खोज/पत्रकारिता
कैलारी गाउँपालिका भिट्टरके थारु पत्रकारनके परिचय
सुरुवात
कैलाली जिल्लामे थारु पत्रकारिता सुरुवात करुइया कैलारी गाउँपालिका वडा नम्बर २ रानामुरा कैलालीक् जोखन रत्गैंयाँ हुइँट । उहाँ २०५९ सालमे मुक्तिक डगर पत्रिका प्रकासन कैके थारु पत्रकारिताके जलम डेलैं । उहाँ थारु साप्ताहिक पत्रिका फेन कुछ अंक प्रकासित कैलैं । ओस्टेके हुँकारे भैया जगत रत्गैंयाँ फेन ट्रासन पत्रिका प्रकासन कैके थारु पत्रकारितामे इट्टा ठप्ना काम कर्लैं । मने उहाँ डुनु जे माओवादीके संकटकालमे पर्के साहदत्त हुइलैं । ओहेमाारे उ पत्रिका उहिसे आघे जाइ नैसेकल ।

कैलाली जिल्लामे कैलारी गाउँपालिका भिट्टर थारु पत्रकार सबसे ढेर बिल्गैठैं । यहाँ इ आलेखमे कैलारी गाउँपालिका भिट्टर स्थायी घर रहल थारु पत्रकारनके अवस्था ओ परिचयात्मक चर्चा कैल बा ।

१.प्रेम चौधरी
कैलारी गाउँपालिका वडा नम्बर ५ पबेरा कैलालीक् प्रेम चौधरी एक जुझारु पत्रकार हुइँट । उहाँ कन्चनपुरसे प्रकासित फार्वेस्ट टाईम्स दैनिक धनगढी कैलालीसे संवाददाताके रुपमे २०५९ सालसे अपन पत्रकारिताके पैला सुरु करलैं ।
धनगढीसे प्रकासिट हमार पहुरा अर्धसाप्ताहिक, हमार पहुरा थारु दैनिकमे फेन कुछ समय अपन कलम डौरा सेक्ले बटैं । डेढ डसक्से लगटार कलम चैलैटी आइल चौधरी अझ्कल पहुरा थारु दैनिक कैलालीमे सम्पादकके जिम्मेवारी सम्हर्टी उहाँ थारु पत्रकारिताहे सेवा कर्टि बटैं । उहाँ नेपाल पत्रकार महासंघ कैलालीके सचिव, नेपाल आदिवासी जनजाति पत्रकार महासंघके सदस्य, थारु पत्रकार संघके कैलालीके अध्यक्ष फेन हुइँट् ।

२.अविनाश चौधरी
कैलारी गाउँपालिका वडा नम्बर ७ भुँइयाँफाँटा कैलालीके अविनाश चौधरी फेन एक सक्रिय युवा पत्रकार हुइँट् । धनगढीसे प्रकासित हमार पहुरा अर्ध साप्ताहिकसे अपन पत्रकारिताके सुरुवात कर्लैं । उहाँ अपन पत्राकारिताके यात्रा हमार पहुरा थारु दैनिक, श्री नेपाल टाईम्स दैनिकमे समेत करसेकले बटैं । अझ्कल पश्चिम टुडे दैनिक, ओ गोरखा पत्र दैनिकके धनगढी संवाददाताके रुपमे कार्यरत बटैं । उहाँ नेपाल पत्रकार महासंघ कैलालीके सदस्य, थारु पत्रकार संघके सदस्य, नेपाल आदिवासी जनजाती पत्रकार महासंघ कैलालीके अध्यक्ष समेत होसेकल बटैं ।

