल बाट क सम्झना आइल । नेंगो, नेंगटी रहो । गल्ती हुइठा । ना अट्यइहो । गल्तीले ट हमन सिखैठा । बाधा अइठा, झेलो । ठ्यास लाग्क गिर सेक्ठो । उठो ओ फेर नेंगो । टुहाँर सपना का हो ? कोन लक्ष्यम पुग चाहटो । आपन सपना याद करो । एकडिन अवस्य पुरा हुइने बा । यिह बाट मनन् कर्टी कार्यक्रम बनैना क्रमम मै कैयो फ्यारा डट्कर्क बैस्नु ओ फे उठ्ना प्रयास कर्नु । नि जानल काम सिख्ना जट्रा कठिन रह, सिखल पाछ फे कार्यक्रम बनैना ओट्रा लिरौसी फे नि हुइल् ।

मै रेडियो ख्यालम करिव १० महिना काम कर्ना मौका पैनु । २०६१ म जब सामुदायिक रेडियोक अवधारणा आइल ओ मध्य तथा सुदूरपश्चिमम दुईठो एफएम रेडियोक स्थापना हुइल, रेडियो भेरी आवाज नेपालगंज ओ रेडियो घोराघोरी एफएम कैलाली । फ्रिक्वेन्सी मोडुलेसन अथवा एफएम रेडियो । मिडिया सेन्टर नेपालगंजसे उत्पादन हुइना कार्यक्रम एफएम रेडियोमसे बन भिरल । रेडियो घोराघोरीमा आबद्ध होक पहिला फ्यारा एफएम रेडियोम काम कर्ना मौका मिलल् । रेडियो घोराघोरी एफएम ब्याकवार्ड सोसाईटी एजुकेशन (बेस) क नाउँसे लाइसेन्स प्राप्त रेडियो रह । घोराघोरी एफएममम थारु–नेपाली सक्कु मेरक कार्यक्रम संचालन कर्ना अवसर मिलल् । ढिर ढिर रेडियो बोली बोल्ना विकास हुइटी आइल ।

लेखक विद्वानहुँक्र कठ, लिख्ना मुस्किल नि हो, अप्न कह ख्वाजल बाट व्यक्त कर्ना अरबर हो । पाठकहुकन छुना कठिन नि हो, अप्न चाहल अस तरिकाले हुकन स्पर्स कर्ना केल अप्ठ्यार हो । तर महि लागठ, लिख्ना महा साँसट काम हो ।

थारु भाषक कार्यक्रम बनैना जट्रा साँसट रह, नेपाली भाषक कार्यक्रम बनैना फे ओट्रहँ साँसट । कइयो फ्यारा महिहँ जवरजस्ती ठिचारक बैसागिल् । अन्तरमनक आवाजम आधारित निष्ठाक पत्रकारिता कर्ना ओट्रा लिरौसी काम नि हो । उह फे मै गोरपासु नि छोर्नु । ढेर जहन लागठुइ पत्रकार प्रश्न पुछ्ना ओ किउ उट्टर डेना । तर यि नि हो ।

हर कार्यक्रम सिर्जैनासे पहिल अन्तर्वार्ता कइ जाइठ । मै केहिसे बाट कर जाइटु, वाकर बारेम जानकार हुइ परठ् । संचार माध्यमम हम्र कभु कभु बेकारक गन्थन कर्ठी । एकहोरो प्रवचन ओ दोहोरो बार्तासम् चल्ठा । शब्द जालक कवडड्ी खेल्टी रलक हुइ सेक्ठा । तर जवसम अन्तरमनक बाट नि जोरजाइठ, हृदयक बोली निकार फे नि सेक्जाइठ । पत्रकारितम प्रश्नकर्ता उट्टर डेना मनैनक हृदय छुना मेरक प्रश्न कर स्याक परठ् । जव अन्तरमनक बाट बाहेर आइठ, उ ब्याला उत्कृष्ट किसान माटीक सिहार सम्हाँर करठ् डेख्ख फे भावना उत्पन्न हुइठा । यि फे आपन कामम सफल हुइल ।

