सन्धु चौधरीहे खाद्य सामाग्री मद्दत कैगैल
सागर कुस्मी
कन्चनपुर, २५ बैसाख । कंचनपुरके बेलौरी नगरपालिका वडा लम्बर ५ शोभाताल बैठुइया सन्धु चौधरीके घरक आर्थिक बहुट नाजुक हुइलक ओरसे सहयोग कैगैल बा ।
बेलौरी थारु ग्रुपके बगाल उ सन्धु चौधरीहे खाद्य सामाग्री घरहिंमे पुगके सहयोग कैगैल बा । बेलौरी थारु ग्रुपके ९ जाने मिलके नगद नौ हजार तीस रुप्या बराबरके, १०० किलो चाउर, ५ लिटर खैना तेल, १० किलो नोन ओ १० किलो दाल खाद्य सामाग्री मद्दत कैले बटैं ।
सन्धु चौधरी बिगत धेर दिनसे आँखिक समस्यासे गुजरटी आइल बटैं । घरक आर्थिक स्थितिसे डवाइ कराइ नैसेक्लक ओरसे सन्धु आँखिक बिमारसे दिन ढकेल्टी बटैं ।
सन्धुके घरम सान बिहान छाक टर्ना फें कठिन हुइलेक ओरसे बेलौरी थारु ग्रुप सहयोग करल रेशम चौधरी सामाजिक संजालमार्फत खबर डेलैं ।