गजल
घामे गरौवर हर संगे फरुवा चलैबी खेट्वम ।
भस्काके डुम्ना आँखर ढेला गलैबी खेट्वम ।
कुइयाँ कुचिल करिया बड्री इ सालके बर्खम्,
छल्कल उँइरम किल्वाही हेगा लगैबी खेट्वम ।
रहरलग्टिक खेट्वा लोभलग्टिक हरयर बियार,
मच्या पिर्कम् बैठकेफें बियार कटैबी खेट्वम ।
बोंकुम लर्का, कपारी भर कल्वा ओ मिझ्नी,
सिहरल जिउ खाइबर चट्नी खवैबी खेट्वम ।
करेबेर केंहकेंह खाइबर ऐंहऐंह कहकुटे बा,
पच्गुर जाब टे सखाइ सालीन बलैबी खेट्वम ।
करेबेर हुर्डुर हुर्डुर खाइबेर खुर्डुर कहावट बा,
खेट्वा सेकाइ लेवार माटीमफें रमैबी खेट्वम ।
संगम कुस्मी
कैलारी गाउँपालिका -८ डख्खिन टेंर्हि, कैलाली