३.सागर कुस्मी
कैलारी गाउँपालिका वडा नम्बर ८ डख्खिन टेंर्हि कैलालीक् सागर कुस्मी बिगत डेढ डसकसे पत्रकारिता कर्टि आइल बटैं । धनगढीसे प्रकासित निसराउ साप्ताहिक, पहुरा साप्ताहिकमे कुछ अनुभव बिटोरके २०६३ सालसे हमार पहुरा अर्धसाप्ताहिक, हमार पहुरा थारु दैनिक, पहुरा थारु दैनिकमे लम्मा समयसम् संवाददाता होके सक्रिय रुपमे कलम चलैटी आइल युवा पत्रकार हुइँट् ।
छोट्टेसे साहित्य, संगीत, कला, संस्कृतिमे रुचि रहल कुस्मी पत्रकारिता संगसंगे थारु साहित्यिक पत्रकारितामे फेन उहाँक् बहुट भारी योगदान बटिन् । कैलाली जिल्लासे नियमित प्रकासिट हुइटि रहल हरचाली साहित्यिक त्रैमासिक पत्रिकाके ओ निसराउ सापताहिक पत्रिकाके प्रकासक ओ प्रधान सम्पादक समेत रहल कुस्मी थारु साहित्यहे ढेर उचाइमे पुगैले बटैं । उहाँ खोज तथा अनुसन्धान मुलक साहित्यिक पत्रकारितामे कलम चलैठैं । उहाँ अझ्कल नेपाल पत्रकार महासंघ कैलालीके सदस्य, थारु पत्रकार संघ कैलालीके उपाध्यक्ष, आदिवासी जनजाति पत्रकार संघके सदस्य फेन हुइँट । उहाँ अझ्कल थारु भासा, साहित्य ओ संस्कृतिमे अनुसन्धान मुलक लेख रचनामे लागल बटैं । कंचनपुर जिल्लाके थारु भासक् पहिल पत्रिका सुमिरन पत्रिकाके प्रकासक ओ सम्पादक होके थारु भासा साहित्यहे सेवा करटी बटैं । उहाँके हस्ताक्षर गजल संग्रह (२०६८), फुटल पोक्री गजल संग्रह (२०६८), आँशके सागर मुक्तक संग्रह (२०६९) फेन प्रकाशित हुयल बटिन् ।
उहाँ नेपाल पत्रकार महासंघ कैलालीके सदस्य, नेपाल आदिवासी जनजाति पत्रकार महासंघ कैलालीके सदस्य, थारु पत्रकार संघके कैलालीके उपाध्यक्ष फेन हुइँट् ।

४.राम दहित
कैलारी गाउँपालिका वडा नम्बर ७ भुँइयाँफाटा कैलालीक् एक सक्रिय पत्रकार हुइँट् राम दहित । छोट्टेसे साहित्य, संगित ओ पत्रपत्रिका पहर््ना सौकिन दहित धनगढी कैलालीसे प्रकासित निसराउ साप्ताहिक, पहुरा साप्ताहिक, हमार पहुरा अर्धसाप्ताहिकसे अपन पत्राकारिताके पैलाहे आघे बर्हैलैं । हमार पहुरा थारु दैनिकमे २०६४ सालसे समाचार लेखनहे आघे बर्हैटी गैलैं । इहैंसे हुँकार औपचारिक पत्रकारिता सुरु हुइल बिल्गाइठ । इहे पत्रकारितामे लागके स्थापित कराइल नाउँ हो राम बहादुर चौधरीसे राम दहित ।
पत्रकारितामे निरन्तर कलम चलैटी अझ्कल ओजरार मिडिया प्रा.लि.से संचालित कैलारी अनलाइन पत्रिकाके प्रकासक ओ सम्पादक बटैं । अझ्कल उहाँ पहुरा थारु दैनिक संवाददाता, नेपाल पत्रकार महासंघ सुदू््रपश्चिम प्रदेशके सदस्य, नेपाल आदिवासी जनजाती पत्रकार महासंघ कैलालीके सचिव, थारु पत्रकर संघ कैलालीके सदस्य फेन बटैं ।

५.लखन चौधरी
कैलारी गाउँपालिका वडा नम्बर ६ बेंडौली कैलाली जल्मल लखन चौधरी फेन एक जुझारु पत्रकार हुइँट् । उहाँ धनगढी कैलालीसे प्रकासित हमार पहुरा थारु दैनिक २०६४ सालसे अपन पत्रकारिता सुरवात करल् हुइँट् । इहे पत्रकारितासे रामलखन चोधरीसे स्थापित नाउँ हो लखन चौधरी ।
उहाँ धनगढीसे प्रकासित कैलाली पोस्ट दैनिक, न्यूजपश्चिमेली दैनिकमे समेत अपन ढेर अनुभव बिटोर सेक्ले बटैं । अझ्कल पहुरा थारु दैनिकमे सहसम्पादकके रुपमे पत्रकारिताहे सेवा कर्टी आइल उहाँ लोकान्तर अन्लाइन पत्रिका, दिनेश खबर अनलाइलमे समेत ढेर समय लगानी कैले बटैं । उहाँ नेपाल पत्रकार महासंघ सुदूरपश्चिमके सदस्य, आदिवासी जनजाति पत्रकार संघ कैलालीके अध्यक्ष, थारु पत्रकार संघके कैलालीके सदस्य फेन हुइँट् ।

