कथा
अढेरुवा
ओहो पानी नैअइले महिना दिन हुइ लागल । नाटे मकै बोइ सेक्जाइठो, नाटे खेट्वा ओर कौनो काम हुइठो । घरे बैठल बैठल किल का करना हो । छोट्नक् बारी बेंर्हक् लग लसरी बँट्ना टे बा उ टे बुर्हिया अपनेहे बनाडारी । कमसेकम बियार कुल बोइना पानी आडेहट टे भला जिम्डरवा साहेब फेन टनिक खुशी रहटाँ । मंजुरी करे जाउँ कलेसे ठेकदार लोग फेन अपन अपन मनैन ढैले रहठाँ । लावा मनैन लेहक मने नैकरठाँ किटो सारीसाह ओहे कामे करे परल । पोर्ह साल टे भला मंजुरी करना मौका मिल्गैल रहेटे मलखाद खिरिद डरले रहँु । अप्नेहे खाद नैलगैबो टे जिम्डरवा खेती नैडेहक लग रठाँ । पाछे अनाज मेन्से कटाके कुल मिलैठाँ लेकिन किनक लग टे नगद पैसा हुइ परल काहुन । अपन घरक् बहरिम् बैठल किसन मनके बात खेलैटी बा ।

१२ बरसक् छाइ लग्गे आके बाबा ! सर तीन महिनक् फिस नाने कले बटाँ । भैयक् लग फेन बुझैना बा । नाउँ लिखैलेपर अक्को फिस नैबुझैलक नाउँ काट्डेम कह्टहिंट । काल्हीडिस नैटे स्कूल कुल नैजैम ।

अपन छाइक् बातसे अचानक किसनके ध्यान भंग होगैलिस । उ यथार्थमे आइल ओ कहल अपन डाइसे कोह काहुन । टिना बेँच्लक् कुल पैंसा डि टे लैजाइस । छाइ चल्गैलिस ।

लर्कनहे जलम टे डेबो टे पर्हाइ टे पर्बे करठ । एकटे हम्रे पर्हे नैसेक्ली । गरीब घरके लर्कन कापी, कलम, ड्रेस, फिस टिरे नैसेक्नाहे निःशुल्क पर्हैना कैह्के अइसिन ढेर का का संस्था आइल टौन ठोरठार जग्गा जमिन बटिन कैह्के मोर लर्का कब्बो नैसुविधा पैलाँ । अइसिन ढेर गाउँक् लर्का स्वान संस्थासे पर्हठाँ कैह्के संस्थाहे कलुँ टे, कम्हलरिया लागल लर्किन किल पर्हैठी कहलाँ । जब भगनवाँ सुरबाद डेले बा टे अपन लर्कन्ह जसिक टसिक पर्हैबे करम । चाहे मर मंजुरी करे परी, चाहे आनक खेतवा बारी जोटे परी । विषय वस्तु बदल्लेसे फेन किसन बरबरैटी गैल ।

बाहर जुत्ता लगाके अइटी रलक बोल सुनके ओकर ध्यान ओह्रे खिच्ठिस् । भिट्टरसे अँगना ओर निकरटी किल ‘घरहीँ बटे रे किसन ?

हजूर मलिकवा, एँहेँ बटुँ, भर्खर खाना खाके एकघचिक बैठल रहुँ । आइ यह्रे भिट्रे ।’ भिट्टर ओर डेखैटी कहठ ।

जिम्दरवा अपन तरिकाले मै बैठे नैआइल हुँ, खेतीपातिक हालचाल का का हुइटा, बियार कुल तयार हुइटा कि नै मकै तट आउर जाने बोइ लग्लाँ, टैँ कहियासे सुरसार कैबे ? मकै बोडेलेसे पानी आइटे जम्बे करी, काल्हीसे बोइना सुरु कर हली ।

मालिक पानी अइबे नैकरठो बिया भरिक मकै बचैले बटुँ, नैजामी टे कहाँ पाके बिया खोज्ना हो । बियार फेन पानी नैआइटसम नैसेक्जाइ हजुर ।

उ बात मै नैजानम । ओ हाँ सुन, मल खादके व्यवस्था जल्दी करिस नैटे बजारेम फेन ओरा जाइते पाछे पस्टैबे जौन डेना हुइ हिसाव पारके टे मै डेबे करम, कि कैसिन ?
उ टे हो, हजू््र ।

लेटे यिहे बात कहक बुझक लग आइल रहुँ । सोँच विचार करना टोरे हाँठेम बा, मै चलटुँ ।’ जिम्डरुवा चल्गैल ।

