कविता
मै थारु भाषा पह्र निजन्ठुँ

मै थारु भाषा पह्र निजन्ठुँ
मै थारु बात बट्वाइ निजन्ठुँ
मै थारु गीतबाँस निजन्ठुँ
मै थारु संस्कृति निजन्ठुँ
कहुइया मनै ढेउर बाट ।

मैफें छोटीसे नेपाली पर्हनु
छोटीसे अंग्रेजी पर्हनु
सहरम बैठ्नु
आहारी पहारी साथी संगी
झिलिरमिलीर रंगी चंगी
वातावरणम बैठ्नु
तर आपन भाषा विस्राइ निसेक्नु
लेकिन टँु काहे कठो ?
मै ट थारु भाषा पह्र निजन्ठुँ
मै ट थारु बात बट्वाइ निजन्ठुँ ।

बोली भाषा ढरम संस्कृतिम
आपन गौरव रहठ
खोज्लसे आपन भाषा संस्कृतिम
ज्ञान गरिमा रहठ
हर संस्कृतिम असल संस्कार आपन पन रहठ
ज्यानसे ढेउर मैयाँ कर्ना मैगर मन रहठ
लेकिन टुँ काहे कठो ?
मैै थारु भाषा पह्र निजन्ठुँ
मै थारु भासाम बट्वाइ निजन्ठुँ ।

भाषा संस्कृति बचाइक लाग पर्ना बा
हर युवा हुँक्र गाउँबस्तीसे जाग पर्ना बा
आपन पहिचान ओ चिनारी खोजक लाग
राज्यसे आपन सांस्कृतिक हक माग पर्ना बा
लेकिन टुँ काहे कठो ?
मै थारु भाषाम लिख निजन्ठुँ
मै थारु गीतम नाच निजन्ठुँ ।

थारु बात बट्कोही नैजन्ठुँ कैक
बहाना नाबनाउ
आनक संस्कृतिम रमैना चाहना नाबनाउ
बिग्रल भट्कल आनक गाना नाबनाउ
मै ट एक्ठो लेखक हुइटुँ
मै आपन भाषाह मैयाँ मन्ना कवि हुइटुँ
मै ट आपन थारु भाषाम लिख्ठुँ
मै आपन थारु गीतबाँस गैठुँ
छोक्रा मन्द्रा बजाइफें जन्ल बाटुँ
सख्या नाचम नच्ना पैंयाँ लगाइ जन्ल बाटुँ
घुमैरा पंैया, मुर्घी लर्वा, परेवा घुर्कना पैंया फें लगाइ जन्ल बाटुँ
लहंगा सट्की घाल्ख थारु नाच, नाचे जन्ल बाटुँ
लेकिन टुँ काहे कठो ?
मै थारु भाषाम पह्र निजन्ठँु
मै थारु भाषाम बट्वाइ निजन्ठुँ ।

आपन भाषा आपन गीतके बहुत मैयाँ लागठ
बात बट्कोही फेन रसगर ओ मैगर लागठ
मोर फेन टुँहाँर असक आहारी पाहारी संघरेन बाट
मै फेन स्कुलिम नेपाली, अङ्ग्रेजी पहर्नु,
मै फेन सहरम बैठ्ख क्याम्पस पहर्नु.
आपन भाषा संस्कृति निबिस्रैनु
आपन गीतबाँस गाए निछोर्नु
लेकिन टँु काहे कठो ?
मै कब्बु थारु भाषा पह्र निजन्ठुँ
मै थारु भाषाम बट्वाइ निजन्ठुँ ।

सहरके डिस्कोम फेन गैनु
रकपप डान्सम रमैना चाहाना निबनैनु
देश विदेशके गीत फें सुन्नु
आपन संस्कृतिसे दूर भग्ना कौनो बाहाना निबनैनु
मै अरजी करटुँ
हे मोर डाडुभैया डिडीबाबु हुँक्र
शिक्षित युवा पिंढी हुँक्र
टुँ फें आपन भाषा संस्कृतिम रमाइ सिखो
रविन्द्रनाथ टैगोर फेन ट बंगाली भाषाम कविता लेख्ल
कालिदास संस्कृतम महाकाव्य लेख्ल
टुँ फेन ट थारु भाषाम कविता, काव्य लिख सेक्बो
भाषा भिट्टरके मैगर गुन ज्ञान गरिमा सिख सेक्बो
लेकिन टुँ काहे कठो ?
मै थारु भाषाम पह्र निजन्ठुँ
मै थारु भाषाम बट्वाइ निजन्ठुँ ।

मानबहादुर चौधरी ‘पन्ना’
बीरेन्द्रनगर २ लौबस्टा सुर्खेत