थाकस कैलालीके अधिवेशन नमगरल, चुनाव कुवाँर १३ गते हुइना

सभापति पदमे दिलबहादुर चौधरी, विरबहादुर चौधरी ओ देशराम चौधरीके उम्मेदवारी

धनगढी, ७ कुवाँर । थारु कल्याणकारिणी सभा कैलालीके नवौं जिल्ला नमगरल बा ।

शनिच्चरसे सुरु हुइलक जिल्ला अधिवेशनमे लौव कार्यसमितिके लाग चाहल पदसे ढयार जानेक उम्मेदवारी परके भोटिङ प्रणालीमे जैना हुइल निर्वाचन समितिके सदस्य जोहारीलाल चौधरी बटैलै । बन्दशत्र ढिला हुके मनोनयन दर्ता करेबेर रातके ११ बजलपाछे निर्वाचन अइना शनिच्चर सारल निर्वाचन समितिके सदस्य चौधरी बटैलै । उहाँक अनुसार सभापति पदमे दिलबहादुर चौधरी, विरबहादुर चौधरी ओ देशराम चौधरीके उम्मेदवारी परल बा ।

उपासभापतिमे लक्ष्मण चौधरी, मानबहादुर चौधरी, बतासु चौधरी, चुनीराम चौधरी ओ सुस्मिता चौधरीके उम्मेदवारी परल बा । जेम्ने महिला उपाध्यक्षके लाग एक जानेक केल उम्मेदवारी परलमे सुस्मिता चौधरी निर्विरोध निर्वाचित हुइल बाटी । बाँकी २ ठो पदक लाग निर्वाचन हुइना बा ।

सचिव पदमे बसन्ती चौधरी ओ बुधराम चौधरीके उम्मेदवारी परल बा । सहसचिवमे रतन बहादुर चौधरी ओ विनोद चौधरीके उम्मेदवारी परल बा । ओस्टेक कोषाध्यक्ष पदमे सुनिता चौधरी ओ दिव्य प्रियासी चौधरीके उम्मेदवारी परल बा । जिल्ला सदस्य ओ केन्द्रीय पार्षदके टुङगो भर लागल बा ।

निर्वाचन समितिके सदस्य जोहरीलाल चौधरीके अनुसार थारु कल्याणकारिणीसभाके लौव कार्यसमिति चुनेबेर प्यानलगत रुपमे नइजैना राजनितिक दलविच सहमति हुइल जनैलै । चुनाव अइना शनिच्चरके रोज (कुवाँर १३ गते ) तोकल बा ।

नवौ जिल्ला अधिवेशनक लाग केन्द्रीय सदस्य जिउलाल चौधरीके संयोजकत्वमे निर्वाचन समिति गठन कैगिल रहे । समितिके सदस्यमे अधिवक्ताद्वाय जोहारी लाल चौधरी, सर्जुप्रसाद चौधरी बटै सदस्यमे इन्दिरा चौधरीफे रहल बाटी । प्राविधिक सहयोगीमे काजी चौधरी ओ विनय चौधरी रहल बटै ।

कैलाली जिल्लामे १३ ठो स्थानीय तह रहलमे ११ ठो पालिकामे थारु बाहुल रहल ओरसे ११ पालिकामे पालिका स्तरीय समिति गठन कैगिल बा । जेम्ने कैलालीके धनगढी उपमहानगरपालिकाक सभापतिमे सुर्य प्रसाद चौधरी, कैलारी गाउँपालिकाके सभापतिमे अशोक चौधरी, गोदावरी नगरपालिकाके सभापतिमे जनकलाल चौधरी, घोडाघोडी नगरपालिकाके सभापतिमे रेणुका चौधरी, बर्दगोरिया गाउँपालिकाके सभापतिमे प्यारे चौधरी, लम्कीचुहा नगरपालिकाके सभापतिमे बलराम चौधरी, जानकी गाउँपालिकाके सभापतिमे धनिराम गोजिहार, टीकापुर नगरपालिकाके सभापतिमे विमलकुमार डगौरा, जोशीपुर गाउँपालिकामे भैरव चौधरी ओ भजनी नगरपालिकाके सभापतिमे लोकेन्द चौधरीके नेतृत्वमे लौवा कार्यसमिति पहिले चयन हुसेकल बा ।

ओस्टेक क्षेत्रीय सभापतिमे क्षेत्र नम्बर १ मे लौटन चौधरी, क्षेत्र नम्बर २ मे सभापति पाछे चुन्ना कहिके आइतवारीलाल चौधरी उपाध्यक्ष रहल कार्यसमिति चयन करल बा । क्षेत्र नम्बर ३ के सभापतिमे कृष्ण प्रसाद चौधरी निर्वाचित हुइल बाट । क्षेत्र नम्बर ४ मे लालबहादुर चौधरी ओ क्षेत्र नम्बर ५ मे पदम बहादुर चौधरीहे फेरसे मान्यता डेना कहिके लौव समिति नइचुनल हो ।