गजल
एकजुट हुइ पर्ना बा कुछ कर्ना बा पहिचानके लग ।
हाँठमे हाँठ मिलाके लागे पर्ना बा पहिचानके लग ।

हमार लग पहिचानसे भारी प्राण फेन नेहो यहाँ,
मरे परिटे परि यहाँ फेन मर्ना बा पहिचानके लग ।

हमार पुर्खन सजोक लगा लगाके ढैलंै आझसम,
माटी जोगाइक् लग आघे सर्ना बा पहिचानके लग ।

पुर्खनके रकट पसिनासे डहकारल भुमि हमार इ,
फुल्ना बा पहिचानके लग झर्ना बा पहिचानके लग ।

यि ज्यानसे फेन मैयाँ बा हम्रिहिन हमार माटी यहाँ,
जैसिन आँखर पहार फेन फोर्ना बा पहिचानके लग ।

थारु बस्ती बस्तीम सरकार कर्फ्यु लगाके हँस्टी रहल,
थारु पहारी मिल्के सद्भाव भर्ना बा पहिचानके लग ।
संगम कुस्मी
कैलारी गाउँपालिका ८ डख्खिन टेर्ही, कैलाली