लास्या
गाउँ रहर लग्टिक रलसेफे जै मनै टै मेरिक मनम पीडा बाटिन । बास्या लागट संसारक सब्से अभागी मनै हुइ ट । डाइ भगन्वँक घर गिलक् ढ्यार बरस होसेक्लिन । बास्यक डाइ गाउँ भरिक बठ्न्याँवनसे सुग्घर रहि । छुटिहसे गाउँक प्रढन्वँक घर कम्लहरी लागल रहि । ‘जहाँ फुला ओहा भौंरा’ कह हस् प्रढन्वँक छावा बास्यक डाइह ढिंर बोकाडेली । भखर फुल्टी रहल फुल उ पापी किचुल डेहल ।

अढिकारक गाउँक महटावाँ कचेहरी जुटैल । उ ब्याला निरदलिय पंचायत शासन रह । गाउँ प्रधान ज्या कर्लसे मानक पर्ना । प्रधन्वाँ आपन छावहन बचालेहल । आउर ट उ अबोध भखर फुल्टी रहल नारिहन गाउँक सब जहनक आघ रन्डी, बेस्या, पटुर्निया संग्या डेलिन । निचहटी निचहटी लर्का जन्माइक पर्लिन । लर्का ट जर्मैली लकिन समाजक छिछि डुरडुरले सह निसेक्क गाउँक उट्टर रहल पकरियक रुख्वम् गर्झुलक संसार छोरडेलि ।

बास्या छुटीहसे साहारक नाउँम नानी किल रहिन । आसकाल्ह बास्या जवान होस्याकल बा । लकिन पहिचानक नाउँम कुछु ना कुछ । बास्यक का गल्टी । उ का यी डेसक नागरिक निहुइट । यह ढर्टीम जरम लेकफे आझ बास्या आपन अढिकार पहिचानक लाग सरकारके आघ लार चुहइटी लास्या लागल बा ।
डियर अबिरल
गुलरिया–१५ खैरापुर बर्दिया