कविता
महिन ज्या कहो मै ओहे हुुइटुँ

मै छेगरी चरैठुँ
संघारी अस्टहीके दिन बिटैठुँ
संस्कृतिके गीत गैटि गैटि
अपन सारा रात कटैठुँ
कविता मोरिक डगरी
गजल मोर भेंटी
कथा मोर संघारी
मनै सब कायर बटैं
कुरिति कुुसंस्कारके अन्त्य कर्ना
संस्कृति संस्कारके संरक्षण कर्ना
आब टोहाँर, मोर ओ हमार कन्ढामे आइल बा
टबमारे मै लागटँु आब
गाउँके भेंरी चरहाइ
कविताके छेगरी चरहाइ
कथाके खेती करुइया
गयर्वा, भैसर्वा या कमैयाँ
महिन ज्या कहो मै ओहे हुइटुँ ।

बाटे बाटे
डुनिया संसार घुम्ठँु
संस्कृतिके बाट् कर्टि
चेतनाके डिया बरैठुँ
भासाके सम्वाद
लिपीके संरक्षण
परम्पराके जगेर्ना
मजा संस्कारके संरक्षण
ओ कुरितिके अन्त्य कर्ना
यि मोर महान अभियान
मातृभुमीके रक्षक् लाग
थरुहट भुमीके आरक्षणके लाग
जल, जंगल, जमिन ओ
हमार कुल ठन्वँक् लाग
मै सदादिन लर्नु, लरटँु ओ
अभिनफें बलबुटी सांस रहटसम
लर्टि रहना मै गरिब, गवा“र, अज्ञानी
महिन ज्या कहो मै ओहे हुइटुँ ।

आँखी उघ्रल्
खुल्ला आकाश डेख्नु
पौली भुइयम्
या आकाशमे
पटा नैचलल
औसान हेराइल
हौक भौक मेटल
निहारके हेर्नु यि डुनिया“
समाज सक्कु रमिटे डेख्नु
कोइ थारु थारु खउइया
कोइ थारु डारु खउइया
कोइ थारु जुन मुसन मरुइया
उद्घार ओ उत्थान करुइया जुन शुन्य
बस्
मै लर पर्नु
टक्रा उठ्नु शोषकनहे अंग्रेइटि
यी समाजमे डेखा पर्नु
आब दुष्ट, दुश्मण, शोषक, सामन्त अहंकारी
महिन ज्या कहो मै ओहे हुइटुँ ।
तुलाराम सनम
जानकी ५ अमौरी कैलाली