कविता
मै ओ मोर भरुवा

अइया कट्रा गम्हिर
यी कपारीक् भरुवा
बोकुँ कलक कर्रा बा
नैबोकुँ कलक आउर कर्रा पराइठ
कैसिके मोरसंग चप्कल
बुडुक् पालासे
मुक्त हुइल समयमे
यी छोरि कहिंट बाबा
टौन
मोर पालम् आउर चप्कल
काल्हिक आइल बार्ह
लडियक् ढिकुवक् बाली काटल
लडियक् ढिकुवक् घर पाटल
का कर्ना हो ?
महि मोर भरुवा बोक्ही परठ

काल्ह मुक्त दिवसमे
एक बगाल नेटनसंगे
डुचार ठो पत्रकार अइलैं
भुखाइल पेटमे
सिउसिउ कर्ना मोर लर्कन बलैलैं
झुट्राझम्रा घरक अँगनामे
सक्कुन बैठैलैं
हम्रे सोंच्ली
आज आढा किलो हुइलेसे फेन चाउर पैबी
एक गोटी हुइलेसे फेन दवाइ पैबी
एक मुठ्ठा डाल पैबी
टौन टौन
सब भ्रम रहे
ओइने टे पहिलक जस्टे
अइलै ओ गैलंै
हमार टुटल घर डेखाके
फाटल पेउँडा लगाइल कपरक्
फोटु खिंच्के
डलर खउइयन जस्टे
राहट डेहुइयन जस्टे
बात किल बट्वइलैं
डस ठो फोटु खिंच्लैं
हमिनहे ‘बिचारा’ कलैं,
छि कैसिक बैठ्ठी कलाँ
बस अट्रे किल
सबजे बैठ्ला गाडीमे
सब ढुँर ढुँवा हमारे मुहम्
का कर्ना ?
एक किलो चाउरके लाग
एक मुठ्ठा डालके लाग
महि मोर भरुवा बोके पर्ना
ओहो कब भरुवा बिसैम
मै ओ मोर भरुवा
मोतीराम चौधरी ‘रत्न’
कैलारी ५ बैजपुर कैलाली