६.दुर्जन कुमार चौधरी
कैलारी गाउँपालिका वडा नम्बर ६ बेंडौली कैलालीमे जल्मल दुर्जन कुमार चौधरी फेन थारु पत्रकार मन्से एक जुझारु पत्रकार हुइँट् । उहाँ धनगढी कैलालीसे प्रकासित पहुरा थारु दैनिक २०६९ सालसे अपन पत्रकारिता सुरवात करल हुइँट् ।
उहाँक् लेखन समाचारसे साहित्यमे जेडा लेखन बटिन । कथा, गजल, मुक्तक बिधामे जेडा कलम चलैठैं । साहित्यिक पत्रकारितामे पकड ढेर बिल्गठ् चौधरीके । उहाँके हंसा कथा संग्रह (२०७४), साँखी गजल संग्रह (२०७५) लगायत पोस्टा प्रकाशित हुइल बटिन् ।
उहाँ नेपाल पत्रकार महासंघ कैलालीके सदस्य, नेपाल आदिवासी जनजाति पत्रकार महासंघ कैलालीके कोषाध्यक्ष, थारु लेखक संघ नेपाल कैलालीके कोषाध्यक्ष, थारु पत्रकार संघ कैलालीके सदस्य फेन हुइँट् ।

७.उन्नती चौधरी
कैलारी गाउँपालिका वडा नम्बर ८ दुधिया कैलालीमे जल्मल उन्नती चौधरी एक जुझारु पत्रकार हुइँट् । उहाँ धनगढी २०६३ सालमे कैलालीसे प्रकासित हुइल सेम अवाज दैनिकसे अपन पत्रकारिता सुरवात करल् हुइँट् ।
पत्रकारिता क्षेत्रमे टमान आरोह अवरोह पार करटी ढेर मिडियामे आवद्ध होके पत्रकारिता करटी आइल उन्नती कैलाली जिल्लामे महिला पत्रकारके रुपमे स्थापित हुइल बटी । उहाँ मर्निङ बेल दैनिक, न्यूजपश्चिमेली दैनिक, मुक्तिक डगर हुइटि अझकल केर्नीन्यूज डटकम सञ्चालन करके अपन पत्रकारिता यात्राके समय लगानी कर्ले बटैं । उहाँ टमान राष्ट्रिय मिडिया जस्टे गोरखापत्रके थारु भाषाभाषिक पेज, नागरिक दैनिकके पश्चिमेली पेज, अन्नपुर्ण दैनिकके फुर्सद पेजमे उहाँके आलेख प्रकाशित हुइटी आइल बटिन । उहाँ लालरक्षक म्याग्जिन, हिमाल खबरमे फेन खोजमूलक स्टोरी प्रकाशित हुइटि आइल बटिन । उहाँ नेपाल पत्रकार महासंघ कैलालीके सदस्य, थारु पत्रकार संघ केन्द्रीय उपाध्यक्ष, क्रियाशील पत्रकार महिला कैलाली जिल्लाके निवर्तमान अध्यक्ष फेन हुइँट् ।

८.मोतिराम चौधरी
कैलारी गाउँपालिका वडा नम्बर ५ बैजपुर कैलालीक् मोतिराम चौधरी फेन थारु भासा पत्रकारितामे कलम चलैटी आइल बटैं । उहाँ कैलारी पोष्ट साप्ताहिकके प्रकासक सम्पादक रहल मोतिराम चौधरी अझ््कल साहित्य लेखनमे कलम चलैटी बटैं । अझकल हुँकार पत्रिका अनलाइन संस्करण चलटी बटिन् ।
उहाँके सम्पादनमे सैहचिन त्रैमासिक साहित्यिक पत्रिका फेन २०६० सामे कुछ अंक प्रकासन हुइल बिल्गाइठ् । उहाँके साहित्य लेखनमे ढेर कलम डौरटी बटिन् । मनके बोझा गजल संग्रह (२०७०) लगायत टमान पोस्टा प्रकासित हुइल बटिन् ।

