अटुट सम्बन्ध

टोहाँर मोर लक्ष्य फरक रलसेफेन
हमार भावना अक्के
टुँ फेन मनै मै फेन मनै
हमार चल्ना साँस अक्के
हमार ढरकन अक्के
आउ टँु ओ मै मैगर नाता जोरी
जिहिन नामाकरण कैना बा
अटुट सम्बन्ध ।

अन्तरजातिया दुनियाँमे
जातय विभेद कैसिन हो ?
कामकाज सक्कु चल्ना
छुवल पानी निचल्ना कैसिन हो ?
मै टोहाँर डेवाली पुजम् सामेल हुइबु
आउ टुँ हमार फगुइ पुजम्
मै टोहाँर सारी धोती लगाडेम
आउ टँु हमार लहंगा चोलिया लगालेहो
टोहाँर ढिडो सिस्नु खैना मन बा महिन
टुँ मोर खँरिया, बरिया ढिक्री खाडेउ
महिन टुहिनसे प्यार कर्ना बा
ओ लग्घेसे बुझ्ना मन बा
टोहाँर मोर अटुट सम्बन्ध ।।

मै थारु भासा सिखैम टुहिन
टुँ महिन पहारी भासा सिखैहो
मै सखिया झुम्रा नाच डेखैम
टुँ महिन देउडा टप्पा गाके सुनैहो
डेखैना बा दुनियाँहे
टोहाँर ओ मोर सस्कृतिके महासागर
टोहाँर भगवानसे पुछ्ना मन बा
का फरक बा आखिर हमार प्राथना म
पुछ्ना मन बा हमार डेंउटनसे
का फरक बा हमार ढार ढुप म
आखिर मनै मनै अक्के हुइ
अक्के दुःख एक्के पीडा बोक्ना मन बा
मने कहँु कहुँ नैमिल्ना जात कसिन ?

आउ टँु ओ मै मिल्के हम्रे हुइबी
हर लराइ संगे कर्बि
हर बाधा सामना कर्बि
ओ बनैबी संसारके नमुना
हमार अटुट सम्बन्ध ।
हमार अटुट सम्बन्ध ।।
विष्णु कुसुम
घोराही दाङ