गोचाली
टोहाँर जरम पैलक् फें पचास बरस पुगल
टोहाँर मैगर इतिहास पह्रेबेर
दाङ्गके गरुवामे जरम पैलो
गझिन बनवाँके फँटुवाम
दाङ लडियक् रटुइयाम
अन्ढार कोन्टिम
थारु कमैयाँके झोपरिम
डँरिया भात संग
आमिल लर्चाक कपुवा खैती
सुखाइल झाझ्या खैती
बस्या मार पिटि
कबु घोघिसङ छबुवा जार पिटि
कबु भुख्ल कबु पियसल
बहरलो पहुँरलो ।

गोचाली
टुँ मुक्ति बनक जरमलो
टुँ स्वतन्त्रता बनक जरमलो
टुँ संघर्ष बनक जरमलो
टुँ स्वणिम बनक जरमलो
टुँहाँर हत्या करक लाग
पन्चायति व्यबस्था पाछ लागल रह
टुँहाँर हाथम जन्जिर बान्धक लाग
सामान्ती सत्ता खोजटी रह
टुँहाँर ग्वारम नेल भिराइक लाग
लुहाकिक सिक्रि भागलरह
टुँहाँर बोल्ना मुउ सियक लाग
सुजाहा सुत्री जुटाइल रह
टभु फें
टुँहाँर रक्षा के लाग
टुँहाँर सुसार कर्टी कर्टी
मुक्ति स्वतन्त्रता ओ न्यायके बात
बटोइटी बटोइटी
कभु निमुना गरि
जुग जुग बँच्टी
बिदाबारी लेल यी धर्तीसे
सगुन लाल, मङ्गल, जोख्खन,
भिम, रुपलाल, बेद प्रकाश आदि ।

गोचाली

टुँ सामाजिक साँस्कृतिक रुपान्तरणके समबाहाक हुइटो
टुँ कमैयाँ कमलहरी हुकन मुक्त कर्ना अगुवा हुइटो
टु्ँ राजनैतिक आर्थिक क चेत जगैना गुरु हुइटो
टुँ रुढिबाद विरुद्ध मुक्का पट्कना योद्धा हुइटो
टुँ प्रगतिशिल साहित्य सस्कृतिके निरन्तर यात्री हुइटो
टुँ अन्याय अत्याचार विरुद्ध बोल्ना आवाज हुइटो
टुँ पछगुरल समाजह मुक्तिक डगर डेखैना बरघर हुइटो ।

गोचाली
अपराधी प्रकृति बिपद, सुन्सान बस्ती
कोभिद १९ नोभेल कोरोना भाइरस
सपनाके भव्य समारोह,
रजत जयन्ती भताभुङ्ग हुइल
कयौं गित गजल कविता कथा
डायरिके पाना म बन्दी बनगिल
सयौं साहित्यकार हुक्र कोन्टिम बन्दी बनगिलैं
एक सुनौलो अवसर छुटल
टँुहाँर गुनगान गैना मच्छ छु्टल ।

गोचाली
थारु भाषा साहित्य के निरन्तर अगुवाइ करहो
प्रगतिशिल साहित्य सस्कृतिके निरन्तर अगुवाइ करहो
जुग ज्ुग सम आपन डगर नाछोरहो
५० औं जन्म जयन्तीके शुभकामना
शुभकामना शुभकामना ।

सुदिन चौधरी
बेलभार बर्दिया