९.अनत चौधरी
कैलारी गाउँपालिका वडा नम्बर ५ रतनपुर कैलालीक् अनत चौधरी थारु पत्रकारके पंक्तीमे डेखा पर्ठैं । लेकिन अझकल हुँकार इ क्षेत्रमे कलम रुकल बिल्गाइठ् ।
२०६० सालसे घोडाघोडी एफ. एम.से अपन पत्रकारिता सुरुवात करल अनत चौधरी हमार पहुरा थारु दैनिक पत्रिकामे समेत अपन ढेर अनुभव बिटोरले बटैं । अझकल उहाँक् पत्रकारिताके कलम बन्द हुइल बटिन । उहाँ नेपाल पत्रकार महासंघ कैलालीके सदस्य, थारु पत्रकार संघ कैलालीके सदस्य, आदिवासी जनजाती पत्रकार संघ कैलालीके सदस्य फेन होसेकल बटैं ।

१०.नरेन्द्र चौधरी
कैलारी गाउँपालिका वडा नम्बर २ मुरा कैलालीमे जन्मल नरेन्द्र चौधरी फेन थारु पत्रकारके पगरीमे पर्ठैं । हमार पहुरा थारु दैनिकसे २०६५ सालसे पत्रकारितामे गोरा टेकल चौधरी पहुरा थारु दैनिकमे आबद्ध होके हसुलियासे संवाददाता के रुपमे पत्रकारितामे ढेर योगदान डेले बटैं । लेकिन अझकल हुँकार इ क्षेत्रमे सक्रिय बटैं ।
उहाँ नेपाल पत्रकार महासंघ कैलालीके सदस्य, थारु पत्रकार संघ कैलालीके सदस्य, आदिवासी जनजाती पत्रकार संघ कैलालीके सदस्य फेन हुइँट् ।

११.जोखनराम चौधरी
कैलारी गाउँपालिका वडा नम्बर ४ निमुवाँबोझी कैलालीक् जोखनराम चौधरी फेन थारु पत्रकारनके पगरीमे ढरहि परि । उहाँ धनगढीसे प्रकासित २०६३ सालसे हमार पहुरा अर्धसाप्ताहिकसे अपन पत्रकारिता यात्रा सुरुवात कर्ले रहिंट ।
उहाँ हसुलिया क्षेत्रके पहरेडार पत्रकार रुपमे परिचित रहिंट । गाउँ घर के मनै पत्रिका पर्हे पैनामे उहाँ ढेर गुन लगैलैं । उहाँ हसुलिया, पबेरा रतनपुर, बसौटी, गदरिया गाबिस सम हमार पहुरा अर्ध साप्ताहिक, हमार पहुरा थारु दैनिक पत्रिका घर घर पुगाइँट् । लेकिन उहाँ ढेर समय सम यात्रा करे नैसेक्लैं । पत्रकारिता कर्टी कर्टी २०६५ सालमे भगन्वँक् घर चलागैलैं । उहाँक् लगाइल गुन हम्रे कब्बु बिस्राइ नैसेकब ।

ओरौनीमे
थारु पत्रकारितामे सबसे ढेर पत्रकार कैलारी गाउँपालिकासे उत्पादन हुइल बटैं । अभिनफें थारु पत्रकार जन्माइ सेक्ना सम्भावना ढेर बा । ओकर लग थारु पत्रकार संघ, नेपाल आदिवासी जनजाती पत्रकार संघ (फोनिज) लगायत संघ संस्था पहल करे पर्ना बिल्गाइठ् । इ ठाउँ पत्रकारिताके लाग बहुट मल्गर ठाउँ बा । यहाँक् युवा लोग फेन समाजके हित ओ विकासके लाग पत्रकारिता करे पर्ना बा । अब्बेक् अवस्थामे स्थानीय सरकारसे सहकार्य कैके आघे बर्हलेसे इ ठाँउके थारु पत्रकारिता अभिन फेन आकुर उचाइमे पुगाइ सेक्जाइ । सरकार पक्षफें भासा, साहित्य, ओपत्रकारिताके विकासके लाग मेरमेरिक कार्यक्रम करे सेक्लेसे आउर प्रभावकारी बनाइ सेक्जाइ । गाउँ गाउँसे युवा लोग समुदायके लाग सामाजिक विकासके लाग कलम चलाइ पर्ना जरुरी बा । अपन अधिकार सुनिश्चित करक् लाग फेन जागरुक हुइ पर्ना जरुरी बा ।
सागर कुश्मी

toharsamjhaname@gmail.com

(नोट : यी मोर पहिल चरणके खोज अनुसन्धान हो । एम्ने अभिन बहुत बात छुटल हुइसेकी । सम्बन्धित पत्रकार संघरियन सहयोग करही कना बटिया हेरटुँ ।)