संगीत 

 पहिले पहिले हर गाँउक झराली कर्ढुनीम् बसिया झुरैले राखिंट् टब् कुलवक नाहाँपर बैठके मेरमेरके गीतके भाकामे बसिया बजाइ लागिंट् । अटियाँवन मेटावन,दुःख बिसरावन,सुनटी सुहावन लागे बसियक धुन । जब फगनहिया बहे लागे, टब बहुट डुर डुरसे बसियक बोल सुन जाए । भैंसरवन्, बर्डिवन, घंसकटवन्, किसनवन्,खेटवक मेर्वा पर पर डुम्ना पर पर बैठके अंटर अंटर बसिया बजाइट । सखिया नाच, झुमरा नाच, बसिया बिना अक्को चैनार नै लागे । लकिन अच्कल बसियक बोल ओनैना मौका नै मिलठ् । ढिरे ढिरे बसियक जबाना जबाना  थारुन्के गीतबाँसमे ओरैटी जाइटिस् कि का ? लागठ् कुछ बरस बाद छोट छोट लर्का बसिया कौन चिरैंयक नाउँ हो, बाब ? कैहके पुँछे ना लागिट । उहेसे बसियाहे चिन्हारु करैना ओ बजाइक सिखैना यी पक्तकारके खास अस्रा हुइस् । 

बसिया संसारभर पाजैना आपन रुप ओ आकार रहल फुंकके बजैना एक मेरके बाजा हो । बसिया सिर्जलक बारेम् कौनो प्रमाण्कि स्रोत नैमिल्लेसे फेन महाभारतके नायक कृष्ण भगवान सिपार ओ प्रमाणिक बसिया बजुइया हुँइट कलेसे गलत नैहुइ । कान्हा १६ सय गोपीनीन् बसिया बजाके मन मोहले रहिँट् । अष्टिम्की टिकजैना चित्रमे बसिया बजैटी रलक कान्हक् चित्र बनाके पुजा कैजाइठ । उहेसे बसियाहे पुख्र्यानी बाजा कहेसेक्जाइठ । थारु संस्कृतिमे फेन बसियक बरा भारी ठाँउ बटिस् । हर टरट्युहारके गानबजानमे राहरङ्गी करैना ओ सोहगाड बहैना काम करठ बसिया । 

बसियाहे बाँसुरी (टिरछेक् कैके बजैना) मुरली (ठार्ह कैके बजैना) बय, वेणु, बंशी, फ्लुट अस्टक ढेउर नाउँले चिन्हे सेक्जाइठ् । टिरछेक् कैके बजैना बसिया (बाँसुरी) बजैना ठनिक कर्रा हुइलक ओरसे ठार्ह कैके बजैना बसिया (मुरली) बजैना चलन ढेर बावइ । यकर एकठो कारण मुरली बजाइबेरसाँस फुंक्ना सहजिल रलक हो । लकिन जत्रा बाँसरीमे उटार चढाउ, कंपन गमक, खट्का, मुर्की, मोड जैसिन क्षङ्गारिक पक्ष बजाइ सेक्जाइठ ओत्रा मुरलीमे नैसेक्जाइठ, यद्यपी अंगरी लिलभिलवइना नियम एक्के हो । 

बसिया लगभग १२ ठनसे २४  इन्च सम लम्मा, १/२ इन्च समके गोलाई रहलक खोखरु बाँसक,पित्तरिक, लोहक या प्लाष्टिकके पाइपमे ६ ठनसे ८ ठो बिल्ला पारके बनाजाइठ् । फुंकुक्लग एकठो छुट्टे बिल्ला पारके पारजाइठ, जिहीहे बसियक मुंह कैहजाइठ् । बसियक मुहे सोझ फुकके टरेओर रहलक बिल्लापर अंगरी लिलभिलवाके बजाजाइठ । खास कैके बसिया टरका ढेबरेम् ढैके उपरक् ढेबर ओ सांसके सहारा लेके बजाजाइठ ।  आउर बाजा लेके बसियक स्वर महा मिठास ओ मुग्धकारी रहठ् । साइट उहेक मारे कृष्ण भगवानके बसियक धुन सुनके १६ गोपिनी, बनवक सारा जानवर, चिरैचुरुङ्गन मोहित हुइल राखिँट । लकिन आउर बाजक् नन्हे बसिया बजैना लिरौसी नै हो । यमहे सिपार हुइकलग ढेर धैर्य ओ साधनाके जरुरी बावै । 