पत्रकारितम हर दिन लौव चिजक खोजी कर परठ् । जेहिले कार्यक्रम सन्देशमुुलक बनाइ सेक्जाइठ् । और क्षेत्रम आपन ज्ञान बेल्स परठ, पत्रकारितम सत्यतथ्य घटनक् जानकारी कराइ परठ् । हर मनै आपनहँ डुखी डेख्ठ । म्वारअस डुख ट के पाइल हुइ । मै गरिव, म्वार ठे कुछु फे नि हो । ज्याकर ठे संसार हेर्ना दुइ आँखी बा, चल्ना हाँठ ओ नेंगना ग्वारा बा । कठ मनै आपनठे रहल् चिज नि डेख्ठ । और जहनठे रहल् चिजक खोजी कर्ठ । कबु कबु पत्रकारितम फे अस्ट हुइठ् । आपन सिपक प्रयोग नि कैक और जहन्क नक्कल कर्ना ।

२०६० साल असार महिनासे सुरु हुइल म्वार रेडियो पत्रकारिता । मै थारु ओ नेपाली ढेर मेरक कार्यक्रम चलैनु । कठ सकारात्मक मनैन्से भ्याँट ओ छलफलसे संभावनक ड्वार खोल्ना काम हुइठा । कामम लगाब नि छोर्क आघ बहर्बो ट हर कामम सफलता प्राप्त कर सेक्जिठा । रातक डेख्गिल सपना, सपना नि हो । सपना ट डिनिक हर कामक प्रयासम रठा । रेडियो पत्रकारितक गोरपासुम मै यि ढेर चिज सिख्ना, जन्ना, डेख्ना ओ बुझ्ना मौका पैनु । जिन्गि जिना शैली, बैठ्ना टौर तरिका, आनिबानी, बटैना शैली, एकऔर जहनसे कर्ना ब्यवहार ओ और जहन सम्झना बुझ्ना टौरतरिका । पत्रकारितक यि गोरपासुसे महि लागल् जिना कर्रा ट मनैन केल नि हो । जीव जनावर, पशुपन्छी ओ प्रकृतिहँ फे बा । तराईक समथर फँट्वा, साह बर्खम अन्नबालीले भरल् उ खेट्वा एकाएक लडियम परिनट हुइना, कबु लगाइल बाली खरेरीले सुख पर्ना । पहारक टिप्पम फुलल फुला मैगर बास डेटी भरल बैसम झर पर्ना । हराभरा रुख्वाले भरल पहार मरुभुमि चट्टानक रुपम रह पर्ना । लड्या झरनक जट्राभारी बेग रह, चिमचाम पठ्रहँ सह पर्ना । मनै ब्वाल सेक्ठ ट कठि स्वाचल अस कुछु नि हो । तर प्रकृतिक बाट के सुनि के बुझी ?

कामक डौरानम जिन्गि जिआइक मस्कट बुझ्नु । और बाट का फे बुझ्नु कलसे कौनो फे कामक सुरुवाट करक लाग महान हुइना जरुरी नि हो । तर महान हुइक लाग सुरुवाटक जरुरट रहठ । सुनल बाट ओ ड्याखल चिजसे फरक रहठ अप्नहे करल काम । मै कर सेकम यि विश्वास हो तर मै केल कर सेकम यि अन्धविश्वास हो । लेखक विद्वानहुँक्र कठ, लिख्ना मुस्किल नि हो । अप्न कह ख्वाजल बाट ब्यक्त कर्ना अरबर हो । पाठकहुकन छुना कठिन नि हो, अप्न चाहल अस तरिकाले हुकन स्पर्स कर्ना केल अप्ठ्यार हो । तर महि लागठ, लिख्ना महा साँसट काम हो । सक्कुज बुझ्ना बोलीचालीक भाषा बेल्स पर्ना । आझ यि गोरपासुम लौव बाट ट कुछु फे नि हो । तर आपन करल कामक बारेम लिख्ना फे ओट्रा लिरौसी फे नि हो । ज्या जसिन हुइलसे फे शब्दके महाजालम मै फंँस्गैल बाटुँ । असिन लाग भिरल बा कि, शब्दमाला म्वार लाग पवित्र जिन्गिक गोरपासु हुइ सायद ।
सुमित्रा चौधरी
(लेखिका सुमित्रा चौधरी राष्ट्रिय खेलकुद परिषदक सदस्य हुइटि ।)