घमन्ड
डलिया गाउँभरिम् सबसे बरवार घमन्डी रहे । उहिन गाउँक् मनैफें सक्कुझे घमन्डी बा कहिंट । उ मनैयाँ ना केकरो बाट मानठ नाही किहनो टेरे । ठोरचे काम करी फुर्टी जुनहुक ढेर डेखाइठ । महिनसे धनवान केउ नैहो । ना टो मोर बराबर केउ होइँ । गाउँक् मनैनठें सडिमान अस्टे अस्टे कहटी रहठ ।

डलियक् एक्ठो भैयाफें बटिस । डाडा भैयनके बाट नाइ मिल्के डुनुजे अलग हुइगैल रठैं । डलिया झगराहा हुइलेक ओरसे सम्पत्तिफें अपन भैयासे ढेर लैढरले रहठ् ।

कठैं टो ‘लोहा चाहे जटना चमचम रहि मने खिया जरुर लागठ ।’ उमेर छिप्टी गैलेक ओरसे सारिरिक समस्यफें उहिन सटाइ लग्ठिस । टबेमारे बेमारफे बरा जोर हुइजाइठ । डवाइ करट करट सम्पत्तिफें ओरैना अवस्थामे होजाइठ । पुरान बाट लैके गाउँक् मनैफें केउ नैसहयोग कैडेठिस उल्टा भल मनठंै ।

डलियक् इ मेरिक गट डेख्के ओकर भैया जैसिक टैसिक पैंसक जुगार कैके बरवार अस्पतालमे डवाइ कराइठ । ठोरिक डिन परसे डलिया मजासे चिक्कन हुइठ ओ अपन भैयासे पुरान बाट लैके माफीफें माँगठ ।

भैया कठिस्–डाडु भक्खर चेटले । बडरिम् चाहे जटरा उप्पर पठरा लबडाउ मने गिरुइया भुँययम् जो हो ।
अर्जुन थारु
बारबर्दिया–५ बनघुस्री बर्दिया