यी लेख लिखुइया फेन ढेर बरसके त्याग ओ तपस्या कैके बसिया बजाइक सिख्लक हो । रातदिन बसिया संगे लेले रैह्जैना, सुटेबेर सिर्हन्नी ढैके सुत्ना, कहुँजाइबेर पैन्टक पछिल्का गोझुम ढैले रना,फुर्सट पैटीकिल पिलपिलवाइ लग्ना, करे यी जीउ । कैयो चो टे “ ढङ ना सहुर का बजैठे रे ? कनफोर मचैले ” कैह्के गरिवा फेन पैलस । लरफेट् लरफेट् कटार साँप निकरनाहस बजैठी  हो” कैह्के खिल्ली फेन उराइट सुनल । “फेन बजाई झे  भाइृ बरा बर्हिया धुन निकर्ली राम रे” कैह्के तारिफ फेन सुनल । मने ना सहुर पिलपिलवाइट्–पिलपिलवाइट् ठो ठोर ढङ लगाके बजाइसेक्ना हुगैल । अचकल यी जीउ फुर्सत मिलाके बसिया बनैना ओ बजैना डुनु काम करठ । 

का अपनी फेन बसिया बजाइक सिखल चहठी ? यदि चहठी कलेसे, आइ बसिया बजैना सहजिल नियम सिखी । सबसे पहिले बसिया हांठेमे ल ीओ मुँहक टरका ढेबरे पर ढारी । डुनु हाँठेक् बिच्का ३/३ ठो अंगरीले बसियक ६ ठो बिल्ला टुमी । आब ढिरेढिरे फुंकी सा स्वर आइ ।  आब बुझी सक्कु बिल्ला टुमके फुक्बो टे सा स्वर बजठ् । ओकर परसे टरक १ नं बिल्ला छोरके आउर सक्कु बिलला टुमके फुंकलेसे रे स्वर बजठ् । अस्टक १ ओ २ नं बिल्ला छोरके आउर सक्कु बिल्ला टुमके फुंकलेसे रे स्वर बजठ । अस्टक १ ओ ३ नं बिलला छोरके आउर सक्कु बिल्ला टुमके फुंकलेसे म स्वर बजठ । असटक १,२, ३ ओ ४ नं बिल्ला छोरके आउर सक्कु बिल्ला टुमके फंकलेसे प स्वार बजठ । अस्टक १,३, ४, ओ ५ नं. बिल्ला छोरके आउर सक्कु बिल्ला टुमके फुंकलेसे नि स्वर बजठ ।अ‍ैसिके बसियामे पहिला सप्टकके शुद्घ स्वर बजठ । इहे सुत्र लगाके ठनिक बल कैके फुंक्लेसे डुसरा सप्टकके शुद्घ स्वर बजठ । 

कोमल ओ तीब्र स्वर बजैना नियम भर ठोरचे फरक ओ कर्रा बा । १ नं.  बिल्ला आधा टुमके आउर सक्कु बिल्ला पुरा टुमके फुंकलेसे कोमल रे स्वर बजठ । अस्टक १ नं बिल्ला छोरके २ नं. बिल्ला आधा टुमके ३,४,५, ओ ६ नं बिल्ला पुरा टुमके फुंकलेसे कोमल ग स्वर बजठ । अस्टक १ ओ ३ नं. बिल्ला छोडके ४ नं.बिल्ला आधा टुमके २,५,ओ ६ नं. बिल्ला पुरा पुरा टुमके फुंकलेसे टीब्र म’ स्वर बजठ । अस्टक १,३ ओ ४ नं.बिल्ला छोरके ५ नंं. बिल्ला आधा टुमके २ ओ ६ नं. बिल्ला पुरा टुमके फुकंलेसे कोमल ध स्वर बजठ । अस्टक ४ ओ ५ नं. बिल्ला छोडके ६ नं. बिल्ला आधा टुमके १,२ ओ ३ नं. बिल्ला पुरा टुमके फुंकलेसे कोमल नि स्वर बजठ । अस्टक सुत्र अनुसार हिम्मत नै हारके लक्टारे सक्कु स्वर बजैना प्रयास करबी कलेसे अपनेन्के फेन बसिया बजैनम् सिपार हुइबी ओ थारु संस्कृतिक एकठो अल्ग्वाइ नैसेक्ना आंग बचैना प्रयास प्रयासमे लागे सेक्बी । यदि बसिया बजैना सिपार हुइबी टे भगवान कृष्णक् नन्हे १६ सय गोही टे नै,मने एकठो गोही टे जरुर फँसाइ सेक्बी । 

विजय चौधरी

– (सिसहनिया –९ बगरापुर, द्यौखर निवासी लेखक अच्कल जिल्ला शिक्षा कार्यालय दाङमे कार्यरत बटाँ ।)