सेकौनी
खेट्वम धान पाक्स्याकल रह । साहा मास गाउँ घरसे ट आसकाल खेट्वा चौंकस रठा । डब्लाहान घरक् काल्ही ढान काट्क औलि उटारसेक्ल । पंन्ढ्राहान घरक् मनै कट्टि रहल ग्याँरा भर आझ अंगट्टहि ओरासेक्ल ।

घरठेक बेराहा उइरा किल बचल बटिन । पंन्ढ्राहान खन्ह्ली ग्याँरा सेकौनी खैना आपन ठर्वा सन्चुसे सिकार किन्ना पैसा मँग्ठी । ठर्वा सन्चुक कठिन–सिकार किन्क खर्च करलसे ग्याँरा सेकौनी मुस मारक खाब ।

पंन्ढ्राहान खन्ह्ली बेरि रिझाए घर ओर लग्ठी । बाबा छावा भर खेट्वम मुस क्वार भिर्ठ । सन्चु आपन छावहन मुस्वक ठोल्का टिर बैठाइठ् । ओ कहट मुस्वा निक्र लागि ट पक्रिस् । भाँठ फखाइल डगर ओहर्से सन्चु घम्मैल फर्न्वा चम्कैटी कोर भिरट । मुसन ढान बोक्क आपन बख्खारी बाढल डेख्क भुन्भुनैटी कहठ । सारेक मुस आब मारम ट हड्डि गोड्डि निबचैम । अस्ट आपन मन्का भुन्भुनैटी कोर्टी रह । सन्चुक छावा ठोल्का डगर मुस्वा निक्र हस ड्याखट । ठोल्कम हाँठले छोपल का रहट , ऐया बाबा मुस्वा काट डेहल कहट । मुस्वा मिलगिल कैख सन्चु झन हाली हाली कोर भिरट । एक घचिक पाछ बिलिम बर्का बिखर सँप्वा भेटाइट् । टब पटा चल्ठिस छ्वाहन सँप्वा कट्लिस कना ।

सन्चु छावहन घर सुटाके साट गाउँक गुर्वा बैडावा बलाक जुटाइठ् । लकिन बहुट बेर होस्याकल ओर्से सन्चु आपन छावहन बचाइ निसेकट । सम्झट आझ सिकार किन्ना पैंसक लालचले आपन छावा गुमाइक् परल । आसकल कौनो चिजिक सेकौनी खिना सुन्टी किल सन्चु आँख जर्वक पानी हस् रसाजैठिस् ।
डियर अबिरल
गुलरिया–१५ खैरापुर बर्दिया