किसन अक्केली सोंचल ‘जिम्डारके बात फेन ठिके हुइन लकिन मौसम साथ नै डि टे, कहाँ खेती करे सेक्जाइ ? कट्ना मुस्किलसे बिया मकै बँचाके ढैगिल बा, नै जामी टे बजारमे अइसिन मंहगा भाउ बा, ओ मलखाद टे जैसिक फेन किन्ही परी नै टे जिम्डार खेती छुटा डेना बात करठाँ । ना कौनो सीप, ना कौनो पार्हपण्डित खेती बिना टे जिना बहुत मुस्किल रही । मै अप्ने टे जैसिक हुइलेसे फेन जीलेम लेकिन लर्का जहान परिवारहे । किसन कल्पनाके गहिराइमे बुर्टिजाइठ ।
कुछ हप्ता पाछे । आझ फेन किसन कोड्रालेके खेट्वा ओर लागठ । खेतीपातीक मौसम रहलक ओरसे जवान का बुर्हाइल मनै जन्नी, लर्का सक्कु जाने खेतीमे लागल बिल्गाइटटाँ । कोइ बर्डा चर्हाइटटाँ, कोइ लुर काटटा, कोइ बियार काटटा, कोइ पानी चर्ना उद्देश्यले कन्टी कुलुवा ओर नेँगट बिल्गाइटटा, चेंगफा टेक्टरके आवाज जोरजोरसे अइटी बा । अस्टे दृश्यले आँजर पाँजरके वातावरण बडा सोहावन बिल्गाइटा ।

खेती किसानी मनै मै फेन ओह्रे खेट्वा ओर चल्लुँ जहाँ मोरिक घरक मनै बियार उखार टहिँट, महिन अइसिन दिन आइल कैह्के ‘मिझ्नी खैना जुन टे खेट्वम् अइना’ कना बातले खिझ्वइलाँ । मै मुस्कुरैलुँ ओ खेट्वक् एक पाँजर बैठके घराइसी बात कैटी बियार उँखर्नामे डँट्गैलुँ । बियार उँखारे बेर कुछ समयक बाद टनिक जोरजोरसे मनैनके आवाज अइलक पटा पैलुँ टे मै ओँह्रे लग्लुँ । ‘जिन जाउ सर । यी थारुनके अस्टे हुइन, मिझ्नी खालिँहीं बस छोटछोट बातेम झगरा झाँटी करे लग्ठाँ ।’

जहानके बातहे नैमानके मै आघे बर्हगैलुँ । कुछ लग्गे पुग्लुँ, गाउँक् काकु ओ किसन खेट्वम् पानी चाँरे नैपैलक ओरसे टैँ टैँ मैँ मैँ करटी चरम सीमामे पुग्गैल रहिँट । सम्झाके बहुट मुस्किलसे झगरा टे ओराइल लेकिन कुलवामे पानी कम रलक ओरसे पाला अन्सार लगाइ पर्ना आझु सन्झाके कचेहरी बैठाके सब्के सहमतिमे निर्णय करैना सोँच बना गैल ।

साँझ हुइटी रलक ओरसे मनै अपनआपन घरे ओर लग्लाँ । झोल्पट हुके रात हुइटी रलक समयमे फेन अभिनसम एकठो मानव आकृति खेट्वा ओर बिल्गाइटहे । मनमे शंका लागल लाइटलेके महुँ चल्लुँ ओह्रे । लग्गे पुग्लुँ टे डेख्लुँ किसनहे । जे कि अपन जिम्डरवक् अढेरुवा हो ।

भैया मै टे आझ जैसिक फेन यी खेट्वम् पानी चाँरके जैम । चाहे आधा रात बिट्जाइ । पियास लागक् डरे बोटलक् पानी फेन नन्ले बटुँ । टुँ का करे यहाँ चल्अइलो यह्जुनके ?

काकुक् बात सुनके मोर आँख रसा गैल जे कि अपन जिम्डरवाहे खुशी पारकलग, अपन परिवारके खुशीके लग किल एक बोटल पानीले खुशीक् साथ अढ्ढा रातसम काम करे सेक्ठाँ । मै कुछ घचिक बात बट्वाके चल्अइलुँ । कट्ना निर्दोष । कट्ना निश्चल भावना किसनहस डोसर जनहुनके खेतीपाती कैके अपन जीवन निर्वाह करुइया किसन कट्ना हुइहीं कट्ना नै । का हम्रे वहाँ लोगनके भावना कबो बुझ डेले बटी ?

सायद ! वहाँ लोगनके बात पीरव्याथा, मर्म, अन्याय, यथार्थ बुझ डेहुइया कोइ जन्मल रह्टाँ टे ? मै निरास हुइटी घरे घुमके चल्अइलुँ ।
देवराज चौधरी
लमही ७ छुट्की घुम्ना देउखर