भगनवाँ ओ किसनवाँ

बर्खा अइना एक महिना रहे । एक्ठो किसन्वाँ खोब धान बोइटहे । टब्बेहेँ एक्ठो मनैयाँ आपुगल । ओ पुछे लागल अरे महराज का बोइटी ? किसन्वाँ कहल धान बोइटुँ । फेन डोसरका आइल पुछे लागल । अरे महराज का बोइटी ? हर जोटुइया कहल का बोइम धान टे बोइटुँ । बर्खा आइ लागल । ओस्टेक टिसरका आइल । ओहो पुछे लागल । जे आइटा टे पुछ्टा । उ किसन्वाँ बटाइट् बटाइट् मिच्छागैल । उ फे कहाँसम बटाइ ।

ठिक्केपर ओहे बेर भगवान आगैलैं । टप भगवान पुछे लगलैं अरे महराज का बोइटी ? मनैयाँ झोककैटी कहठ् अरे का बोइम नैडेख्ठी । टप भगवानहे बरा रिस लग्लिन । अत्रा मजासे पुछ्लो पर इ मनैयाँ झोक्काइटा । भगवान मनेमने कहलैँ राह सारेक मनैयाँ रहिले । असौं टोर धान जम्मा बिना नै मोइले, नैछोरम । जाके इन्द्र भगवानहे जत्रा सुख्खा पर्लेसे फेन पानी नै बर्साइ परि कहिके डम्कैले रहट ।

बर्खा पूरा मच्गैल । असिन बर्खामेफे पानी एक्को नैआइ लागल । एहोंर किसनवाँहे बरा चिन्ता होगैलिस । आप पानी नैबर्सी कहिके, पानी बर्सैना जुगार लगाइल । बुर्हिया बुर्ह्वा सल्लाह कर्नै । बेरि खाखुके चल्नै जोंजा लेले । जोंजक् आगि जुग जुग बारे लागल । जोग्नी किरा फेन जुग जुग बरे लग्नैं । जोग्निनहे डेख्के मेघि फेन गोँगा गोंगा बोले लग्नैं ।

ओहोर इन्द्र भगवान सोंचे लग्नै । महाडेउ जि आझ पानी नैबर्साइक कले हुइँट् । मने मेघ, जोग्नी फेन बोले लग्नैं । आप का कर्ना हो जा परि परि कहिके अइसा पानी बर्सा डेलैं कि सारा खेटुवा रेवारेट होगैल ।

ओहोंर किसन्वँक् धानफे पानी पाके बाल
लग्गैलिस । किसान खुसी होगैल । किसन्वँक् मेहनत कैले रहे फलफे भटागैल । भगनवान हेर्टी रहिगैनैं ।
टे जहाँ मेहनत कर्बो फल जरुर मिलठ् ।
सागर कुस्मी
(लेखक कैलालिक् धनगढीसे प्रकासिट हरचाली साहित्यिक त्रैमासिक पत्रिकाके प्रकासक ओ प्रधान सम्पादक हुइँट् ।)